Acarıstan Muxtar Respublikası ərazisində dərc olunan və geniş oxucu auditoriyasına malik ajaratimes.ge portalında "20 Yanvar - Azərbaycan xalqının qanla yazılmış tarixi" sərlövhəli məqalə dərc olunub.
AZƏRTAC xəbər verir ki, məqalədə 1980-ci illərin sonlarında SSRİ-də baş verən ictimai-siyasi proseslər, imperiyanın zəifləməsi fonunda Azərbaycanda milli oyanış hərəkatının sürətləndiyi qeyd olunub. Bildirilib ki, Ermənistanın Azərbaycana qarşı əsassız ərazi iddiaları, Dağlıq Qarabağ münaqişəsinin başlanması və mərkəzi hökumətin qərəzli mövqeyi xalqın narazılığını daha da artırdı.
Məqalədə qeyd olunub ki, 1990-cı il yanvarın 20-də sovet ordusunun Bakıda, sonrakı günlərdə isə Azərbaycanın bölgələrində törətdiyi amansız qırğınlar törədilib. Günahsız insanlar, o cümlədən qadınlar, uşaqlar və yaşlılar həlak olublar.
20 Yanvar hadisələrinə ilk obyektiv və siyasi-hüquqi qiymətin Ümummilli Lider Heydər Əliyev tərəfindən verildiyi məqalədə xüsusi vurğulanıb. Bildirilib ki, 1990-cı il yanvarın 21-də Moskvada Azərbaycanın Daimi Nümayəndəliyində çıxış edən Heydər Əliyev bu qanlı əməliyyatı SSRİ rəhbərliyinin cinayəti adlandırıb.
Məqalədə bir fikir xüsusi olaraq vurğulanır ki, 20 Yanvar təkcə böyük faciə deyil, həm də Azərbaycan xalqının sarsılmaz iradəsinin göstəricisidir.
“20 Yanvar şəhidləri Şəhidlər xiyabanında dəfn olunub. Hər il 20 yanvarda minlərlə insan xiyabanı ziyarət edir və şəhidlərin xatirəsinə ehtiramını bildirir. Dövlət bayraqları endirilir və ölkədə milli matəm hökm sürür”, - deyə məqalədə vurğulanıb.
19 (1)jpg_1771885865.jpg)
