İrəvanda bayrağımızın yandırılması daxildə kök salmış düşmənçiliyin təzahürüdür
"Ermənistanda Azərbaycan bayrağının yandırılması bütövlükdə ölkədə hökm sürən siyasi, ictimai ideoloji atmosferin təzahürüdür. Hadisə simvolik olaraq bir millətin, dövlətin, xalqın şəxsiyyətinə qarşı yönəlmiş hücumdur. Əlbəttə ki, heç bir halda ifadə azadlığı qiymətləndirilməməlidir".
Bu fikirləri "Azərbaycan" qəzetinə Beynəlxalq Münasibətlərin Təhlili Mərkəzinin aparıcı məsləhətçisi Fuad Abdullayev deyib. O bildirib ki, bu kimi hadisələr, eyni zamanda, sülh prosesinə qarşı açıq və qəsdən törədilmiş təxribat aktı olmaqla yanaşı, ümumilikdə, regionda formalaşmağa başlayan yeni təhlükəsizlik arxitekturasına qarşı da yönəlmiş sabotaj cəhdi kimi qəbul edilməlidir. Azərbaycan və Türkiyə bayraqlarının yandırılması Ermənistanın daxilində, xüsusilə də siyasi və ictimai çevrələrdə kök salmış düşmənçilik atmosferini və revanşist əhvali-ruhiyyəni bir daha üzə çıxardı. "Eyni zamanda Azərbaycan xalqına, ümumiyyətlə, türk millətinə qarşı köklü düşmənçiliyin nə qədər dərinə getdiyini əyani şəkildə nümayiş etdirdi. Təbii ki, bu, Ermənistan cəmiyyətinin hələ də sülhə hazır olmadığını və regionda dinc birgə yaşayış ideyasından kənarda dayandığını göstərir. Fikrimcə, bir cəmiyyətdə sülhə çağırış əvəzinə təhqir, aqressiya və rəmzi zorakılıq normal qarşılanırsa, deməli, orada sülh mədəniyyəti hələ də formalaşmayıb. Ermənistanda faktiki olaraq bu, belədir. Digər tərəfdən, bu hadisə Ermənistan daxilində fəaliyyət göstərən radikal qüvvələrin sülh prosesinə məqsədyönlü şəkildə zərbə vurmaq cəhdlərinin tərkib hissəsi kimi də qiymətləndirilməlidir. Çünki radikal qüvvələr bu hadisələrdən istifadə edirlər. Onlar uzun illərdir Ermənistan xalqı arasında revanşist düşüncələrini təbliğ edirlər. İndi də Azərbaycanla hər hansı sülh razılaşmasını "xəyanət" kimi əhaliyə tirajlayırlar. Əslində, onların məqsədi Ermənistanın regionda sabitlik və əməkdaşlıq platformasına çevrilməsinə imkan verməməkdir. Ölkəni davamlı olaraq qeyri-sabitlik içində saxlamaq, bu yolla həm daxili siyasi təsir güclərini qorumaq, həm də bəzi xarici dairələrin dəstəyini itirməməkdir", - deyə ekspert əlavə edib.
F.Abdullayev vurğulayıb ki, baş vermiş hadisə Ermənistanda sülh gündəliyinə münasibətdə hakimiyyətlə ictimaiyyət arasında mövcud yanaşmanın nə qədər fərqli olduğunu göstərir. Ermənistan hakimiyyət nümayəndələrinin beynəlxalq platformalarda manipulyasiya məqsədilə mütəmadi olaraq sülhə hazır olduqlarına dair səsləndirdikləri bəyanatlarının ritorikadan başqa bir şey olmadığını bütün dünya görür. Azərbaycan rəsmiləri Ermənistan hakimiyyətinə əhalisini sülhə hazırlamaqla bağlı dəfələrlə çağırışlar edib.
Ekspert qeyd edib ki, bütün bunlar Ermənistanda yalnız siyasi elitanın deyil, eyni zamanda cəmiyyətin bir hissəsinin real sülh prosesinə hazır olmadığını deməyə əsas verir: "Revanşizm, nifrət hələ də ermənilərin ictimai şüurunda dominant mövqedədir. Bu isə sülh danışıqlarının yalnız texniki bir prosesə deyil, həm də dərin ictimai transformasiyaya ehtiyac duyan mürəkkəb bir çağırış olduğunu deməyə əsas verir. Çünki Ermənistan cəmiyyəti daxilində bu cür radikal yanaşmanın populyarlaşması, nifrətin açıq ifadəsi, həmçinin son vaxtlar şərti sərhəddə törədilən təxribatlar gələcəkdə dinc birgəyaşayışa maneə yaradır. Bir ölkənin ictimai rəyində sülh deyil, düşmənçilik dominantdırsa, əlbəttə ki, orada sülh müqaviləsi formal sənəddən o yana keçə bilməz. Azərbaycan sazişi formal şəkildə imzalamaq istəmir. Regionun sabitliyi və rifahı qarşılıqlı hörmət və sülh əsasında mümkündür. Bu isə təkcə dövlətlər arasında danışıqlarla deyil, eyni zamanda cəmiyyətlərin davranışı, ictimai rəyin formalaşması və qarşı tərəfə münasibətlə müəyyən olunmalıdır. Fikrimcə, Ermənistanın ictimaiyyəti və siyasi dairələri anlamalıdırlar ki, XXI əsrdə regionun təhlükəsizliyi nifrətlə və ya revanşist ambisiyalarla qurula bilməz".
Siyasi şərhçi bildirib ki, cəmiyyətin sülhə hazırlanmasına yalnız beynəlxalq danışıqlarla deyil, siyasi iradə, təhsil, media və ictimai resursların iş birliyi ilə nail olmaq lazımdır. O düşünür ki, əgər Ermənistan hakimiyyəti real, davamlı sülh istəyirsə, ilk növbədə, öz daxilində nifrət ritorikasına son qoymalı, məsələyə hüquqi qiymət verməli və təbliğat vasitəsilə cəmiyyətində tolerantlıq və qarşılıqlı hörmət prinsiplərini təşviq etməlidir. Ermənistanda gənc nəsildə barışa deyil, kin və intiqam hissinə zəmin yaradılır. Azərbaycan xalqı və dövləti bu kimi təxribatlara qarşı ayıqdır. Sülhün yalnız bərabərlik, qarşılıqlı hörmət və əməkdaşlıq şəraitində mümkün olduğunu hər zaman bəyan edir.
Əsmər QARDAŞXANOVA,
"Azərbaycan"
