Səudiyyə Ərəbistanı Krallığının Ər-Riyad şəhərində BMT-nin Sivilizasiyalar Alyansı tərəfindən təşkil edilən “Çoxqütblü dünyada bəşəriyyət naminə dialoqda qarşılıqlı hörmət və anlaşmanın yeni erası” mövzusuna həsr olunmuş XI Qlobal Forumun açılış mərasimi keçirilib.
Qafqaz Müsəlmanları İdarəsinin (QMİ) mətbuat xidmətindən AZƏRTAC-a bildirilib ki, açılış mərasimində əvvəlcə Səudiyyə Ərəbistanı Krallığının xarici işlər naziri Feysəl bin Fərhan Al Səud, BMT-nin Baş katibi Antonio Quterreş, BMT-nin Sivilizasiyalar Alyansının ali nümayəndəsi, BMT-nin İslamofobiya məsələləri üzrə xüsusi nümayəndəsi Migel Anhel Moratinos, İspaniyanın inklüzivlik, sosial təhlükəsizlik və miqrasiya naziri Elma Saiz Delqado, Tükiyənin keçmiş Baş naziri, Böyük Millət Məclisinin sabiq sədri Binəli Yıldırımın çıxışları dinlənilib.
Forumda Azərbaycanı mədəniyyət naziri Adil Kərimli, Dini Qurumlarla İş üzrə Dövlət Komitəsinin (DQİDK) sədri Ramin Məmmədov və QMİ-nin sədri şeyxülislam Allahşükür Paşazadə təmsil ediblər.
Tədbir çərçivəsində, həmçinin iclaslar, plenar sessiyalar və bir sıra görüşlər keçirilib.
DQİDK-nın sədri Ramin Məmmədov BMT-nin Sivilizasiyalar Alyansının Dostları Qrupunun Yüksəksəviyyəli iclasında iştirak edib.
Şeyxülislam Allahşükür Paşazadə isə İordaniya şahzadəsi Rim Alinin moderatorluq etdiyi "Bəşəriyyətə İnam: Dinlərarası Dialoq Sülh və Bir Bəşəriyyət yoluna aparan körpüdür" adlı plenar sessiyada çıxış edib. QMİ sədri forum iştirakçılarına Prezident İlham Əliyevin salamlarını çatdıraraq, BMT Sivilizasiyalar Alyansının qlobal problemlərin həllində mühüm beynəlxalq platforma olduğunu vurğulayıb. O, Azərbaycanın multikulturalizm və dinlərarası tolerantlıq modelinə əsaslanan əməkdaşlığının Bakı Prosesi və Ümumdünya Mədəniyyətlərarası Dialoq forumları çərçivəsində uğurla davam etdiyini bildirib. Şeyxülislam Azərbaycanın Alyansın VII Qlobal Forumuna ev sahibliyini, eləcə də Qarabağda dini-mənəvi irsin bərpası və ölkəmizin qlobal sülh təşəbbüslərində fəal rolunu qeyd edib.
Sessiyada İCESCO-nun Baş direktoru Səlim bin Məhəmməd əl-Malik, Ekumenik kilsənin baş Mitropoliti Emanuil Adamakis, KAİSİD Beynəlxalq Dialoq Mərkəzinin baş katib əvəzi Antonio Almeyda Ribeyro və başqaları da çıxış ediblər.
QMİ sədrinin Forum çərçivəsində, həmçinin Səudiyyə Ərəbistanı Krallığı xarici işlər nazirinin müavini Vəlid Əlxreyci, BMT Baş Katibinin müavini Migel Anhel Moratinos, İCESCO-nun Baş direktoru Səlim bin Məhəmməd əl-Malik, Ekumenik kilsənin baş Mitropoliti Emanuil Adamakis, Türkiyənin keçmiş baş naziri Binəli Yıldırım və Özbəkistanın İslam Sivilizasiyası Mərkəzinin rəhbəri Firdaus Abdulxalikov ilə ikitərəfli görüşləri olub. Görüşlərdə əməkdaşlıqların səviyyəsindən məmnunluq ifadə edilib, qarşıdakı fəaliyyətlər barədə fikir mübadiləsi aparılıb.
jpg_1767721203.jpg)
jpg_1767211798.jpg)
