Fransa sentyabr ayından etibarən 15 yaşdan kiçik uşaqların sosial mediaya çıxışını qadağan edəcək. Plan azyaşlı uşaqları təhlükəli məzmundan və ekran asılılığı inkişaf riskindən qorumaqdır.
Fransa bu cür qadağanı tətbiq edən ilk Avropa İttifaqı ölkəsi olacaq. Müvafiq qanun layihəsi çərşənbə axşamı parlamentdə təsdiqlənib və sentyabr ayında qüvvəyə minməsi planlaşdırılır. Milli Assambleyanın 279 üzvü qanun layihəsinin lehinə, 81 üzvü isə əleyhinə səs verib.
Qaydaların iki mərhələdə tətbiq olunması gözlənilir: Sentyabrın 1-dən etibarən 15 yaşdan kiçik uşaqların yeni hesablar yaratması qadağan ediləcək və qadağa 2027-ci ildən etibarən mövcud hesablara da şamil olunacaq. Prezident Emmanuel Makron planlaşdırılan dəyişiklikləri ikinci müddətinin flaqman islahatı adlandıraraq onların tez bir zamanda tətbiqini asanlaşdıracağını vəd edib.
Səsvermədən əvvəlki müzakirələr zamanı uşaqları sosial mediada sərbəst gəzmək risklərindən qoruyan qanun layihəsinin mətni "Yenilməyən Fransa" istisna olmaqla partiyaların əksəriyyəti tərəfindən təsdiqlənib. Ümumi qadağa əvəzinə zərərli xüsusiyyətlərin deaktiv edilməsini müdafiə edən sosialistlər tərəfsiz qalıblar.
Bu arada Aİ bu məsələdə geri getməyə hazırlaşır və yaş həddini 13-ə endirməyi təklif edir. Mövzu ilə bağlı hesabat ötən həftə Avropa Komissiyasının rəhbəri tərəfindən təqdim olunub. Hesabatda 13 yaşdan kiçik uşaqların sosial mediadan yalnız məhdud müddət ərzində valideynlərin, qəyyumların və ya müəllimlərin nəzarəti altında istifadə etmələri təklif edilir. Daha böyük yeniyetmələr platformanın təqdim etdikləri məzmunun təhlükəsizliyi ilə bağlı zəmanətləri altında sosial mediadan istifadə edə biləcəklər.
Hazırda dünyanın təxminən 20 ölkəsi uşaqlar üçün sosial media qadağaları tətbiq edib və ya yaxın gələcəkdə bunu etməyi planlaşdırır.
Qayanada bərə qəzasında ölənlərin sayı artıb
Qayananın sahillərində bərənin çevrilməsi nəticəsində ən azı 53 nəfər ölüb. “MV Barima” gəmisi iyulun 18-də axşam saatlarında paytaxt Corctaundan Birima-Vayni rayonundakı Port Kaytuma qəsəbəsinə gedərkən çevrilib. Bu barədə iyulun 22-də Baş nazir Mark Filips məlumat verib.
Hökumət başçısının dediyinə görə, sağ qalanların intensiv axtarışı yalnız bazar günü səhər tezdən başlayıb və indiyə qədər 76 nəfər xilas edilib. Hakimiyyət orqanları əvvəllər 27 nəfərin öldüyünü bildirmişdi, lakin bu rəqəm sonradan 41-ə çatmışdı. Sərnişinlərin sayı ilə bağlı da qarışıqlıq olub: sərnişin siyahısında əvvəlcə 133 nəfər var idi, lakin faciə zamanı gəmidə 179 nəfərin olduğu dəqiqləşdirilib. Buna görə də daha 50 nəfərin taleyi məlumsuz olaraq qalır və o səbəbdən ölənlərin sayı arta bilər.
Qayanın Baş naziri jurnalistlərə bildirib ki, hadisədən sonra sağ qalan kapitan da daxil olmaqla, köhnə bərənin iki heyət üzvünün marixuana testi müsbət çıxıb.
VesselFinder gəmiçilik veb saytına görə, “MV Barima” 1939-cu ildə inşa edilib. Adətən, bu cür gəmilər əvvəlcə Atlantik okeanında üzür, sonra sıx tropik meşənin dərinliyində yerləşən Port Kaytuma qəsəbəsinə çatmaq üçün çaya girirlər.” MV Barima” 24 saatlıq səyahətinə günortadan sonra başlayıb və təxminən 8 saat keçdikdə təcili yardım siqnalı alınıb. Sağ qalan sərnişinlərdən biri News Source xəbər portalına bildirib ki, yüksək səs eşidib və gəminin içərisində suyun axdığını görüb. Daha sonra bərə batmağa başlayıb. Hakimiyyət orqanlarının məlumatına görə, axtarış-xilasetmə əməliyyatı zamanı gəmi sahildən təxminən 15 kilometr aralıda dənizin dibində aşkar edilib.
Prezident Məhəmməd İrfaan Əli televiziya çıxışında deyib: "Millətə zəmanət verirəm ki, bu faciə ilə bağlı tam, hərtərəfli və müstəqil araşdırma aparılacaq".
Məlumat üçün bildirək ki, Qayana Cənubi Amerikanın şimal-şərqində yerləşən kiçik ingilisdilli ölkədir. Neftlə zəngin Essekibo bölgəsi üzərində qonşu Venesuela ilə ərazi mübahisəsi mövcuddur.
Rizvan CƏFƏROV,
"Azərbaycan"
