Seneqal fransız qoşunlarının ölkədən çıxarılmasını 2025-ci ilin yayına planlaşdırıb.
AZƏRTAC Seneqalın Dövlət Xəbər Agentliyinə (APS) istinadla xəbər verir ki, Fransa cari ilin yayında bu ölkədə özünün daimi hərbi bazalarını bağlayacaq.
APS-in məlumatına görə, iki ölkənin hakimiyyət orqanları bu tarixə qədər Fransanın bütün hərbi hissələrinin çıxarılmasının həyata keçirilməsi üçün dialoq mərhələsinə başlayıb.
Seneqalın Baş naziri parlamentdəki çıxışında ölkədəki bütün xarici hərbi bazaların tezliklə bağlanacağını elan edərək, bu addımın ölkənin milli suverenliyini gücləndirmək və dövlət siyasətini təşviq etmək istəyinin bir hissəsi olduğunu bildirib.
Qeyd edək ki, bundan əvvəl ölkə prezidenti Bassiru Diomey Fey də yaxın vaxtlarda ölkədə daha fransız əsgərlərinin olmayacağını bildirmişdir. “Seneqal müstəqil, suveren ölkədir və suverenlik suveren ölkədə hərbi bazaların olmasını qəbul etmir”, - deyə Seneqal Prezidenti noyabr ayında fransız mətbuatında bildirib. Yerli mediaya görə, Seneqalda təxminən 350 hərbiçisinin olduğu 3 Fransa hərbi bazası var. 2011-ci ildə Parislə Dakar arasında imzalanmış müqaviləyə görə rəvan keçidə imkan verən sazişi ləğv etmək üçün altı ay əvvəl xəbərdarlıq edilməlidir.
Xatırladaq ki, Mali, Burkina-Faso və Niger kimi ölkələri tərk etdikdən sonra Fransa bu yaxınlarda Çaddan çıxmağa məcbur oldu və 1966-cı ildə bağlanmış hərbi əməkdaşlıq sazişinin sona çatdığını qeyd etdi. Həmçinin, prezident Alasana Uattara da öz növbəsində ölkəsindəki fransız hərbi bazasının Kot d'İvuarın komandalığına keçəcəyini açıqladı.
jpg_1773317662.jpg)
