Gəncədə 2025-ci ilin sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağı keçirilmişdir. Ulu Öndər Heydər Əliyevin abidəsini ziyarətlə və şəhərin sənaye müəssisələrində istehsal olunan məhsullardan ibarət sərgiyə baxışla başlayan yığıncaqda öncə şəhər icra hakimiyyətinin başçısı Niyazi Bayramov çıxış etmişdir.
Bildirmişdir ki, 2025-ci il sosial və iqtisadi vəzifələrin icrası, nəzərdə tutulmuş proqramların reallaşdırılması, ictimai-siyasi sabitliyin möhkəmləndirilməsi və beynəlxalq nüfuzun artırılması baxımından Azərbaycan üçün uğurlu olmuşdur: "Ümummilli Lider Heydər Əliyevin müəyyən etdiyi siyasi kursu davam etdirən Prezident İlham Əliyevin həyata keçirdiyi sistemli islahatlar və atdığı qətiyyətli addımlar nəticəsində ölkənin dayanıqlı inkişafı davam etmişdir". Bu ilin Gəncə üçün daha əlamətdar olduğunu deyən N.Bayramov ötən ilin avqust və sentyabr aylarında Prezident İlham Əliyevin və Birinci vitse-prezident Mehriban xanım Əliyevanın şəhərə səfərlərinin ictimaiyyət arasında ruh yüksəkliyi yaratdığını vurğulamışdır.
M.Bayramov diqqətə çatdırmışdır ki, qədim mədəniyyəti və zəngin tarixi olan Gəncə 2025-ci ildə Müstəqil Dövlətlər Birliyinin "İdman paytaxtı" seçilmişdir: Keçən il Gəncə və daha 6 şəhər - Şəki, Qəbələ, Yevlax, Mingəçevir, Göygöl və Xankəndi III MDB Oyunlarına evsahibliyi etmişdir. 10 gün davam edən yarışlara MDB ölkələri ilə yanaşı, Türkiyə, Pakistan və digər ölkələrdən ümumilikdə 2400 nəfərlik idman nümayəndə heyəti də qatılmışdır.
Sonra şəhər icra hakimiyyəti başçısının müavini Adil Tağıyev hesabat məruzəsi ilə çıxış etmişdir. Bildirmişdir ki, il ərzində şəhərin iqtisadi göstəriciləri artmış, yeni istehsal sahələri yaradılmış və yeni iş yerləri açılmışdır.
Hesabat yığıncağında Gəncə-Daşkəsən Regional Təhsil İdarəsinin rəisi Elçin Kərimov, Azərbaycan Dövlət Turizm Agentliyinin Gəncə Regional Turizm İdarəsinin rəisi Fariz Qarayev, "Azəriqaz" İstehsalat Birliyinin Gəncə Regional Qaz İstismar İdarəsinin rəisi Hüseyn Şirinov, "Azərişıq" ASC-nin Qərb Regional Enerji Təchizatı və Satışı İdarəsinin Gəncə Elektrik Şəbəkəsinin rəisi Elgün Qafarov, Azərbaycan Dövlət Su Ehtiyatları Agentliyinin "İri Şəhərlərin Birləşmiş Su Təchizatı Xidməti" PHŞ-nin Gəncə Şəhər Sukanal İdarəsinin rəisi Şöhrəddin Verdiyev, "Azəralüminium" MMC-nin direktorunun birinci müavini Oqtay Rəfiyev, Gəncə Avtomobil Zavodu İstehsalat Birliyinin direktoru Amin Əliyev, "Rövşən Oğuz" Qrup MMC-nin baş direktoru Hafiz Mustafayev və şəhid Mirhüseyn Seyidzadənin atası Miryunis Seyidzadə çıxış etmişlər.
Sonda il ərzində şəhərin ictimai-siyası həyatında və abadlıq-quruculuq sahələrində göstərdikləri səmərəli fəaliyyətə görə bir qrup şəxsə Gəncə Şəhər İcra Hakimiyyətinin "Təşəkkürnamə"ləri təqdim olunmuşdur.
Sabir ƏLİYEV,
"Azərbaycan"
