Azərbaycan və Ermənistan liderlərinin Əbu-Dabi görüşlərində sülh müqaviləsi ilə bağlı danışıqları İrəvanda böyük əks-səda doğurub. Məğlub ölkədə qeyd edilir ki, hər iki tərəf bəzi məsələlərin həllində razılığa gəliblər. Xüsusi olaraq vurğulanır ki, yaxın keçmişdə baş tutan görüşlərdən sonra əgər Ermənistanın rəhbərliyi bütün reallıqları etiraf edirsə və çıxış yolunu Azərbaycanla münasibətlərin normallaşmasında görürsə, onda niyə sülh müqaviləsinin imzalanması uzanır?
Ermənistanın "Past" nəşri yazıb ki, Əbu-Dabidə İlham Əliyev və Nikol Paşinyan arasında təxminən 5 saat davam edən birbaşa danışıqlar aparılıb. Nəşr qeyd edib ki, bu qədər uzun sürən görüşə baxmayaraq, onun məzmunu ilə bağlı yayılan məlumatlar və "sızmalar" olduqca qısa və natamam olub: "Hər halda, görüşdən az sonra bir çox şərhçilər Ermənistanın xarici işlər nazirinin müavininin sonradan "təkzib və izahata ehtiyac duyan" açıqlamalarına əsaslanaraq qeyd ediblər ki, Zəngəzur dəhlizinin açılması məsələsi müzakirə olunub. Bu barədə çoxsaylı müzakirələr, şərhlər və fikirlər səslənib".
Ermənistanın "HayaKve" milli vətəndaş assosiasiyasının koordinatoru, erməni ictimai xadim Avetik Çalabyan İlham Əliyevlə Nikol Paşinyan arasında Əbu-Dabidə keçirilən görüşü şərh edərkən deyib ki, yekun razılaşma yoxdur, əks halda, bu, bəyanatda qeyd olunardı və ya memorandum imzalanardı.
Onun sözlərinə görə, sülh müqaviləsinin müxtəlif komponentləri müzakirə olunur: "Təbii ki, orada Qarabağ məsələsi, ümumiyyətlə, müzakirə olunmur, çünki Paşinyan həmin səhifəni bağlamağa çalışır və bununla da faktiki olaraq bütün məsələləri müzakirə üçün Ermənistanın ərazisinə gətirir. Onun siyasəti ona gətirib çıxarır ki, Azərbaycanın bütün məsələlərin müzakirəsini Ermənistanın ərazisinə keçirmək imkanı var".
Çalabyan qeyd edib ki, Paşinyan çətin vəziyyətə düşüb, çünki bir tərəfdən, erməni xalqı öz gözləntiləri ilə, digər tərəfdən isə, İlham Əliyev və ona dəstək verən Türkiyə Prezidenti öz tələblərini irəli sürürlər və onun manevr etmək imkanı yoxdur.
Erməni siyasi xadim Samvel Farmanyan sosial şəbəkə hesabında yazıb ki, Azərbaycan artıq Türkiyə ilə bütün nəqliyyat-kommunikasiya xətlərinə malikdir - avtomobil yolları, dəmir yolu (Bakı-Tbilisi-Qars), neft kəməri (Bakı-Tbilisi-Ceyhan) və qaz kəməri (Bakı-Tbilisi-Ərzurum). Həmçinin Naxçıvanla quru əlaqəsi üçün İran ərazisindən alternativ marşrut da var: "Sənin "sülh kəsişməsi" adlandırdığın layihə, nə qədər çaşdırmağa çalışsan da, faktiki olaraq İlham Əliyevin Zəngəzur dəhlizi adlandırdığı ilə eynidir. Sən və sənin tərəfdarların bu layihəni yalnız Azərbaycanın əsas hissəsi ilə Naxçıvanı birləşdirəcək yol kimi deyil, həm də Şərqi Qərblə, Mərkəzi Asiya və Çin bazarlarını Avropa ilə birləşdirəcək qlobal iqtisadi təşəbbüs kimi təqdim edirsiniz. Sizin fikrinizcə, bu təşəbbüs Ermənistan üçün iqtisadi cəhətdən sərfəli olacaq, təhlükəsizlik səviyyəsini artıracaq".
O bildirib ki, Avropa İttifaqı da Paşinyana bu məsələdə səs verir.
Elçin CƏFƏROV,
"Azərbaycan"
jpeg_1765897678.jpeg)
