"Bu, yerli futbolçularımızda "rəqabət ruhu"nun artmasına səbəb olacaq"
Fevralın 3-ü AFFA-nın İcraiyyə Komitəsinin növbəti iclası keçirilib və toplantıda bir sıra vacib qərarlar qəbul olunub. Ən çox diqqətçəkən qərarlardan biri növbəti mövsümdən etibarən Azərbaycan Premyer Liqasında legioner limitinin ləğv olunması ilə bağlıdır. Bu dəyişiklik perspektivdə Azərbaycan futbolunun inkişafına hansı formada təsir göstərəcək?
"QOLAT Sport Services və Futbol Agentliyi"nin direktoru, FIFA agenti Səid Bağırov "Azərbaycan" qəzetinə açıqlamasında qeyd edib ki, legioner limitinin ləğvi Azərbaycan futbolunun inkişafına, gələcəyinə hesablanmış bir addımdır. Bildirib ki, AFFA-nın İcraiyyə Komitəsinin aldığı yeni qərarlar ictimaiyyətə elan edildikdən sonra birmənalı qarşılanmadı: "Futbolda legioner limitinin ləğvi bir çox ölkənin keçdiyi yoldur, məhz elə onlarda da bu prosesə asan keçid olmayıb. Əlbəttə ki, ölkəmizdə də müəyyən kütlə tərəfindən müzakirə mövzusu oldu və davam edir. Bizə görə bu qərardan sonra insanlarda və ya hazırkı oyunçuların ağlında əsas sual budur: "Bizim futbol karyeramız necə olacaq və ya azərbaycanlı futbolçular harada oynayacaq?" Yəni məsələ bir az da psixolojidir. Düşünürlər ki, legioner oyunçulara görə onlar mövqelərini itirmiş olacaqlar. Futbol bacarığına inanan oyunçular bunu problem kimi görməməlidirlər, əksinə, rəqabətə girməlidirlər. Yəqin ki, alınan qərarların dərinliyində "rəqabət ruhu"nun artırılması, yerli futbolçularımızın öz üzərində daha çox işləməsi kimi məqamları da nəzərdə tutublar".
Səid Bağırov əlavə edib ki, qərarın texniki tərəfləri daha maraqlıdır. Məsələn, ilk öncə Premyer Liqada klubların sayının 10-dan 12-yə artırılması liqaya marağı daha da artıracaq, futbolçuların yüksək liqa klublarında çıxışına imkan yaradacaq. Belə olduğu halda 1-ci, 2-ci liqalarda da ümumi olaraq klubların sayı artmalıdır. Hətta legioner limitinin ləğvi 1-ci və 2-ci liqada oyunçu maaşlarına da müsbət təsir etməlidir, çünki çempionatın baxılma səviyyəsi artdıqca gəlirlər çoxalır, bu isə birbaşa oyunçu maaşlarına da yaxın gələcəkdə müsbət təsir göstərməlidir.
Azərbaycanın ilk rəsmi FIFA agenti bildirib ki, əslində, legioner limitinin ləğvi teorik olaraq qərara alınsa da, praktiki olaraq, tətbiqi heç də asan görünmür. Yəni bu o demək deyil ki, bütün klublar ancaq legioner oyunçu transfer edəcəklər. Hər bir legioner üçün tətbiq edilən yeni rüsumlar bu formada düşünməyə imkan yaradır. Əvvəl legioner oyunçulara görə rüsum hər bir oyunçu üçün 5 min manat idi, 12-ci oyunçudan sonra hər oyunçu üçün əlavə 50 min manat ödənilirdi. Əgər oyunçu öz ölkəsinin millisində oynayırdısa, 5 min manatlıq rüsumdan azad olunurdu. Ancaq indi millidə forma geyinsə belə klub oyunçu üçün rüsum ödəməli olacaq, yəni milli komanda oyunçusu üstünlüyü ləğv olunub. Əlavə olaraq rüsumlar oyunçu sayına görə tənzimlənib. Belə ki, 1 legionerdən 7 legionerə qədər 5 min manat, 8-dən 12-yə qədər 10 min manat, 13-dən 15-ə qədər 100 min manat, 16 və daha çox oyunçu üçün 200 min manat ödənilməlidir. Bu rüsumlar nəzərə alınıb tətbiq edilərsə, AFFA 11 legioner oyunçu oynatmağa icazə verir, ancaq klub bu futbolçu transfer etmək istəsə, 110 min manat rüsum ödəməlidir. İştirak ərizəsinə 17 legioner oyunçu salmağa da icazə verilir, lakin bu transferləri etmək üçün ümumilikdə 785 min manat rüsum ödənilməlidir. Bunu edə biləcək klubumuz demək olar ki, yoxdur. Maliyyə imkanı daha böyük olan klublarımız 8-12 ya da 13-15 say limitindən yararlana biləcəyini, imkanı daha zəif olan klublarımız elə 1-7 say limitindən yararlanacağını düşünürlər.
"Bu, yerli futbolçularımızı "nə də olsa, limitə görə məcbur bizi də oynadacaqlar" düşüncəsindən, arxayınçılığından çıxaracaq. Artıq yerli futbolçularımız heyətə düşmək üçün daha çox çalışacaq, mübarizə aparacaqlar. Bu da öz növbəsində milli komandanın inkişafına yol açacaq. Hansı ki, son vaxtlar alınan nəticələr heç də ürəkaçan deyil. Yuxarıda da qeyd etdiyim kimi, legioner limitinin ləğvini biz bir çox ölkə, eləcə də qardaş Türkiyənin təcrübəsində də görmüşük. Son illər Türkiyə millisində oynayan bir çox oyunçu legioner limiti qaldırılan vaxtda Avropa ölkələrində müxtəlif klublarda forma geyinirdilər. Yerli klublarda oynayan oyunçuların da inkişafı göz qabağındadır. Onlar da öz klublarında heyətə düşmək üçün daha çox çalışırlar. Hətta biz onu da təxmin edirik ki, yerli klublarımız öz yerli oyunçularımızın da xarici klublara satışında və ya icarəsində maraqlı olacaqlar. Başqa sözlə desək, onların çıxışına bu dəfə özləri də cəhd edəcəklər", - deyə Səid Bağırov əlavə edib.
"QOLAT Sport Services və Futbol Agentliyi" olaraq, hazırda 20-dən çox yerli oyunçu ilə hüquqi olaraq təmsilçilik müqaviləsi olduğunu qeyd edən FIFA agenti bildirib ki, futbolçular bu qərarı gördükdə müəyyən məyusluq keçiriblər: "Lakin inkişaf üçün fərqli mühitləri görmək lazımdır. İstənilən işdə komfort zona var, biz həmin zonanı tərk etdikdə güclənirik. Məhz biz agentlik olaraq oyunçularımızla psixoloji söhbətləri mütəmadi təşkil edərək, bu məsələləri onlara izah edirik. Futbol agentliyi olaraq onu düşünürük ki, alınan son qərarlar Azərbaycan futbolunun inkişafı üçün bir təkan olacaq. Dəyərli futbolçularımız özlərinə inansınlar və daha çox cəhdlər etsinlər, alınacaq!"
Elçin CƏFƏROV,
"Azərbaycan"
