İtaliyanın RAI telekanalının “Tv7” həftəlik xəbər buraxılışında Azərbaycanla bağlı növbəti geniş reportaj yayımlanıb.
AZƏRTAC xəbər verir ki, kanalın ölkəmizə ezam edilən jurnalisti Barbara Karfanyanın müəllifi olduğu reportajda Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev italiyalı jurnalistə müsahibəsində ölkəmizin Avropa və Asiyanın, Şərqlə Qərbin qovşağında yerləşdiyini deyib: “Azərbaycan Qərbdən Şərqə uçan quş kimidir və Şərqin ən qərb ölkəsi, Qərbin ən şərqidir. Biz Qara dəniz bölgəsinin bir hissəsi, Avropa qurumlarının üzvüyük və Avropa mədəniyyətini bölüşürük. Eyni zamanda, ölkəmiz Yaxın Şərq və Orta Asiyadan keçən ticarət yolları və ənənəvi logistika qovşaqlarının kəsişməsində yerləşir”.
Jurnalist avqustun 8-də Azərbaycan Prezidenti İlham Əliyev, ABŞ Prezidenti Donald Tramp və Ermənistanın Baş naziri Nikol Paşinyanın Vaşinqtondakı görüşünə dair Birgə Bəyannamənin imzalandığını, eləcə də Azərbaycan və Ermənistan arasında sülhün və dövlətlərarası münasibətlərin təsis olunması haqqında Sazişin razılaşdırılmış mətninin paraflandığını xatırladır. Vurğulanır ki, bununla da Qarabağda 30 illik qanlı müharibəyə son qoyuldu və Donald Tramp bu illər ərzində heç kimin edə bilmədiyini etdi. Beynəlxalq Sülh və Rifah naminə Tramp Marşrutu” (TRIPP) bağlantı layihəsinin Ermənistan ərazisindən keçərək Azərbaycanın əsas hissəsini onun Naxçıvan Muxtar Respublikası ilə birləşdirəcəyi qeyd olunur. Bu ticarət dəhlizinin, eyni zamanda, geosiyasi kontekstdə Xəzər dənizi ətrafındakı bölgənin getdikcə daha mərkəzi mövqeyə, enerji və rəqəmsal marşrutlar üçün vacib haba çevrilməsinə səbəb olacağı, Şərq və Qərb arasında yeni bağlantı yaradacağı bildirilir.
Reportajda, eyni zamanda, Azərbaycanın mədəniyyət paytaxtı olan Şuşada aparılan bərpa və yenidənqurma layihələrindən bəhs edilir. Burada beşulduzlu mehmanxananın artıq dünyanın siyasi liderlərini qəbul etdiyi bildirilir. Qarabağın hava qapısı adlandırılan Füzuli Beynəlxalq Hava Limanı barədə də məlumat verilir.
Hikmət Hacıyev hərbi təcavüz və 30 ilə yaxın davam edən işğal dövründə yerlə-yeksan edilən Ağdamın “Qafqazın Xirosiması” adlandırıldığını bildirib.
“Biz Cənubi Qafqaz üçün yeni və hərtərəfli təhlükəsizlik arxitekturası qurmaq istəyirik”, - deyə Prezidentin köməkçisi qeyd edib.
Ölkəmizin Qafqazı çoxqütblü dünyanın kəsişməsinə çevirmək niyyətində olduğu vurğulanır.
Bundan başqa, reportajda Azərbaycanın reallaşdırdığı bərpaolunan layihələr - xüsusən də külək və günəş enerjisi layihələri barədə məlumat verilir. Qazaxıstandan başlayaraq Xəzər dənizinin dibi ilə çəkilən fiber-optik rabitə xəttinin əhəmiyyətindən bəhs olunur, layihənin Azərbaycanı Avropaya birləşdirəcəyi bildirilir. Ölkəmizdən çoxlu sayda məlumat trafiki keçəcəyi, bununla da rəqəmsal mərkəzə çevrilməyin hədəfləndiyi qeyd olunur.
Həmçinin Qobustan Milli Tarix-Bədii Qoruğu barədə də məlumat verilir. Minilliklər boyu miqrasiya və ticarət mərkəzi olan Azərbaycanın mədəni və təbii irs baxımından zəngin ölkə olduğu, Qobustan qoruğunun tarixin daş yaddaşı hesab edildiyini bildirilir. Diqqətə çatdırılır ki, paytaxt Bakıdan 55 kilometr məsafədə yerləşən qoruqdakı qayaüstü rəsmlər və Qaval daşı eramızdan əvvəl III-II minilliklərdən orta əsrlərə qədər dövrü əhatə edir. Burada açıq səma altında 6 mindən çox qayaüstü təsvir və petroqlif var.
Qeyd edək ki, RAI telekanalı daha əvvəl ölkəmizlə bağlı silsilə reportajlar yayımlayıb.
