Hayastana etibar yoxdur

İrəvan həm sülhdən danışır, həm də təcavüzkar siyasətini davam etdirir

"Ermənistan tarixən başqa dövlətlər tərəfindən idarə edilən, özgələrin diktəsi ilə hərəkət edən, öz siyasi dəst-xəti, dövlətçilik tarixi olmayan ölkədir. Təcavüzkar dövlətin rəhbərlərinin sözü ilə əməlləri heç vaxt üst-üstə düşməyib. İstər Azərbaycan torpaqları işğal altında olduğu dövrdə, istərsə də indi Ermənistanda hakimiyyətdə olanlar həmişə sülhdən, dostluqdan, demokratik hüquq normalarına sadiqlikdən danışsalar da, onlar çirkin əməllərini, təcavüzkar siyasətlərini davam etdiriblər".

Bu sözləri "Azərbaycan" qəzetinə Milli Məclisin Aqrar siyasət komitəsinin sədri Tahir Rzayev deyib. Komitə sədri bildirib ki, onlar bu hərəkətlərini hazırda da davam etdirirlər. Ermənistanın baş naziri Nikol Paşinyan bütün çıxışlarında, beynəlxalq görüşlərdə Ermənistanın sülhə sadiqliyindən, qonşuluq əlaqələrindən danışır, ancaq arxada himayədarlarının köməyi ilə öldürücü silahlar alır, revanş götürmək üçün planlar hazırlayır. Əlbəttə ki, sülh əleyhinə olan bu hərəkətlər, xüsusilə, son günlərdə mövqelərimizin atəşə tutulması, eləcə də bəzi erməni siyasətçilərin fikirləri, Ermənistanı dəstəkləyən ölkələrin hərəkətləri təcavüzkar dövlətin sülhə sadiq olmadığını göstərir. "Paşinyan sülh müqaviləsinin imzalanmasına hazır olduğunu, irəli sürülən şərtləri qəbul etdiyini dediyi halda, əslində, sülhün əleyhinə gedir və gözləmə mövqeyi tutur, vaxt qazanmaq istəyir. Xarici ölkələrdən silahlar alır, Avropa İttifaqı "müşahidə missiyası" üzvlərinin sayını artırır. Bunun səbəbləri isə aydındır. Ermənistan başqalarının dediyi ilə oturub-durur və onların tapşırıqlarını yerinə yetirir. Bir tərəfdən, Qərbin yürütdüyü siyasət, qurduğu planlar, Avropa İttifaqının diktəsi, Fransanın Ermənistanı əlində oyuncaq kimi istifadəsi, digər tərəfdən, Rusiyaya meyillənmək Ermənistanı çıxılmaz vəziyyətə salıb və belə vaxtda onun qəti fikrə gəlib sülh müqaviləsinə imza atması çox çətindir", - deyə T.Rzayev əlavə edib. 

Komitə sədri Prezidentin çıxışlarını xatırladaraq deyib ki, İlham Əliyev dəfələrlə Azərbaycanın sülhə sadiq olduğunu, ancaq irəli sürdüyü şərtlərin mütləq Ermənistan tərəfindən qəbul edilməli olduğunu bildirib. Yalnız bundan sonra sülh müqaviləsi imzalana bilər. Bu şərtlər hər birimizə yaxşı məlumdur. İlk növbədə, Ermənistan rəhbərliyi özündə cəsarət tapıb konstitusiyasında dəyişiklik etməli, Azərbaycana qarşı ərazi iddialarını Əsas Qanununda aradan qaldırmalı və ATƏT-in Minsk qrupunun ləğvinə razılıq verməlidir. Zəngəzur dəhlizi açılmalıdır. Bütün bunlar, sözsüz ki, münasibətlərin normallaşmasına, sülhün bağlanmasına imkan yarada bilər. Ölkəmizin rəhbəri onu da bildirmişdir ki, hələ bundan sonra Cənubi Qafqazda sülhün nizamlanması prosesində müəyyən çətinliklər mövcud olacaq. Çünki Ermənistan tərəfindən sabitliyə, təhlükəsizliyə təminat yoxdur. Onun havadarları regionda sabitliyin yaradılmasının əleyhinədirlər. Burada öz maraqlarını qorumaq, möhkəmləndirmək üçün bütün vasitələrdən istifadə edirlər. Bu vasitə isə Ermənistan və siyasi hakimiyyətidir. Ona görə də erməni dövlətinə, rəhbərliyinə etibar etmək mümkün deyil. 

Deputat bildirib ki, atəşkəsin pozulması, eləcə də Aİ müşahidəçilərinin şərti sərhəddə Azərbaycan mövqelərini izləməsi, müəyyən təxribatlar törətmək üçün yollar axtarmaları göstərir ki, Qərbin təhriki ilə Ermənistan, əslində, sülhü deyil, müharibəni üstün tutur: "Ancaq dəfələrlə bildirilib ki, bu, Ermənistan üçün ağır nəticələnə bilər.  O nə qədər silahlansa da, havadarlarına arxayın olsa da, yenə Azərbaycandan qat-qat zəifdir. Azərbaycan Ordusu güclüdür, iqtisadiyyatı möhkəmdir, xalq birdir. Ermənistanda isə bunun tamamilə əksi müşahidə olunur. Bu ölkə iqtisadi cəhətdən çöküb, birlik yoxdur, orduda çaxnaşmalar var və belə bir halda İrəvanın müharibə etmək cəhdi onun tamamilə məhv olması, dövlət kimi silinməsi deməkdir. Zaman Ermənistanı çıxılmaz vəziyyətə salıb, bu da sözsüz ki, rəhbərliyinin səriştəsizliyindən, ikiüzlülüyündən, reallıqları qəbul etməməsindən, eləcə də başqa dövlətlərin kölgəsinə sığınmaqdan irəli gəlir". 

T.Rzayev vurğulayıb ki, Ermənistan hakimiyyəti, dövləti idarə edənlər özlərində qətiyyət tapıb, dövrün reallıqlarını nəzərə alıb mütləq Azərbaycanla sülh sazişini imzalamalıdırlar. Son zamanlar bir çox siyasətçilər haqlı olaraq bildirirlər ki, Azərbaycanla sülh müqaviləsinin bağlanmaması Ermənistanın məhvi deməkdir. Onlar müəyyən məsələlərə aydın başla, sağlam düşüncə ilə yanaşırlar. Paşinyan dönə-dönə fikirləşməli və öz mənfur niyyətindən əl çəkməli, havadarlarına arxalanmamalı, dövlətinin yaşaması üçün Azərbaycanla münasibətlərin yaxşılaşmasına cəhd göstərməli və sülhə imza atmalıdır.

Əsmər QARDAŞXANOVA,

"Azərbaycan"