Hindistan Respublikasının Azərbaycandakı fövqəladə və səlahiyyətli səfiri Sridharan Madhusudhanan Lənkəran rayonuna səfər edib. Səfər çərçivəsində xarici diplomat Lənkəran Şəhər İcra Hakimiyyətinin başçısı Taleh Qaraşovla görüşüb.

T.Qaraşov Hindistan səfirinə Lənkəranın tarixi, coğrafi mövqeyi, turizm potensialı, ictimai-siyasi həyatı və sosial-iqtisadi potensialı barədə ətraflı məlumat verib, rayonun Hindistanla qarşılıqlı iqtisadi və mədəni əməkdaşlığının perspektivləri barədə müzakirələr aparıb.

Səmimi görüşə və xoş sözlərə görə ŞİH-nin başçısına təşəkkür edən  diplomat ölkələrimiz arasında iqtisadi münasibətlərin inkişafı baxımından böyük potensialın olduğunu vurğulayıb. Diplomat turizm sahəsində əməkdaşlığa toxunaraq, Azərbaycana xeyli sayda hindistanlı turistin səfər etdiyini, xalqlarımız arasında əlaqələrin qədim tarixə malik olduğunu bildirib, Lənkəranın böyük turizm imkanlarından danışıb. Səfir Lənkəranda "Yoqa festivalı"nın  keçirilməsi, eləcə də Hindistan rəqslərinin lənkəranlılara canlı nümayiş etdirilməsi ilə bağlı arzusunu açıqlayıb. 

Görüşdə Hindistan səfirinə xatirə hədiyyəsi təqdim olunub.

Hindistanlı diplomat səfər çərçivəsində Lənkəran Tarix Diyarşünaslıq Muzeyini, "Laran" MMC-nin qənnadı məhsullarının istehsalı müəssisəsini, İstisu qəsəbəsindəki "Yaşıl çay" plantasiyasını və fabrikini, habelə "Kiçik Bazar" məscidini ziyarət edib.

S.CAVADOV,

"Azərbaycan"