Azərbaycan müstəqil, təhlükəsiz, daim inkişaf edən, region və dünya üçün sülh və rifah təşəbbüsləri ilə çıxış edən bir dövlətə çevrilib. Məlumdur ki, bir çox qüvvələr dövlətimizin güclü, müstəqil, suveren olmasını istəmir. Bunun üçün onlar Azərbaycana qarşı qarayaxma kampaniyaları aparırlar, ki özü də bir qrup manqurtun vasitəsilə. Bununla yanaşı, ölkəni daxildən parçalamaq, onu zəiflətmək üçün planlar qururlar. Əfsuslar olsun ki, onlar daxildə xəyanətkar insanlar da tapırlar. Belələrinin vasitəsi ilə, öz çirkin əməllərini reallaşdırmağa cəhd edirlər. Heç bir nəticə əldə etməyəndə, təsir dairələri getdikcə azalanda isə, daha qatı şəkildə və bizim heç bir dəyərimizə, eyni zamanda, nə milli, nə də beynəlxalq qanunvericiliyə uyğun olmayan ailə və şəxsi həyata təsir edən metodlardan istifadə edirlər. Bu, bir qrup manqurt dəstəsi üçün nə şəxsi toxunulmazlıq, nə ailə dəyərləri, nə də dövlətçilik anlayışı yoxdur. Amma həmin dairələr anlamırlar ki, xalq öz prezidentinə inanır, onun ətrafında sıx birləşib. İnsanlar yaxşı dərk edirlər ki, 20 Yanvar günündə, Anım Günündə etiraz aksiyası keçirmək istəyən bir dəstə dövlətinə, xalqına, onun azadlıq və bütövlük ideyalarına, şəhidinə hörmət qoymayıb. Onların əsas məqsədi hakimiyyəti gözdən salmaqdır. Lakin anlamırlar ki xalqımız Prezident İlham Əliyevin ətrafında birləşib onun siyasi iradəsinə və müdrik idarəetmə bacarığına bələddir.
Bu gün Azərbaycan dünyanın ən güclü dövlətləri ilə bir sırada dayanır. Dünyada sülh və təhlükəsizliyin təmin edilməsinə mühüm töhfə verir. Buna sevinmək, fəxr etmək əvəzinə, bir qrup xəyanətkar ölkə rəhbərinə qarşı təxribat törətməyə cəhd edir. Bu günlərdə Vaşinqtonda öz Vətənini yad maraqlar naminə satan və özlərini “müxalifət” adı altında gizlədən bir qrup manqurt, Azərbaycan Prezidenti İlham Əliyevin qaldığı otelə doğru irəliləməyə cəhd göstərib. Onlar bu çirkin hərəkətlərini Azərbaycanın rəhbərliyinə qarşı nalayiq şüarlar və təhqirlərlə göstəriblər. Amma tez bir zamanda dövlət başçısının mühafizə xidmətinin operativ müdaxiləsi ilə təxribatın qarşısı alınıb. ABŞ-da söz azadlığı demokratların, lobbi qruplarının, o cümlədən erməni lobbilərinin əlində bir alətə çevrilib. Onlar Azərbaycana və Prezidentin mühafizə xidmətinə qarşı qarayaxma kampaniyasına ilk qoşulanlar sırasında olublar. Təsadüfi deyil ki, bu aqressiv və mənəviyyatsız təxribatı ilk dəstəkləyənlərdən biri Amerikanın Erməni Milli Komitəsi (ANCA) və onun nümayəndələri olub. Bu hadisədə ən absurd fikirlər səsləndirən isə Frank Pallonedir. Bakıda susan bu şəxs indi “muzdlu quldurların etirazçılara hücum etdiyini” iddia edir və ABŞ hakimiyyətini Azərbaycan nümayəndə heyətinə qarşı tədbir görməyə çağırır.
Açıq-aydın görürük ki, təxribatçılar, dövlətimizə qarşı fəaliyyət göstərən dairələr və erməni lobbi strukturları koordinasiyalı şəkildə fəaliyyət göstərirlər. Onların məqsədi qalmaqal yaratmaq, sabitliyi pozmaq və Azərbaycanı gözdən salmaqdır. Münhendə heç bir nəticə əldə etməyən bəzi dairələr, bu dəfə Amerikada təxribata əl atdılar. Lakin yenə də heç nəyə nail ola bilmədilər.
Baş vermiş hadisə bir daha onların əsl satqın simasını üzə çıxardı. Öz dövlətinə, xalqına qarşı xəyanət edənlər layiqli cəzalarını alacaqlar. Hansı mövqedə olmağından asılı olmayaraq, cinayətkarlar mütləq öz cəzasına çatacaqdır.
Hicran HÜSEYNOVA,
Milli Məclisin Ailə, qadın və uşaq məsələləri komitəsinin sədri, professor
