Ermənistanda revanşistlər baş nazir Nikol Paşinyanı hakimiyyətdən uzaqlaşdırmaq üçün dəridən-qabıqdan çıxsa da, heç bir nəticəyə nail ola bilmirlər. Keçmiş hərbi xunta etirazlarına əsas kimi hakimiyyətin yürütdüyü uğursuz siyasəti göstərirlər. Onlar iqtidarın xarici siyasətinin ölkəni uçuruma sürüklədiyini, dövlətçiliyin itirilməsi ilə üz-üzə qoyduğunu iddia edirlər.
Bu günlərdə Ermənistan prezidenti Vaaqn Xaçaturyanın iqamətgahı yaxınlığında "Müqəddəs mübarizə" hərəkatının mitinqi keçirilib. Etirazçılar Azərbaycanla sərhədlərin delimitasiyası üzrə komissiyaların işi ilə bağlı əsasnamənin imzalanmasının əleyhinə olduqlarını bildiriblər.
Ən maraqlı etiraz isə sözsüz ki, hökumət binasında bir nəfərin iştirakı ilə keçirilən aksiyadır. Hökumət binasının qarşısında dayanaraq özünü desantçı kimi təqdim edən, hərbi gödəkcə geymiş Arsen Avenisyan təkbaşına piket keçirib. A.Avenisyan iddia edilən hərbi çevriliş cəhdi barədə hüquq-mühafizə orqanlarına məlumat verən şəxs olduğunu deyib. Qeyd edək ki, bu yaxınlarda Ermənistanın İstintaq Komitəsinin bəyanatında hərbi çevriliş cəhdi ilə əlaqədar üç nəfərin saxlanıldığı bildirilib, onlardan biri "Qara pantera" hərbi təşkilatının sədri Serob Qasparyandır. Daha dörd nəfər isə axtarışdadır.
A.Avenisyan həyatının təhlükə altında olduğunu, hakimiyyət nümayəndələrini xilas etdiyini, öldürülməsinin qarşısını aldığını, lakin bu şəxslərin onun təhlükəsizliyini təmin etmədiklərini bildirib.
"Mənim sayəmdə terror aktının qarşısı alındı. Bu müsahibədən sonra mütləq öldürüləcəyimi bilirəm, amma qorxmuram", - o deyib. A.Avenisyan "terrorçular deyəndə kimi nəzərdə tutursunuz" sualına "Hazırda bu işdə həbs olunanları nəzərdə tuturam. Ad çəkmək istəmirəm", - cavabını verib.
Etirazçı vurğulayıb ki, Aramus kəndindən Erjo adlı gənc guya yenidən hazırlıq üçün Rostova aparmaq adı ilə onu aldadıb, amma, əslində, o, sevgilisi Lusine ilə birlikdə bizi "Arbat" terror qruplaşmasının bazasına, Qorlovkaya gətirib. Onlar bizi terrorçu kimi hazırlamaq, hökumət binalarına, parlamentə, polisə, prokurorluğa hücum etmək və hamını öldürmək niyyətində idilər. İki ildir bu hakimiyyətə qarşı mübarizə aparıram və məlumat verdiyim, onların həyatlarını xilas etdiyim üçün peşmanam. Onlardan təhlükəsizliyimi təmin etmələrini xahiş etdim, çünki öldürüləcəyimə əminəm, amma heç kim mənim istəyimi yerinə yetirmir.
Sentyabrda Ermənistanda "Qara Pantera" hərbi təşkilatının rəhbəri saxlanılıb. Yerli mətbuatın məlumatına görə, hakimiyyətin ələ keçirilməsi ilə bağlı həbs edilənlər arasında "Qara Pantera" hərbi təşkilatının rəhbəri Serob Qasparyan da var.
Bundan əvvəl Ermənistan Milli Təhlükəsizlik Xidməti ölkədə hakimiyyəti ələ keçirməyi planlaşdıran cinayətkar qrupun üzə çıxarılması barədə məlumat yayıb. Bu qrup Ermənistan vətəndaşlarını "Arbat" bazasında üç aylıq təlim keçmək üçün cəlb edib. Məqsəd onlara silahdan istifadə etməyi öyrətmək və s. olub. Lakin sonradan məlum olub ki, qruplaşmanın təşkilatçılarının məqsədi Ermənistanda hakimiyyəti ələ keçirmək idi. Cəlb edilmiş şəxslərin bəziləri təlimlərdə iştirakdan imtina edərək Ermənistana qayıdıblar. Şübhəli bilinən yeddi nəfər barəsində cinayət təqibi başlanıb. Onlardan üçü artıq həbs edilib, dördü isə axtarışa verilib. İstintaq davam edir və qrupun digər üzvlərinin müəyyən edilməsi istiqamətində tədbirlər görülür.
"Hraparak" qəzeti isə yazıb ki, hökumətin Rusiya əleyhinə atdığı addımlar Ermənistanda ciddi narahatlıq doğurub. Baş verənlər hətta hökumətə yaxınlığı ilə seçilən iş adamlarını da ciddi şəkildə düşündürməyə başlayıb. Belə ki, Kremlə sadiq dairələr onlara tezliklə növbəti məhdudiyyətlərin elan olunacağını bildiriblər. Qeyd edilib ki, qadağalar xüsusilə də baş nazir Nikol Paşinyana yaxınlığı ilə seçilən nəhəng oliqarxlara ciddi təsir göstərəcək. Məhdudiyyətlərin siyahısı açıqlanmasa da, ehtimal edilir ki, Rusiyadan idxal ediləcək məhsullar əlavə vergiyə və digər inzibati tədbirlərə cəlb olunacaq.
Bütövlükdə bütün bunlar Ermənistanın böyük tənəzzül yaşadığını göstərir. Görünən budur ki, sülh müqaviləsinin imzalanmasının uzadılması fonunda İrəvan üzləşdiyi problemlərdən hələ uzun müddət xilas ola bilməyəcək.
Elçin CƏFƏROV,
"Azərbaycan"