İqtisadi İslahatların Təhlili və Kommunikasiya Mərkəzinin (İİTKM) nəzdində fəaliyyət göstərən “Enterprise Azerbaijan” portalının rəhbəri İsa Qasımov Daşkənddə keçirilən, Azərbaycan–Özbəkistan əməkdaşlığının yeni perspektivlərinə həsr olunmuş dəyirmi masada ölkəmizi təmsil edib.
Mərkəzdən AZƏRTAC-a bildirilib ki, “Özbəkistan və Azərbaycan: müttəfiqliyin yeni perspektivləri və beynəlxalq əməkdaşlıq” mövzusunda təşkil olunan tədbirdə üç sessiya üzrə siyasi dialoq, regional və beynəlxalq məsələlərdə strateji əməkdaşlıq, iqtisadiyyat, enerji, nəqliyyat, elm, təhsil, mədəniyyət və turizm sahələrində qarşılıqlı fəaliyyət, həmçinin Orta Dəhlizin rolu və Mərkəzi Asiya ilə Cənubi Qafqaz arasında əlaqələrin gücləndirilməsi məsələləri müzakirə olunub.
İsa Qasımov “Özbəkistan–Azərbaycan əməkdaşlığında investisiya və innovasiya perspektivləri” mövzusunda çıxış edərək iki ölkə arasında strateji tərəfdaşlığın yüksələn xətt üzrə inkişaf etdiyini diqqətə çatdırıb. O bildirib ki, Azərbaycan və Özbəkistan iqtisadiyyatları bir-birini tamamlayır və qarşılıqlı investisiya imkanlarının genişləndirilməsi yan sənayelərin inkişafına mühüm töhfə verə bilər.
Çıxışda qeyd olunub ki, son beş ildə iki ölkə arasında xarici ticarət dövriyyəsi orta hesabla 27,7 faiz artıb, bu ilin ilk beş ayında isə göstərici üç dəfədən çox yüksələrək 200 milyon ABŞ dollarını keçib. Hazırda illik ticarət və investisiya hədəfi 1 milyard dollar müəyyən olunub, təxminən 300 birgə müəssisə fəaliyyət göstərir.
İsa Qasımov innovasiya ekosistemi sahəsində əməkdaşlıq imkanlarına da toxunub. O, “Enterprise Azerbaijan” portalı tərəfindən həyata keçirilən startap layihələri və beynəlxalq akselerasiya proqramları barədə məlumat verərək, bu layihələr çərçivəsində hazırda 126 startapın dəstəkləndiyini, ABŞ, Almaniya, Cənubi Koreya və Türkiyə kimi qabaqcıl ekosistemlərlə əməkdaşlıq edildiyini vurğulayıb.
Özbəkistanın IT Park fəaliyyətini yüksək qiymətləndirən portal rəhbəri gələcəkdə birgə vençur fondlarının, inkubasiya və akselerasiya proqramlarının yaradılmasının mümkünlüyünü qeyd edib. O, həmçinin İİTKM tərəfindən nəşr olunmuş “The Middle Corridor: Navigating Current Realities and Embracing Future Prospects” kitabını tədbir iştirakçılarına təqdim edib.
Beynəlxalq dəyirmi masada hər iki ölkəni ümumilikdə 20-dən artıq dövlət qurumu təmsil edib.
