Astaranın Ərçivan qəsəbəsində son illər xeyli işlər görülmüşdür. Qəsəbənin daxilindəki bir neçə məhəllənin yolları asfaltlaşdırılmış, elektrik xətləri yenilənmiş, sürətli internet şəbəkəsi yaradılmış, suötürücü kanallar lildən təmizlənmiş, magistral yolboyu küçə işıqları təmir olunmuş, əkin sahələri genişləndirilmişdir.
Ən mühüm məsələlərdən biri də Ərçivan qəsəbəsi və ümumilikdə rayon üçün böyük əhəmiyyət kəsb edən 26 kilometrlik Çayoba-Astara magistral avtomobil yolunun əsaslı təmir olunaraq asfaltlaşdırılmasıdır. Yolun istismar müddəti başa çatdığından avtomobillərin hərəkəti çətinləşmiş, yol üstündəki suötürücü borular köhnəlmişdi. Güclü yağışlar zamanı sel suları qalxaraq avtomobil yolunu örtür, fərdi təsərrüfatlara və ətraf ərazilərə ziyan vurur, fəsadlar yaradırdı. Avtomobil yolunun əsaslı təmiri ilə bu problemlərin hamısı artıq aradan qaldırılıb.
Qəsəbənin sakinləri zəhmətkeş, torpağa bağlı insanlardır. Bu hesaba əkinəyararlı torpaq sahələrinin istismarı ildən-ilə artır. Bu da rayonda ərzaq bolluğu yaratmaqla yanaşı, sakinlərin ailə büdcəsinə əhəmiyyətli təsir göstərir.
Bu günlər rayon rəhbərliyi qəsəbədə səyyar qəbul-görüş keçirmişdir. Sakinlər əsaslı təmir edilmiş magistral avtomobil yolunun kənarı boyunca yol çiyinlərinin bərabərləşdirilməsinə, bəzi yerlərdə sıradan çıxmış səkilərin bərpa edilməsinə, avtobus dayanacaqlarının qoyulmasına, piyada zolağının çəkilməsinə, şəhid Sadiq Bağırzadə və Sadiq Zeynalovun adını daşıyan küçələrin qalan hissəsinin asfaltlaşdırılmasına, habelə qəsəbədə Qarabağ Şəhidlərinin Xatirə Kompleksinin yaradılmasına, qəsəbədən keçən çayların məcrasının qazılaraq təmizlənməsinə, yeni çəkilmiş internet xətti və dirəklərinin nizama salınmasına, Şuvi kəndinə gedən elektrik xəttində ayırıcı açarın qoyulmasına kömək göstərilməsini xahiş etmişlər.
RİH-in başçısı Qəzənfər Ağayev sakinlər tərəfindən qaldırılan məsələlərin həlli ilə əlaqədar aidiyyəti qurumların rəhbərlərinə tapşırıqlar vermişdir.
Seyran CAVADOV,
"Azərbaycan"
