Cari ildə Dövlət Sosial Müdafiə Fondunun (DSMF) xərclərinin ötən ilə nisbətən 807 milyon manat çox olmaqla 8,5 milyard manat, həmçinin dövlət büdcəsinin sosial müdafiə və sosial təminat xərclərinin ötən illə müqayisədə 121,2 milyon manat çox olmaqla 4 milyard 873 milyon manat olması nəzərdə tutulub. Həmin göstəricilər sosial müdafiə sahəsinə ayrılan vəsaitlərdə ciddi artımların 2026-cı ildə də davam etdiyini göstərir.
Bu barədə Əmək və Əhalinin Sosial Müdafiəsi Nazirliyində keçirilən kollegiya iclasında bildirilib.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, əmək və əhalinin sosial müdafiəsi naziri Anar Əliyev Prezident İlham Əliyevin tapşırıqları əsasında son 7 ildə icra edilən 5 sosial islahat paketinin sosial ödənişlərdə ciddi artımlara imkan verdiyini vurğulayıb. Ötən il də növbəti sosial islahat paketi çərçivəsində əməkhaqları, pensiya, müavinət və təqaüdlərdə növbəti artımlar edildiyi bildirilib. Əhalinin sosial müdafiə sisteminin gücləndirilməsi tədbirlərinin davamı olaraq yaxın vaxtlarda 1,1 milyon vətəndaşı əhatə edən pensiyaların təqribən 9 faiz civarında indeksləşdirilərək artırılmasının gözlənildiyi qeyd edilib.
Naxçıvan Muxtar Respublikasında ötən il sosial müdafiə sahəsində görülmüş işlərdən bəhs olunub, habelə son bir ildə muxtar respublikada əvvəlki ilə nisbətən 27 faiz çox olmaqla 6,8 mindən çox şəxsin aktiv məşğulluq proqramları ilə əhatə edildiyi, o cümlədən 950-dək şəxsin özünüməşğulluq proqramına cəlb olunduğu vurğulanıb. Naxçıvan Regional DOST Mərkəzinin yaxın vaxtlarda açılacağı, Şərur, Babək, Culfa, Ordubad, Kəngərli, Sədərək rayonlarında DOST filiallarının yaradılması üçün əsaslı təmir işlərinin, Şahbuz DOST filialının və Naxçıvan DOST İnklüziv İnkişaf və Yaradıcılıq Mərkəzinin yaradılması üçün layihələndirmə işlərinin aparıldığı diqqətə çatdırılıb. Ötən il Əməyin Mühafizəsi Mərkəzinin Naxçıvan filialının fəaliyyətə başladığı, “DOST Müfəttiş” və “Rehabus” layihələrinin muxtar respublikada da həyata keçirildiyi, Naxçıvandakı reabilitasiya mərkəzlərində son bir ildə 1300-dən çox şəxsə stasionar və ambulator şəraitdə reabilitasiya xidmətlərinin göstərildiyi bildirilib.
Ölkəmizdə əmək qanunvericiliyinə əməl olunmasına dövlət nəzarəti sahəsində aparılmış işlərdən və elektron əmək müqaviləsinə keçid prosesindən bəhs olunub. Son bir ildə 842,3 min manat vəsaitin işçilərə ödənilməsinin gecikdirildiyinin müəyyən edildiyi və görülən tədbirlərlə həmin vəsaitin işəgötürənlər tərəfindən işçilərə ödənildiyi, əmək müqavilələrinə qanunvericiliyin tələbləri pozulmaqla xitam verildiyi müəyyən olunan 89 işçinin əvvəlki işlərinə bərpa etdirildiyi diqqətə çatdırılıb.
Ötən il 4 minədək tənha ahıl və əlilliyi olan şəxsə evlərində səyyar formada, 2,3 mindən çox şəxsə sosial xidmət müəssisələrində stasionar formada sosial xidmətlər göstərildiyi, 1620 nəfər imtiyazlı şəxsin sanator-kurort yollayışı təmin edildiyi qeyd olunub. Sosial rifahda mühüm amil olan məşğulluğun təminatı proqramlarının ildən-ilə genişləndirildiyi vurğulanıb. Son bir ildə 567 min şəxsin aktiv məşğulluq tədbirləri ilə əhatə edildiyi, o cümlədən 189 min şəxsin işlə təmin olunduğu, 16,8 min şəxs üçün özünüməşğulluq proqramı üzrə kiçik ailə təsərrüfatlarının yaradıldığı bildirilib.
Keçən il 887 min, ümumən ötən dövrdə 4,1 milyon vətəndaşın DOST mərkəzlərinin xidmətlərindən faydalandığı, DOST mərkəzləri şəbəkəsinin ölkəboyu genişləndirilməsi işləri diqqətə çatdırılıb. Son bir ildə 54,5 min şəxsə əlillik təyin edildiyi, əlilliyi olan 142 min şəxsin reabilitasiya xidmətləri, 13,7 min şəxsin 212 min reabilitasiya vasitəsilə təmin edildiyi qeyd olunub.
İclasda həmin sahələrdə ötən il görülmüş işlər və builki hədəflər müzakirə edilib.
jpeg_1773921437.jpeg)
