Azərbaycan Laçın yolu ilə bağlı bütün avantüraları iflasa uğradır

Avqustun 29-da Azərbaycan və Fransa prezidentləri arasında telefon danışığında regiondakı vəziyyət müzakirə olunub. Fransa prezidentinin təşəbbüsü ilə baş tutan danışıq əsnasında Prezident İlham Əliyev E.Makronun diqqətinə bir daha çatdırıb ki, Ağdam-Xankəndi yolu açıldıqdan sonra Azərbaycanın gömrük və sərhəd rejimi qaydalarına riayət etməklə Laçın-Xankəndi yolundan istifadə edilə bilər.

İrəvanın niyyəti puça çıxdı 

Ötən 3 ilə yaxın dövrün mənzərəsi göstərir ki, Azərbaycan 44 günlük Vətən müharibəsindən sonra yaranmış yeni reallıqlar müstəvisində də özünün milli maraqlarını qətiyyətlə təmin etməkdədir. Ermənistanla sərhəddə Laçın rayonu ərazisində bu ilin aprel ayında sərhəd nəzarət-buraxılış məntəqəsinin qurulması bunu bir daha təsdiqləyir. Bu sərhəd məntəqəsinin yaradılması ilə Azərbaycan öz suverenliyinin və təhlükəsizliyinin təmini istiqamətində növbəti tarixi qələbəyə imza atdı.
Azərbaycanın suveren hüquqları müstəvisində legitim addım atmasını Avropa Məhkəməsi də öz qərarı ilə təsdiq edib. Bununla ermənilərin hərbi cinayətlərinin,  Azərbaycanın Qarabağ bölgəsinə silah-sursat daşımasının, ərazilərimizin minalanmasının qarşısı alınıb. Əlbəttə ki, bu, azərbaycanlıların soyqırımında iştirak etmiş erməni hərbi canilərin canına qorxu salıb. Çünki onların hər birini hərbi cani Vaqif  Xaçaturyanın, bayrağımızı təhqir etdiklərinə görə saxlanılan erməni futbolçuların aqibəti gözləyir.
Ona görə də Laçında sərhəd nəzarət-buraxılış məntəqəsinin qurulması ilə erməni yalanlarının növbəti mərhələsi başlayıb. Ermənistan rəsmiləri Qarabağda humanitar fəlakətin yarandığını iddia etsələr də, ortaya bununla bağlı bir fakt belə qoya bilməyiblər. İrəvanın bu məsələ ətrafındakı manipulyasiyada məqsədi özünün təcavüzkar siyasətinə yeni siyasi don geyindirmək, bununla sülh danışıqları prosesini ləngitmək və nəticə etibarilə mövqelərini möhkəmləndirməyə nail olmaqdır. Amma BMT Təhlükəsizlik Şurasındakı müzakirələr ermənilərin bu niyyətini puça çıxardı. 

