Fəaliyyəti ilə Türkiyədə əldə olunan nailiyyətlərin rəmzinə çevrilən Ədalət və İnkişaf Partiyası (AKPartiya) avqustun 14-də 24 yaşını qeyd edir.
AZƏRTAC xəbər verir ki, Prezident Rəcəb Tayyib Ərdoğanın rəhbərlik etdiyi və Türkiyənin aparıcı siyasi qüvvəsi kimi çıxış edən ölkənin sayca 39-cu partiyası 2001-ci ildə yaradılıb və o vaxtdan bəri keçirilən bütün parlament seçkilərində qalib gəlib.
Partiyanın qurucuları “Türkiyədə heç bir şeyin bir daha əvvəlki kimi olmayacağını” bəyan ediblər.
Partiyanın yaranmasından iki gün sonra, avqustun 16-da onun rəhbər heyəti müəyyən edilib. Qurucu nümayəndələrin yekdil qərarı ilə Rəcəb Tayyib Ərdoğan Baş katib seçilib.
Beləliklə, yarandıqdan 15 ay sonra, yəni 2002-ci il noyabrın 3-də keçirilən seçkilərin nəticələri əsasında Türkiyənin 58-ci hökumətini quran siyasi qüvvənin uğur yolu başlayıb.
R.T.Ərdoğanın siyasi fəaliyyət qadağası ilə əlaqədar həmin vaxt AKPartiya hökumətinə Abdulla Gül başçılıq etdi. Yalnız Türkiyə Cinayət Məcəlləsinin 312-ci maddəsinə edilən dəyişiklikdən sonra onun yolundakı sədd götürüldü.
2003-cü il martın 8-də Siirt vilayətində keçirilən seçkilərin nəticələrinə görə parlamentə seçilən Ərdoğan daha sonra (15 mart 2003-cü ildə) ölkənin 59-cu hökumətini qurmaq üçün Prezident Ahmet Necdet Sezerdən mandat aldı. Beləliklə, gənc siyasətçinin rəhbərlik etdiyi siyasi partiya uzun illər ərzində Türkiyənin siyasi arenasının tanınmış liderinə çevrildi.
2025-ci il fevralın 23-də Ankarada AKPartiyanın səkkizinci qurultayı keçirilib və ondan sonra partiya nizamnaməsinin 81-ci maddəsinə dəyişiklik edilib. Beləliklə, Ərdoğanın partiyası müasir dövrün çağırışları və tələbləri fonunda zamanla ayaqlaşmağa hazır olduğunu nümayiş etdirib.
Digər məsələlərlə yanaşı, partiyanın Baş katibinin türk dövlətləri ilə əməkdaşlıq üzrə müavini vəzifəsi də təsis edilib.
jpg_1765830577.jpg)
jpg_1765830356.jpg)
