Əsassız kağız parçaları ilə Azərbaycanı geri çəkilməyə vadar etmək olmaz
"Avropa Parlamentinin oktyabrın 24-də qəbul etdiyi "Azərbaycanda vəziyyət, insan hüquqlarının və beynəlxalq hüququn pozulması və Ermənistanla münasibətlər" adlı qətnaməsi ölkəmizə qarşı ikiüzlülük və riyakarlığın son həddidir. Avropa Parlamenti Azərbaycanın öz ərazilərini geri almasını, Ermənistanın dağıtdığı yaşayış məntəqələrini bərpa edərək keçmiş məcburi köçkünləri öz doğma yurdlarına qaytarmasını həzm edə bilmir".
Bu fikirləri "Azərbaycan" qəzetinə Milli Məclisin deputatı Kamran Bayramov deyib. O bildirib ki, Azərbaycan BMT Təhlükəsizlik Şurasının qətnamələrini icra edib. Qəbul etdikləri qətnamədə guya beynəlxalq hüququn pozulmasından söz açan avropalı parlamentarilər 30 ildə bir milyon azərbaycanlının pozulmuş hüquqlarından, Birinci Qarabağ müharibəsində itkin düşmüş 4 min azərbaycanlının taleyindən danışmırlar. Həmin azərbaycanlıların bir hissəsi əsir götürülərək Ermənistanda qul kimi işlədilmiş, işgəncələrə məruz qalmışdır. Azərbaycan ərazilərini işğaldan azad edəndən sonra qarşılaşdığı mina terrorundan da danışan yoxdur. Bu da həmin avropalı parlamentarilərin nə dərəcədə qərəzli və birtərəfli olmasını bariz şəkildə göstərir. Əlləri Azərbaycan xalqının qanına bulaşmış, sülh və insanlıq əleyhinə cinayətlər törətmiş şəxslərin hərbi əsir kimi qələmə verilməsi isə sadəcə riyakarlığın son həddidir. "AP-nin qətnaməsində ölkəmizin qlobal və regional səviyyədə sülhün, sabitliyin və əməkdaşlığın təmin olunması naminə irəli sürdüyü təşəbbüslərə, göstərdiyi səylərə qərəzli münasibət də diqqətdən yayınmır. Avropalı parlamentarilər hətta iqlim dəyişmələri ilə bağlı mühüm bir məsələni siyasiləşdirərək, ondan Azərbaycana qarşı ittiham aləti kimi istifadə etməkdən belə çəkinmirlər", - deyə deputat əlavə edib.
Siyasətçi qeyd edib ki, dörd il öncə Gəncədə, Bərdədə və Tərtərdə dinc insanların Ermənistan tərəfindən raket atəşinə tutularkən, yüzlərlə mülki şəxs - qadınlar, qocalar, uşaqlar məhz azərbaycanlı olduqları üçün müharibə cinayətlərinə qurban gedərkən bu riyakarların susub yalnız hadisələri seyr etdiklərini xatırlayırıq. Ancaq belə kəskin qətnamələr Ermənistana qarşı heç vaxt qəbul olunmayıb. Əksinə, Avropa İttifaqının bəzi üzvləri Ermənistanı yenidən silahlandırır, gücləndirir, ona yardım edirlər. Qərb təcavüzkar Ermənistana siyasi-mənəvi həmrəylik nümayiş etdirir. Bu faktın özü Avropa Parlamentinin, Qərb dövlətlərinin ikili standartlarından, ədalətsiz yanaşmalarından xəbər verir. Qərəzli qətnamələri qəbul edən avropalı parlamentarilər bilməlidirlər ki, 30 il ərzində Ermənistan və onun havadarlarının işğal siyasəti ilə barışmayan, sonda öz sözünü qətiyyətlə deyən, ərazi bütövlüyünü, suverenliyini bərpa edən Azərbaycanı bu cür əsassız kağız parçaları ilə geri çəkilməyə vadar etmək olmaz. Heç bir sanksiya Azərbaycanı öz milli maraqlarını qorumaqdan, ərazi bütövlüyünün, suverenliyinin keşiyində dayanmaqdan geri çəkə bilməz.
Deputat vurğulayıb ki, Fransanın və erməni lobbisinin yalan narrativləri üzərində qurulmuş bu qətnamə, əslində, maddi maraqlardan irəli gəlir: "Görünən mənzərə onu deməyə əsas verir ki, Avropa Parlamenti, ümumilikdə Avropa İttifaqı bu bölgədə sülh və sabitliyə zərbə vurmaqla məşğuldur. Məqsəd Cənubi Qafqazda yeni gərginlik yaratmaq, beləliklə, regiona nüfuz etməkdir. Azərbaycan çoxmillətli, çoxkonfessiyalı bir ölkədir. Ölkəmizdə bir çox etnik qrup var. Bu etnik qrupların bir neçəsi və onlara mənsub olan insanlar Qarabağda yaşamış erməni əhalisindən qat-qat çoxdur. Əsl reallıq ondan ibarətdir ki, Ermənistanda azərbaycanlıların sayı ermənilərin Azərbaycandakı sayından daha çox olub. Dövlət başçımızın qeyd etdiyi kimi, bu, təxminən 300 min insanı təşkil edib. Əgər rəsmi İrəvan Azərbaycanda erməni azlığı məsələsinə toxunursa, onda biz də otuz il əvvəl Ermənistandan qovulmuş azərbaycanlı azlığı məsələsini diqqətə çəkə bilərik. Ölkəmiz iki milli azlığın məsələsini, onların hüquqları və təhlükəsizliyini, o cümlədən qayıtmaq hüququnu dəfələrlə qeyd edib".
Deputat bildirib ki, azərbaycanlıların 30 il əvvəl qovulması və ermənilərin bir il əvvəl ölkəmizi könüllü şəkildə tərk etmək qərarı arasında fərqin Avropa parlamentariləri üçün əhəmiyyəti yoxdur.
Əsmər QARDAŞXANOVA,
"Azərbaycan"
