Fransa vəhşi təfəkkürə görə Ermənistandan geri qalmır

"Fransada Azərbaycanofob və islamofob meyillər gündən-günə dərinləşir. Ölkəmizə qarşı davam etdirilən qərəzli münasibət Azərbaycan-Fransa münasibətlərinə də mənfi təsir göstərir. Ermənistana hərbi dəstək göstərməklə regiona sülhün gəlməsini əngəlləyən Makron hökuməti İrəvanın beynəlxalq güclərin hərbi poliqonuna çevrilərək məhv olmasına real zəmin yaradır".
Bu fikirləri "Azərbaycan" qəzetinə açıqlamasında Milli Məclisin deputatı Azər Badamov deyib. Deputat bildirib ki, iki ölkə arasında vəziyyət o səviyyəyə çatıb ki, Azərbaycan-Fransa parlamentlərarası işçi qrupları da fəaliyyətlərini dayandırıblar. 
"Torpaqlarımızın 20 faizinin Ermənistan tərəfindən işğal olunduğu dövrdə beynəlxalq hüququn gücünə inanan Azərbaycan Fransanın da təmsil olunduğu ATƏT-in Minsk qrupuna ümid bəsləyirdi. BMT TŞ-nin 4 qətnaməsinin icra ediləcəyinə və ədalətin bərpa olunacağına inanaraq Parisin İrəvana təzyiq göstərəcəyini gözləyirdi. Lakin Minsk qrupu Azərbaycanı işğalla barışdırmağa və torpaqlarımızda erməni işğalını əbədiləşdirməyə çalışdı. Elə ovaxtı başa düşdük ki, Fransa özünü ermənilərin havadarı kimi aparır", - deyə müsahibimiz söyləyib.
Deputat vurğulayıb ki, Vətən müharibəsində əzəli və əbədi torpaqlarımızı işğaldan azad etdikdən sonra Fransanın iç üzü daha çox ortaya çıxdı: "Əvvəlcə ölkəmizə Paris tərəfindən ultimatumlar göndərildi. Bunların heç birinin nəticə vermədiyini görən Fransa məsələni dəfələrlə BMT TŞ-na çıxardı, lakin orada Makronun Azərbaycan əleyhinə təklifləri gündəliyə qəbul edilmədi. Çünki Azərbaycan beynəlxalq hüququn norma və prinsipləri çərçivəsində hərəkət edirdi. BMT TŞ-dən əliboş qayıdan Paris Avropa İttifaqında Azərbaycana qarşı sanksiyalar tətbiq etmək üçün qətnamə qəbul olunmasına çalışsa da, yenə fiaskoya uğradı. Digər bütün cəhdləri nəticəsiz qalan Makron əvvəlcə Fransa parlamentində, daha sonra isə AŞPA və Avropa Parlamentində ölkəmiz əleyhinə, əslində, kağız parçasından başqa bir dəyəri olmayan sənədləri qəbul etdirməyə nail oldu. Lakin həmin qətnamələrin Azərbaycan üçün heç bir əhəmiyyət kəsb etmədiyini bildirdik".
Bu gün Fransanın ermənidən çox ermənilik etdiyini deyən  Azər Badamov bunu Parisin bizim şanlı zəfərlərimizi heç cür həzm edə bilməməsi ilə əlaqələndirib. Müsahibimiz deyib ki, Avropada liderlik etməyə çalışan Makron Ukraynanın ərazi bütövlüyünü müdafiə etmək üçün Qərbi yardımlar göndərməyə çağırdığı halda, Azərbaycanı öz ərazilərində suverenliyi bərpa etdiyinə görə ittiham edir. Bu, Makron hakimiyyətinin neokolonist və işğalçılıq siyasətinə davam etdiyini bir daha sübuta yetirir.
Deputat onu da bildirib ki, Azərbaycana təzyiq göstərməyə gücü yetmədiyini anlayan Fransa son çıxış yolu kimi Natəvanın Evian şəhərində yerləşən heykəlinə qarşı vandalizm aktı həyata keçirib: "Heykəl rənglərə bulaşdırılmış halda parçaya bükülərək uzun müddət saxlanılıb. Bu, Fransanın vəhşi təfəkkürə görə Ermənistandan heç də geri qalmadığını göstərir. Xatırladaq ki, Ermənistan Şuşanı işğal edəndə orada mədəniyyət klassiklərimizin gülləbaran edilmiş büstlərini İrəvana aparıb əritmək istəyirdi. Eyni vandallığın Fransada Natəvanın heykəlinə qarşı təkrarlanması bu ölkələrin hər ikisinin mahiyyətinin bir-birindən fərqlənmədiyini təsdiq edir".
Azər Badamov yekunda vurğulayıb: "Cəmi 44 gün ərzində Ermənistanın 30 ildə qurduğu istehkamları darmadağın edərək torpaqlarını işğaldan azad edən və 23 saatda 15 min erməni separatçısını ərazilərimizdən qovaraq suverenliyimizi tam təmin edən Azərbaycan hər zaman öz ərazilərinin bütövlüyünü düşmənlərdən qorumaq iqtidarındadır. Heç vaxt özünü müdafiə edə bilməyən Ermənistan isə beynəlxalq güclərin ayaqları altında qalaraq əzilməyə məhkumdur".

N.QAFARZADƏ,
"Azərbaycan"