Bütün hallarda son sözü gürcü xalqı deyəcək
Bu gün Gürcüstanda keçirilən parlament seçkilərinin hökumətin hansı qüvvələrdən formalaşacağı, daha doğrusu, ölkənin Avropaya inteqrasiya kursu götürəcəyi, yoxsa milli maraqlar naminə inkişaf yolunun davamını seçəcəyi baxımından əhəmiyyəti böyükdür.
Bəri başdan qeyd edək ki, bu seçkilərin nəticələri Azərbaycan üçün də önəmlidir. Çünki qonşu və dost Gürcüstanla Azərbaycan arasında əməkdaşlıq siyasi və iqtisadi baxımdan özünü hər zaman daha çox müsbət tərəfdən göstərib. Amma nə edəsən ki, Gürcüstandakı bugünkü seçkilər xarici qüvvələr tərəfindən "geosiyasi seçim" oyununa çevrilib ki, bu da cəmiyyətdə qütbləşməyə səbəb olub. Təbii ki, ölkədə yaranmış bu vəziyyətə görə məsuliyyət təkcə hakimiyyətin deyil, həm də müxalif partiya liderlərinin üzərinə düşür. Ona görə də qonşu dövlətin gələcək inkişaf yolu ilə bağlı fikir ayrılıqları hələ də mövcuddur.
Bütün bu proseslər fonunda Azərbaycan-Türkiyə-Gürcüstan üçtərəfli işbirliyi regionun ən davamlı əməkdaşlıq nümunəsi kimi inkişaf edir. Bu əməkdaşlığın təməli genişmiqyaslı iqtisadi layihələrlə qoyulub. Üç ölkə arasındakı mövcud işbirliyi bərabərhüquqlu tərəfdaşlıq, qarşılıqlı fayda və ümumi mənfəət prinsipləri üzərində qurulub. Azərbaycan-Türkiyə münasibətləri məlumdur. Biz qardaşıq və aramıza heç kim girə bilməz. Türkiyə-Gürcüstan münasibətləri də dostluq, qonşuluq, qarşılıqlı inam və maraq çərçivəsində möhkəm və sarsılmazdır. O ki qaldı Azərbaycan-Gürcüstan münasibətlərinə, bu iki xalqın Heydər Əliyev və Eduard Şevardnadze tərəfindən ən yüksək səviyyəyə çatdırılan tarixi dostluq münasibətlərinin üzərinə illərin dolanbacı, keşməkeşi kölgə sala bilməyib. Sonrakı illər bu münasibət strateji tərəfdaşlıq səviyyəsinə qədər yüksəlib. Gürcüstan-Azərbaycan münasibətləri təkcə iqtisadi deyil, həm də siyasi, hərbi, təhsil, humanitar və digər sahələrdə uğurla inkişaf edir. Prezident İlham Əliyevin Gürcüstanın indiki hakimiyyəti ilə sıx əməkdaşlıq əlaqələri mövcuddur ki, bu da bölgədə sülhün və əmin-amanlığın möhkəm və etibarlı təminatıdır. Bu təminatın hesabına iki ölkənin iştirakı ilə həyata keçirilən bütün layihələr dostluq və əməkdaşlıq baxımından dünya üçün nümunədir.
Gürcüstanda inkişafın və sabitliyin davam etməsi "Gürcü Arzusu" partiyasının strateji hədəfidir. Bu hədəf təbii ki, qonşumuzun xoş niyyətindən irəli gəlir, Cənubi Qafqaz xalqlarının rifahının yaxşılaşdırılması yönümündə yeritdiyi sülh və əmin-amanlıq siyasətindən doğur. Sirr deyil ki, aylardır Gürcüstanda Qərbin dəfələrlə sınaqdan keçirdiyi "rəngli inqilab" ssenarisinin təkrarlanacağı ehtimal olunurdu. Qərb mediası tərəfindən seçkidə saxtakarlıq olacağı haqqında məlumatların dövriyyəyə buraxılması, müxalif qüvvələr tərəfindən seçkinin nəticəsinin tanınmaması, kütləvi iğtişaşlar törədilməsi kimi amillərin ola biləcəyini hesablayan iqtidar əvvəldən belə cəhdlərin qarsına sədd çəkdi. "Xarici təsirin şəffaflığı haqqında" qanunun qəbulu isə həm Qərbi, həm də müxalifəti tərkisilah etdi.
Amma qonşu ölkədə müxalif olmayan siyasi partiyalar da var. Onlar Gürcüstanın ərazi bütövlüyünü dəstəkləyir, ölkədə sabitliyin daimi olmasına çalışırlar. Bu partiyalar çox aydın dərk edirlər ki, Qərb həqiqətən Gürcüstanın maraqlarını qorumuş olsaydı, Abxaziya və Cənubi Osetiya məsələsi bu qədər uzanmazdı. Qərbin öz siyasətini əsasən vədlər üzərində qurmasını da gürcü xalqı yaxşı bilir və bu səbəbdən ona inanmır.
Gürcüstanda yaşayan azərbaycanlılara gəldikdə, soydaşlarımız ağı qaradan seçməyi yaxşı bilirlər. İndiyə qədər keçirilən bütün seçkilərin nəticələri sübut edir ki, çox zaman azərbaycanlıların səsi həlledici olur. Bugünkü parlament seçkilərində müxtəlif siyasi partiyaların siyahısında 13 azərbaycanlı namizəd var. Təbii ki, oların parlamentdə təmsil edilməsi icma olaraq soydaşlarımızın xeyrinədir. Ona görə də ayıq-sayıq Gürcüstan vətəndaşları, sağlam düşüncəli azərbaycanlılar kimi başa düşürlər ki, bu seçki tarixi hadisədir. Bilirlər ki, hazırkı hakimiyyətə qarşı ittihamlar, sanksiya təhdidləri ilə gərginliyi artıqmağa çalışan xarici qüvvələrin əlində oyuncaq olmamaq üçün seçkidə ədalətli mövqe nümayiş etdirmək lazımdır.
Züleyxa ƏLİYEVA,
"Azərbaycan"
