Ölkəmizə qarşı növbəti qarayaxma kampaniyası iflasa uğradıldı
Bakıda BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) öz işini uğurla davam etdirir. Dünyanın gələcəyi üçün narahat olan ölkə və təşkilatların on minlərlə üzvü Azərbaycana toplaşaraq iqlim dəyişmələrinin fəsadlarının aradan qaldırılması üçün müxtəlif həll yolları arayır, çağırışlar edirlər.
Bu çağırışların əsasını isə dayanıqlı iqlim maliyyələşməsinin formalaşdırılması təşkil edir. Xüsusilə varlı dövlətlərin bu istiqamətdə üzərlərinə düşən öhdəlikləri yerinə yetirmələri istənilir.
Siyasi riyakarlıq
Bu iqlim tədbirinin hansı ölkədə keçirilməsindən asılı olmayaraq xidmət etdiyi məram Yer kürəsindəki bütün insanları birbaşa maraqlandıran problemlərə vaxt itirilmədən çarələrin tapılmasıdır. Ancaq bəzi Qərb ölkələri - xüsusilə də Fransa məhz Azərbaycanda keçirildiyi üçün COP29-a mahiyyətindən tamamilə uzaq anlam yükləyərək, qərəzli yanaşma sərgiləyirlər. Paris bu tədbirdə "yaşıl dünya naminə" əldə edilən nailiyyətlərin sanki Fransaya aidiyyəti yoxmuş kimi davranır, özünün iqlim fəsadlarının aradan qaldırılmasına töhfə vermək məcburiyyətinin olmamasını göstərir. Bəşəriyyətin dünyanın xilasını düşündüyü bir zamanda belə cılız ambisiyasından əl çəkməyən Fransa özündən xeyli uzaqda yerləşən və Cənubi Qafqazı koloniyasına çevirmək kimi mənfur planlarını alt-üst edən Azərbaycana qarşı ermənipərəst mövqe sərgiləyir.
COP29-un açılış mərasimindəki nitqində "Əfsuslar olsun ki, ikili standartlar, digər ölkələrə dərslər vermək adəti və siyasi riyakarlıq bəzi Qərb ölkələrindəki bir sıra siyasətçilər, dövlət nəzarətində olan QHT-lər, yalan xəbər mediası üçün fəaliyyət metoduna çevrilib" deyən Prezident İlham Əliyev yuxarıda qeyd etdiyimiz məqamlara diqqət çəkdi. Dövlət başçısı dünyanın 192 ölkəsindən Azərbaycana gələn ali səviyyəli qonaqların, iqlim aktivistlərinin iştirak etdiyi bu tədbirdə bildirdi ki, Azərbaycan COP29-a ev sahibi seçildikdən dərhal sonra ölkəmiz əlaqələndirilmiş və yaxşıca təşkil olunmuş qarayaxma və böhtan kampaniyasının hədəfinə çevrildi.
Azərbaycan haqqında yayılan qərəzli məlumatları nəzərdən keçirəndə isə o qədər absurd fikirlərlə rastlaşırsan ki, bəzən hətta söyləməyə söz belə tapmırsan. COP29-a sədrlik edən Azərbaycana qarşı hücumların səbəblərindən biri, ölkəmizə Tanrı tərəfindən bəxş edilən təbii sərvətlərin olduğunu görürsən.
Açılış mərasimində Azərbaycana qarşı absurd ittihamlarla bağlı da danışan Prezident İlham Əliyev diqqətə çatdırdı ki, iki il əvvəl Azərbaycan və Avropa Komissiyası enerji sahəsində strateji tərəfdaşlıq bəyannaməsinə imza atdılar: "Lakin bu, bizim ideyamız deyildi. Onlar bizdən yardım xahiş etdilər. Biz razılaşdıq. Əgər yardımımıza ehtiyac varsa, biz hər zaman kömək etməyə hazırıq. Dedik, yaxşı, biz enerji təhlükəsizliyində Avropaya kömək edəcəyik".
Qarşıya qoyulan hədəflərə nail olunur
COP29-a Azərbaycanın sədrlik edəcəyini bildikləri andan etibarən Fransanın başçılıq etdiyi riyakar Qərb ölkələri bizə qarşı təşkilatlanmış formada antitəbliğata start verdilər. İqlim konfransını siyasiləşdirmək cəhdləri etdilər, pulla ələ aldıqları beynəlxalq media vasitələri ilə respublikamızla bağlı olmazın yalan, iftira, böhtan xarakterli məlumatlar uydurub tirajlamağa başladılar. Necə deyərlər, öz gözlərində tiri görməyənlər Azərbaycanda xırda nöqtə axtarmağa başladılar.
Noyabrın 12-də Bakıda 80 prezident, vitse-prezident və baş nazirin iştirak etdiyi BMT-nin nüfuzlu tədbirinin açılışında dövlətimizin başçısı söylədi ki, bu gün də bizi neft dövləti adlandıranlar yaxşı olardı ki, ən azı özlərinə və Azərbaycandan 10 dəfə artıq neft hasil edən özlərinin qonşuluğundakı ölkəyə baxsınlar: "Qərbin yalan xəbər mediası, dırnaqarası müstəqil QHT-ləri və bəzi siyasətçiləri sanki ölkəmiz haqqında dezinformasiya və səhv məlumatın yayılmasında yarışa çıxıblar. Neftimizin olmasında bizi ittiham etmək bir növ Bakıda il ərzində 250-dən artıq günəşli günün olmasında bizi suçlamağa bənzəyir".
Ancaq bütün bu çirkin təbliğatlar nə Azərbaycanı haqq yolundan döndərə, nə də ölkəmizin dünyadakı nüfuzuna zərrə qədər zərbə vura bilər.
Bir neçə gündür öz işinə başlayan COP29-da artıq mühüm nailiyyətlər əldə olunub.
Beynəlxalq maliyyə korporasiyaları və bank strukturlarının açıqlamaları var ki, iqlim dəyişikliklərinin fəsadlarına qarşı mübarizə məqsədilə öz maliyyə töhfələrini artıracaqlar. Nümunə üçün deyək ki, Dünya Bankı maliyyə töhfəsini 170 milyarda çatdıracağını bildirib. Eyni zamanda COP29-un ilk günündə Paris Sazişinin 6.4 maddəsi üzrə razılaşmaya nail olunub.
Bütün bunlar onu göstərir ki, COP Bakıda qarşısına qoyduğu hədəflərə bir-bir nail olur. Bu həm də təkzibolunmaz şəkildə ortaya qoyur ki, Azərbaycanın "yaşıl səylər"i uğurlu bəhrəsini verir və eyni zamanda Qərbdə formalaşmış antiazərbaycançı şəbəkənin ölkəmizə qarşı növbəti qarayaxma kampaniyası iflasa uğradılır.
Yasəmən MUSAYEVA,
"Azərbaycan"