Fransa hakimiyyət orqanlarının riyakarlığı bir daha üzə çıxdı

Başda Fransa prezidenti E.Makron olmaqla bu ölkənin siyasi dairələri aylardır ki, Azərbaycana qarşı siyasi manipulyasiyalarla məşğuldurlar. Əslində, bu məsələ ətrafındakı qərəzli yanaşmalar Fransa hakimiyyət orqanlarının riyakarlığını bir daha üzə çıxardı. Erməni diasporunun əlində alətə çevrilmiş bu ölkənin siyasi dairələri Laçın yolundakı sərhəd nəzarət-buraxılış məntəqəsinin ləğvinə nail olacaqlarını düşünsələr də, son aylarda tam dərk etdilər ki, Azərbaycana təsir və təzyiq etmək qeyri-mümkündür.
Avqustun 26-da Laçın Şəhəri Günü bayram tədbirində çıxışı zamanı Prezident İlham Əliyev bir daha bəyan etdi ki, bizi heç nə yolumuzdan döndərə bilməz: "Bildiyiniz kimi, bu il aprelin 23-də Laçın rayonunda, Azərbaycan-Ermənistan sərhədində sərhəd-buraxılış məntəqəsi qoyulmuşdur. Bir daha iradə, cəsarət, öz gücünə əminlik nümayiş etdirərək biz bunu etdik. Nə qədər bizə təzyiqlər oldu, nə qədər hədə-qorxular oldu. Bu gün də davam edir, bu gün də müxtəlif beynəlxalq təşkilatlar çərçivəsində Ermənistan və onun arxasında dayananlar bizə qarşı müxtəlif fitnələr ortaya atırlar. Heç bir şey bizi yolumuzdan döndərə bilməz. 23 aprel bizim ərazi bütövlüyümüzün tam bərpası deməkdir. Sərhəd-buraxılış məntəqəsinin qurulması ərazi bütövlüyümüzün tam bərpası deməkdir və bunu biz beynəlxalq hüquq çərçivəsində etdik, biz öz ərazimizi qoruyuruq, öz sərhədlərimizi qoruyuruq və qoruyacağıq".
Fransa öz hərəkətləri ilə təxribatlara yol verərək sülh prosesinə xələl gətirir. Bu ölkənin rəsmilərinin qərəzli açıqlamaları ilə yanaşı, Laçın yolu ilə Qarabağın erməni sakinlərinə "humanitar yük" çatdırmaq istəməsi də təxribatçılıqdan və pozuculuqdan başqa bir şey deyil. Qoy nə qədər istəyirlər, gəlib sərhəddə toplaşsınlar. Yenə də gözləri yol çəkməkdən başqa çarə tapmayacaqlar. Bundan əvvəl Ermənistan tərəfi Qarabağa humanitar təyinatlı olduğunu iddia etdiyi yüklər göndərməyə çalışıb ki, bunda da məqsəd Prezident İlham Əliyevin qeyd etdiyi kimi, siyasi möhtəkirlikdir.

Ermənistanın və "böyük bacısı"nın hay-həşirləri faydasızdır

Əslində, E.Makron başda olmaqla Fransanın bütün siyasi dairələri əsl həqiqətlərin nədən ibarət olduğunu yaxşı bilirlər. Onu da yaxşı bilirlər ki, Qarabağ bölgəsi Azərbaycanın suveren ərazisidir, nə Xankəndidə, nə də Qarabağın ermənilər yaşayan digər yaşayış məntəqələrində humanitar fəlakət baş vermir. 
Laçın yolundan və sərhəd nəzarət-buraxılış məntəqəsindən gün ərzində onlarla erməni sakinin keçdiyi, Azərbaycan tərəfindən erməni sakinlərə yüklərin daşınması üçün "Ağdam-Xankəndi" və digər alternativ yolların ayrıldığı, bütün bu səylərə baxmayaraq, bu yollardan istifadənin Ermənistan və özlərini erməni sakinlərin nümayəndələri kimi təqdim edən şəxslər tərəfindən siyasiləşdirilməsi Fransa tərəfinə yaxşı məlumdur. Sadəcə, sülhə qarşı çıxan Fransanın bu məsələdən öz məkrli niyyəti üçün manipulyasiya məqsədilə istifadə etdiyi hər kəsə gün kimi aydındır.
Avqustun 29-da Fransa Prezidenti ilə telefon danışığı zamanı Prezident İlham Əliyev bir daha Azərbaycanın mövqeyini onun diqqətinə çatdırıb. Azərbaycanın mövqeyi isə haqlı və qətiyyətlidir. Ona görə də həm Ermənistanın, həm də onun "böyük bacısı"nın Laçın yolu ilə bağlı qlobal hay-həşirləri faydasızdır. Onların hansısa dövlətləri  və şəxsləri bu prosesə qoşmaları da əbəsdir. Çünki Azərbaycanı öz milli maraqlarından çəkindirmək mümkün deyil. Həm də erməni yalanları artıq ayaq tutub yeriyə bilmir.

Rəşad CƏFƏRLİ,
"Azərbaycan"