Düz 38 il bundan əvvəl Azərbaycan qonşu respublikanın xalqımıza və dövlətimizə qarşı illər boyu davam edən düşmənçiliyinin yeni dalğası ilə üz-üzə qalmışdı. Bizi heç kəs müdafiə etmədi, nəticədə torpaqlarımız işğal olundu, insanlarımız ata-baba ocağından qovuldu, cəlb olunduğumuz ədalətsiz müharibədə on minlərlə övladımız şəhid, on minlərlə vətəndaşımız əlil oldu. Nəhayət, xalqımız özündə güc tapıb, bu bataqlıqdan çıxdı, tarixin təkərlərini irəliyə aparmağı bacaran Ulu Öndər Heydər Əliyev, Prezident İlham Əliyev kimi liderlərimiz sayəsində tarixi ədaləti bərpa etdi. Torpaqlarımız işğaldan azad olundu, suverenliyimiz tam bərpa edildi. İnsanlıq əleyhinə cinayətlər törədən bir qrup müharibə canisi isə məhkəmə qarşısına çıxarıldı.
Bu sözləri AZƏRTAC-a açıqlamasında Milli Məclisin deputatı, Qərbi Azərbaycan İcmasının İdarə Heyətinin sədri Əziz Ələkbərli söyləyib.
O qeyd edib ki, Prezident İlham Əliyev hələ torpaqlarımız işğal altında olanda Xocalı soyqırımını və digər ağır cinayətləri törədənlərin ədalət mühakiməsinə cəlb ediləcəyini dəfələrlə bildirmişdi. Həmişə olduğu kimi, dedi və etdi. Ərazilərimizin 30 illik işğalı dövründə ağzına su alıb duranlar, əksinə son 30 ildə bu və ya digər şəkildə işğalçıya dəstək olanlar Azərbaycanın 8 Noyabr Zəfərindən sonra əsl simalarını ortaya qoydular, bu azmış kimi, məhkəmə qarşısına çıxarılan müharibə canilərinin müdafiəsinə qalxdılar, xaricdən siyasi təzyiqlər göstərməyə başladılar. Bədbəxtlər anlamadılar ki, qarşılarında bütün riskləri göz önünə alaraq 30 il ərzində dünya güclərinin müdafiə etdiyi düşmən üzərində parlaq qələbə qazanan bir siyasi Lider və qalib Sərkərdə dayanır. Anlamadılar və sındılar, hesablaşmağa məcbur oldular.
“Qonşu dövlətin bütün hərbi, mülki və insani cinayətlərinə baxmayaraq, Azərbaycan bölgəyə dinclik, əmin-amanlıq, rifah gəlməsi naminə qarşı tərəfə sülh əlini uzatdı. Əslində, xalqımıza, dövlətimizə qarşı edilənlərin müqabilində məğlub tərəfin bizə uzatdığı əl geri çevrilməli idi, amma etmədik, özümüz əl uzatdıq. Lakin bu o demək deyil ki, müharibə cinayətkarlarını tamamilə bağışladıq, etdiklərini onlara halal elədik. Belə olsa, şəhidlərin ruhu bizi bağışlamaz, tarix bizi qınayar. İkinci Dünya müharibəsində də bütün hərbi əsirlər azad edildi, dünya dövlətləri alman xalqına qucaq açdı, Almaniyaya dirçəlməsi üçün dəstək oldu. Bununla bərabər Nürnberq məhkəməsi bütün müharibə canilərini lazımınca cəzalandırdı. Almaniya dövləti də cavabsız qalmadı, müharibənin nəticələrinin aradan qaldırılması üçün güzəştli addımlar atdı, bu gün Avropada Holokost qurbanlarına abidələr ucaldılır, geri qayıdan yəhudilərə Almaniya dövləti hər cür güzəşt tətbiq edir, şərait yaradır”,- deyə Ə. Ələkbərli vurğulayıb.
Deputat əlavə edib ki, Qarabağ münaqişəsinin ilk mərhələsində indiki Ermənistandakı ata-baba yurdlarından vəhşicəsinə qovulan Qərbi azərbaycanlılar da Ermənistan rəhbərliyindən və cəmiyyətindən belə bir hərəkət gözləyir. “Belə ki, Azərbaycanın Ermənistana uzatdığı sülh əli müqabilində Azərbaycanafob düşüncədən imtina edərək əzəli sakinlərin geriyə qayıdışına təminat istəyirik. Bu təminat bizim haqqımız, Ermənistan dövlətinin isə borcudur. Lakin təbii ki, Qərbi Azərbaycan qaçqınlarının geri qayıdışı üçün Ermənistandakı müharibə caniləri olan Köçəryan, Sarkisyan kimi cinayətkarlar mütləq Azərbaycana təhvil verilməli və Azərbaycan xalqı qarşısında mühakimə olunmalıdırlar. Ola bilər qarşı tərəf üçün bu, ilk addımda qəbuledilməzdir, amma Azərbaycan və erməni xalqlarının əbədi sülh şəraitində birgəyaşayışı üçün son dərəcə vacibdir, qaçılmazdır”, - deyə icma rəhbəri əlavə edib.
