İran Prezidenti Məsud Pezeşkianın Azərbaycana səfəri ikitərəfli münasibətlərin inkişafında dönüş nöqtəsi olacaq və əməkdaşlığın genişlənməsi üçün münbit şərait yaradacaq.
AZƏRTAC xəbər verir ki, bu sözləri yerli mətbuata açıqlamasında İran İslam Şurası Məclisinin (Parlamentin) Təhsil, tədqiqat və texnologiya komitəsinin sədri Əlirza Mənadi Sefidan deyib. O bildirib ki, İran ilə Azərbaycan arasındakı əlaqələrin daha da inkişaf etdirilməsi və möhkəmləndirilməsi üçün böyük əsaslar var. Hər iki xalqın eyni tarixə, dinə və milli adət-ənənələrə malik olması qarşılıqlı faydalı əməkdaşlıq əlaqələrinin daha da irəliyə aparılmasını zərurətə çevirib.
İranın Şərqi Azərbaycan (ostanından) vilayətindən İran parlamentinə seçilən deputat, həmçinin qeyd edib: “Bakıda imzalanan sənədlər yalnız iqtisadi deyil, həm də mədəni əlaqələrin inkişafına töhfə verəcək. Ümumiyyətlə, bu səfər dostluq əlaqələrinin möhkəmlənməsinə yeni yol açacaq”.
“İran Prezidentinin Azərbaycana səfəri yalnız dostluq mesajları verilməsi üçün deyil, eyni zamanda, gömrük, turizm, nəqliyyat sahələrində əməkdaşlığın fəallaşmasına təkan verəcək”, - deyən deputat parlamentdə təmsil etdiyi Şərqi Azərbaycan vilayətinin Azərbaycan Respublikası ilə sərhəddə yerləşdiyini xatırladıb, birgə azad iqtisadi zona yaradılmasının məqsədəuyğun olduğunu bildirib.
Əlirza Mənadi Sefidan İran və Azərbaycanın böyük iqtisadi potensiala malik olduqlarını vurğulayaraq deyib: “Nəqliyyat infrastrukturunun inkişafı, gömrük əlaqələrinin asanlaşdırılması və birgə azad zonaların yaradılması iqtisadi əlaqələrin genişlənməsinə zəmin yarada biləcək tədbirlərdəndir. Birbaşa uçuşların sayının artırılması və birgə sərgilərin keçirilməsi iki ölkə arasında turizmin inkişafına böyük töhfə verə bilər”. Deputat qeyd edib ki, İran Azərbaycanla həmişə qarşılıqlı hörmət, ortaq maraqlar və mehriban qonşuluq əsasında əlaqələr qurmağa çalışıb və Prezidentin səfərinin səmərəli olması bu münasibətlərin yaxın gələcəkdə daha da inkişaf edəcəyini göstərir.
