Müasir dövrdə dövlətlərin dayanıqlı inkişafı, milli təhlükəsizliyinin qorunması və qlobal rəqabət mühitində uğurla mövqe tutması bilavasitə gənclərin intellektual, mənəvi və vətənpərvərlik potensialından asılıdır. Bu baxımdan, Azərbaycan Respublikasında gənclər siyasəti dövlət siyasətinin prioritet istiqamətlərindən biri kimi formalaşmış və Prezident İlham Əliyevin rəhbərliyi ilə yeni, müasir və sistemli mərhələyə qədəm qoymuşdur.
Bu siyasətin mərkəzində milli maraqlara sadiq, dövlətinə bağlı, təşəbbüskar və fəal gənclik dayanır. Azərbaycan gəncliyi Prezident İlham Əliyevin həyata keçirdiyi müstəqil, praqmatik və milli maraqlara əsaslanan siyasəti ardıcıl şəkildə dəstəkləyir, ölkənin sosial-iqtisadi, siyasi və mədəni inkişafında fəal iştirak edir. Gənclərin dövlət başçısına göstərdiyi bu dəstək təsadüfi deyil, uzunmüddətli və məqsədyönlü dövlət siyasətinin məntiqi nəticəsidir.
Qeyd edək ki, uğurlu gənclər siyasətinin nəticəsində bu sahədə normativ-hüquqi baza təkmilləşdirilmiş və ardıcıl dövlət proqramı icra olunmuşdur. "Gənclər siyasəti haqqında" Azərbaycan Respublikasının Qanunu, gənclərin sosial müdafiəsinin gücləndirilməsi, onların məşğulluğunun təmin edilməsi və ictimai fəallığının artırılması istiqamətində atılan addımlar bu siyasətin əsas sütunlarını təşkil edir. Prezident İlham Əliyevin imzaladığı fərman və sərəncamlar gənclərin dövlət idarəçiliyində, ictimai həyatda və qərarların qəbulunda fəal iştirakına geniş imkanlar açmışdır. Dövlət başçısı gəncləri yalnız gələcəyin deyil, eyni zamanda bu günün əsas aparıcı qüvvəsi kimi qiymətləndirərək, onlara etimad göstərmişdir.
Azərbaycan gəncliyi Prezident İlham Əliyevin daxili və xarici siyasət kursunu dəstəkləməklə yanaşı, bu siyasətin mahiyyətini dərindən dərk edir və ictimai müstəvidə fəal şəkildə təbliğ edir. Gənclər ölkədə sabitliyin, təhlükəsizliyin və inkişafın alternativsiz olduğunu anlayaraq, güclü liderlik institutunun əhəmiyyətini xüsusi vurğulayırlar. Prezident İlham Əliyevin beynəlxalq münasibətlər sistemində Azərbaycanın milli maraqlarını qətiyyətlə müdafiə etməsi, müstəqil və balanslaşdırılmış xarici siyasət yürütməsi gənclərdə yüksək rəğbət doğurur. Onlar Azərbaycanın beynəlxalq nüfuzunun artmasını, regional və qlobal təşəbbüslərdə fəal iştirakını dövlət başçısının uzaqgörən siyasətinin nəticəsi kimi qiymətləndirirlər.
2020-ci ildə baş vermiş Vətən müharibəsi Azərbaycan gəncliyinin Prezident İlham Əliyevin ətrafında necə sıx birləşdiyini əyani şəkildə nümayiş etdirdi. Gənclər həm ön cəbhədə, həm də arxa cəbhədə misilsiz fədakarlıq göstərərək, Ali Baş Komandanın çağırışlarını böyük ruh yüksəkliyi ilə qarşıladılar. Gənclər Prezidentin siyasi iradəsinə, qətiyyətinə və ədalətli mövqeyinə tam inam nümayiş etdirdilər. Qələbədən sonrakı mərhələdə işğaldan azad edilmiş ərazilərdə aparılan bərpa və quruculuq işlərində gənclərin fəal iştirakı Prezident İlham Əliyevin müəyyən etdiyi milli birlik strategiyasının uğurla reallaşdığını təsdiqləyir. Könüllülük hərəkatı, sosial təşəbbüslər və ictimai fəallıq gənclərin dövlət başçısına mənəvi dəstəyinin real təzahürüdür. Prezident İlham Əliyevin siyasətində təhsil və insan kapitalının inkişafı xüsusi yer tutur. Gənclərin bilik və bacarıqlarının artırılması, müasir texnologiyalara yiyələnməsi, beynəlxalq təhsil məkanına inteqrasiyası dövlət siyasətinin əsas hədəflərindəndir. Yeni məktəblərin, ali təhsil müəssisələrinin yaradılması, təhsil infrastrukturunun yenilənməsi və xaricdə təhsil proqramları gənclərin intellektual potensialının gücləndirilməsinə xidmət edir.
İnnovasiya, rəqəmsallaşma və startap ekosisteminin inkişafı gənclərin iqtisadi fəallığını artırmaqla yanaşı, onların ölkənin strateji inkişaf proseslərində rolunu möhkəmləndirir. Gənclər bu siyasəti Prezident İlham Əliyevin gələcəyə hesablanmış və davamlı inkişaf strategiyası kimi qiymətləndirir və dəstəkləyirlər. Prezident İlham Əliyevin gənclərlə bağlı siyasətində milli-mənəvi dəyərlərin qorunması və təbliği mühüm yer tutur. Gənclərin tarixini, mədəniyyətini, dilini və dövlətçilik ənənələrini dərindən bilməsi dövlət başçısı tərəfindən daim vurğulanır. Bu çağırışlar gənclərin milli kimliyinin möhkəmlənməsinə, vətəndaşlıq məsuliyyətinin artmasına xidmət edir.
Gənclər Prezidentin müəyyən etdiyi ideoloji xəttə uyğun olaraq, milli maraqları qorumağı, dövlətə sədaqəti və ictimai məsuliyyəti öz fəaliyyətlərinin əsas prinsipi kimi qəbul edirlər. Beləliklə, Azərbaycan Prezidenti İlham Əliyevi dəstəkləyən gənclər ölkənin ictimai-siyasi həyatında mühüm rol oynayan, dövlətçilik düşüncəsinə malik, milli maraqlara sadiq və fəal bir nəsli təmsil edir.
Prezident İlham Əliyevin həyata keçirdiyi məqsədyönlü və uzaqgörən siyasət gənclərin dövlətə və liderə olan inamını daha da gücləndirmişdir. Azərbaycan gəncliyi dövlət başçısının ətrafında sıx birləşərək, müstəqil, güclü və suveren ölkəmizin inkişafına bundan sonra da öz töhfəsini verəcəkdir. Bu həmrəylik və qarşılıqlı etimad ölkənin sabitliyinin, davamlı inkişafının və parlaq gələcəyinin əsas təminatıdır.
Şahin SEYİDZADƏ,
Milli Məclisin deputatı
