Vətən müharibəsindəki döyüş meydanında cəmi 44 günə Ermənistanı məğlub edərək onu kapitulyasiya aktına imza atmağa məcbur edən Azərbaycan zəfərdən ötən üç il müddət ərzində beynəlxalq hüquq müstəvisində də təcavüzkar ölkə üzərində ardıcıl qələbələr qazanır.
30 il boyu torpaqlarımızı işğal altında saxlayan, azərbaycanlılara qarşı kütləvi qətliam, soyqırımı törədən, yüzlərlə yaşayış məntəqəmizi talayan, tarixi, mədəni, dini abidələrimizi dağıdan vəhşi xislətli ermənilər, həm də ötən müddətdə dünyanı aldatmağa yönəlik iftira, yalan və böhtan kampaniyası aparıblar.
Lakin Azərbaycan beynəlxalq hüquqla erməni yalanlarının üzərindən davamlı olaraq xətt çəkir.
Xatırladaq ki, iyulun 6-da Beynəlxalq Ədalət Məhkəməsi (BƏM) Ermənistanın 12 may 2023-cü ildə məhkəməyə təqdim etdiyi və 23 aprel 2023-cü ildə Laçın yolunun başlanğıcında sərhəd nəzarət-buraxılış məntəqəsinin quraşdırılmasının "qanunsuz" olduğuna dair vəsatətini yekdilliklə rədd etdi. Azərbaycan tərəfinin BƏM-ə təqdim etdiyi çoxsaylı sübutlarla Ermənistanın yalanları iflasa uğradıldı.
Ermənistanın iddiaları rədd edildi
2023-cü il noyabrın 17-si tarixi də Ermənistanın beynəlxalq hüquq müstəvisində növbəti dəfə Azərbaycan qarşısında ağır məğlubiyyəti ilə yadda qaldı. Belə ki, BƏM sözügedən tarixli qərarı ilə Ermənistanın Azərbaycana qarşı əsas iddialarını rədd etdi.
Azərbaycanın Qarabağ üzərində suverenliyini və ərazi bütövlüyünü təsdiq edən məhkəmə bu qərarı ilə ölkəmizin beynəlxalq hüququn norma və prinsipləri çərçivəsində həyata keçirdiyi milli maraqlarını qəbul etdiyini göstərmiş oldu.
Qeyd edək ki, BƏM həm də Ermənistanın Azərbaycanın hərbi və hüquq-mühafizə orqanlarının Qarabağ bölgəsindən çıxarılması ilə bağlı əsassız və gülünc tələbini rədd edib. Həmçinin məhkəmə Ermənistanın BMT agentliklərinin Qarabağ bölgəsinə səfəri və Beynəlxalq Qızıl Xaç Komitəsi (BQXK) ilə əməkdaşlıq barədə iddiasına əhəmiyyət verməyib, bununla da, beynəlxalq təşkilatların bölgəyə girişi ilə bağlı ölkəmizə qarşı bütün iddiaları mahiyyətcə əsassız elan edib.
Məhkəmə mədəniyyət abidələrinin və artefaktlar ilə bağlı Ermənistanın iddialarını da rədd edib, müvafiq ittihamlarla saxlanılan qanunsuz separatçı rejimlə əlaqəsi olan şəxslərlə bağlı Ermənistanın iddiasını təmin etməyib.
Eyni zamanda Azərbaycanın İrqi Ayrı-seçkiliyin Bütün Formalarının Ləğv Edilməsi haqqında Beynəlxalq Konvensiya (CERD) öhdəliklərinin pozuntusu məhkəmə tərəfindən təsdiqlənməyib və Ermənistanın bu iddiası da rədd olunub.
AHİM işğalla bağlı Ermənistanın dürüst olmadığı qənaətindədir
Ermənistan beynəlxalq hüquqdan yayınmaqdan ötrü daim öz cinayət əməllərini ört-basdır etməyə çalışır, xalqımıza, ölkəmizə qarşı törətdiyi bədnam əməlləri riyakarlıqla inkar edir, işğal faktını danır.
Ancaq Avropa İnsan Haqları Məhkəməsinin (AHİM) bu yaxınlarda qəbul etdiyi qərar Ermənistanın daha əvvəl işğal altında saxladığı Azərbaycan ərazilərində nəzarətinin və ya yurisdiksiyasının olmamasına dair uzunmüddətli mövqeyini ifşa edib.
AİHM-in 17 oktyabr 2023-cü il tarixli "Hovhannisyan və Karapetyan Ermənistana qarşı" işi üzrə verdiyi hökmdə Ermənistan Respublikasının vətəndaşları R. Hovhannisyanın və A. Sarqsyanın 2009 və 2008-ci illərdə Ermənistan ordusuna çağırıldıqları və "Dağlıq Qarabağ silahlı qüvvələri"nin 36 535 saylı hərbi hissəyə göndərildikləri qeyd edilib.
Bildirilib ki, 2010-cu ilin iyulunda hər iki hərbi qulluqçu öz hərbçi yoldaşları tərəfindən daxili insident nəticəsində qətlə yetirilib və öldürülən hərbçilərin valideynləri təzminat üçün Ermənistanı məhkəməyə verib.
Bununla bağlı xarici işlər nazirinin müavini Elnur Məmmədov "X" platformasındakı paylaşımında bildirib ki, məhkəmə artıq digər işlərdə Ermənistanın sözügedən ərazi üzərində yurisdiksiyası məsələsini araşdırıb və müəyyən edib ki, Ermənistan Dağlıq Qarabağ və ətraf ərazilər üzərində effektiv nəzarət həyata keçirib.
Ermənistan o zamanlar işğal altında saxladığı Azərbaycanın ərazilərində törədilən istənilən cinayətə görə dövlət məsuliyyətindən qurtulmaq məqsədilə uzun müddət bu ərazilər üzərində heç bir nəzarəti və ya yurisdiksiyası olmadığı mövqeyində olub: "Diplomatik desək, AHİM Ermənistanın dürüst olmadığı qənaətinə gəlib".
Göründüyü kimi, Azərbaycanın hüquq müstəvisində Ermənistana qarşı qazandığı qələbələr, eləcə də beynəlxalq məhkəmələrdə İrəvanın ifşa edilməsi təcavüzkarın törətdiyi cinayət əməllərinə görə cavab verməsini təmin edəcək.
Yasəmən MUSAYEVA,
"Azərbaycan"
