Azərbaycanda çay istehsalının 60 faizi Astaranın payına düşür

Çayçılıq subtropik bölgənin, o cümlədən Astaranın ənənəvi və gəlirli sahələrindəndir.  Bu baxımdan  regionda çayçılığın  inkişaf  etdirilməsinin  prioritet  məsələ  kimi qarşıya qoyulması təsadüfi deyil.
Məlum olduğu kimi, sahənin inkişaf etdirilməsi, çay məhsullarına tələbatın yerli istehsal hesabına təmin olunması, onların ixrac potensialının artırılması, kənd əhalisinin məşğulluğunun və maddi rifahının yüksəldilməsi məqsədi ilə "Azərbaycan Respublikasında  2018-2027-ci illərdə çayçılığın inkişafına dair Dövlət Proqramı" qəbul  edilmişdir. Proqramın  həyata  keçirilməsi  nəticəsində  Astarada  çayçılığın inkişafı sürətlənmiş, çay plantasiyalarının əkin sahəsi artırılmışdır.
Bu gün Azərbaycanda mövcud çay plantasiyalarının təxminən 24 faizi, çay istehsalının isə 60 faizindən çoxu  Astara rayonunun payına düşür. Rayon Statistika İdarəsindən aldığımız məlumata görə, hazırda  rayonda 232,1 hektar  çay sahəsi var və həmin sahələrdən 1 avqust vəziyyətinə 486,6 ton və ya keçən ilin müvafiq dövrünə nisbətən 11,2 ton (2,4 faiz) çox məhsul yığılmışdır. Məhsuldarlıq 0,5 sentner artaraq 21 sentnerə çatmışdır. 
Rayonda  çayçılıqla 3 müəssisə məşğuldur və  2024-cü ilin  7 ayında həmin müəssisələr tərəfindən 145,8 ton  və ya 6,4 faiz çox yaşıl çay yarpağı istehsal edilərək  təhvil verilmişdir. Məhsuldarlıq isə  0,4 sentner artaraq 7,7 sentnerə çatmışdır. Əhaliyə məxsus təsərrüfatlar tərəfindən isə 340,8 ton (keçən ilin müvafiq dövrünə nisbətən  0,7 faiz çox) məhsul yığılmışdır.
Təsərrüfatlarda çay yığımı davam edir.ensər, Kakalos və Ərçivan  ərazi nümayəndəliklərində geniş yayılıb. Hazırda bütün ərazilərdə əkin sahələrinin aqrotexniki tələblər səviyyəsində becərilməsi üçün ciddi səy göstərilir.

Seyran CAVADOV,
"Azərbaycan"