Döyüş tapşırığını icra edən əsgərin mobil telefon nəyinə gərəkdir?!
Bütün dünya kimi, biz azərbaycanlılar da yeni bir xəstəliyə mübtəla olmuşuq!
COVID-19-u demirik!
Mobil telefon xəstəliyini nəzərdə tuturuq!
Hara getsək, özümüzlə əl telefonunu aparırıq...
Boş vaxt tapan kimi onu açıb qurdalayırıq...
Hər gün bu vərdiş-xəstəliyə saatlarla vaxtımızı "uf" demədən sərf edirik...
Hələ bu harasıdır...
Gözümüzə nə görünsə, telefonla şəklini çəkərək internetdəki müxtəlif platformalara yerləşdiririk!
Ağlımıza nə gəlsə, statusa çevirərək "dostlarımız"la paylaşırıq.
Bəzən xoşumuza gəlməyən hər hansı bir məsələyə ağlımız kəsən tərzdə, fərqinə varmadan münasibət bildiririk və öz fikirlərimizi "mütləq həqiqət" hesab edirik!
Hərdən əsəbiləşəndə kimisə söyməkdən, təhqir etməkdən belə çəkinmirik!
Yazdıqlarımızı və çəkdiklərimizi, söydüklərimizi və aşağıladıqlarımızı hansısa bir azərbaycanlı xanımın da görə və oxuya biləcəyini ağlımızın ucundan belə keçirmirik!
Əl boyda əl telefonunun bizə verdiyi imkandan kefimiz istəyən şəkildə, heç kəsə və heç nəyə məhəl qoymadan istifadə edirik!
Axı niyə də olmasın!
Telefon da bizimdir, ona yüklənən kontur da, üstəlik, batareyasına doldurulan elektrik enerjisi də!
Ölkəmizdə də maneəsiz və hüdudsuz söz, fikir azadlığı mövcuddur!
Keçmişdə deyildiyi kimi, "Ağanəzərəm, belə gəzərəm!"
***
Bəli, demokratik ölkədə hər kəs səviyyəsinə uyğun düşünüb danışır, tərbiyəsinə uyğun söz və ifadə seçir, əqidə və məsləkinə müvafiq mövqe nümayiş etdirir!
Olsun!
Bu məsələdə tam sərbəstlikdir!
AMMA...
Bizim dediyimiz söz, çəkib sosial şəbəkəyə qoyduğumuz şəkil, sərgilədiyimiz mövqe milli maraqlara zidd gəlirsə, dövlətimizə zərər verə bilərsə, onda necə olsun?!
Belədə isə təkcə söz, fikir azadlığı ilə iş bitmir!
Lovğalanaraq çəkdiyimizin heç kəsin görmədiyini, dediyimizin kimsənin bilmədiyini zənn ediriksə və nəticədə düşmənə sirrimizi faş ediriksə, bizim şəkillərdən fakt kimi bəhrələnmələrinə imkan və şərait yaradırıqsa, onda biz kim oluruq və əməlimiz hansı əməl sayılır?!
Dördgünlük Aprel müharibəsini yada salaq!
Nə qədər adam sevinərək və lovğalanaraq zirehli texnikalarımızın dislokasiyasını əks etdirən süjetlər çəkib düşmənə "hədiyyə" etdilər!
Nə qədər "çoxbilmiş" canlı qüvvə aparan maşın kolonlarının şəklini çəkib sevinclə düşmənə göstərdi!
Bununla da kimə və nəyə xidmət etdi?!
Qələbəyə töhfə verdi, yoxsa itkilərə səbəb oldu?!
Nə olar, gəlin ağılla düşünək, hadisələrə ayıq nəzərlərlə baxaq!
Əslində, bunlar maraqlı çəkilişlərdir, yoxsa xəyanət əməlləridir?!
Heç kimə "xain" damğası vurmaq fikrində deyilik!
Lakin etdiklərimiz buna aparırsa, əməllərimiz xəyanət əməllərindən fərqlənmirsə, belə hərəkətlərə başqa nə ad vermək olar?!
Axı müharibə və mübarizə hələ tam başa çatmayıb!
Axı düşmənimiz arxalıdır, dostları, müdafiəçiləri çoxdur!
Axı dünyada hələ də ikili standartlar var və bizə olunanları görməyənlər erməniyə edilənləri göydə qamarlayıb dərhal əleyhimizə yönəldirlər!
Belə qurum və təşkilatlara göydə axtardıqları "faktlar"ı əlimizlə təqdim edərək özümüzə qarşı çevirmələrinə şərait yaratmalıyıqmı?!
Bu bizə lazımdır?!
Nə qədər demək, izah etmək, başa salmaq olar?
Dinəndə hamı vətənpərvərlikdən danışır, torpaqların işğaldan azad edilməsindən qürur duyduğunu söyləyir...
Əməldə isə düşmən dəyirmanına su tökür!
Daha nə etmək lazımdır ki, bu xəstəlikdən sağalaq, həqiqi vətənpərvər kimi düşünərək hərəkət edək?!
***
"Mülki əhali"ni başa düşdük...
Qaldı onların da bizi anlamaları!
Bəs hərbçilərə nə deyəsən?!
Nə qədər təkrarlamaq, qadağan etmək olar ki, hərbi tapşırıqları icra edərkən mobil telefonlarla çəkilişlər aparmayın!
Nə qədər demək olar ki, gördüyünüzü çəkib sosial şəbəkəyə qoymayın, bunlar hərbi sirdir, belə etmək olmaz!
Nə qədər cəzalandırmaq olar!
Yaxınlarda daha iki hərbçimiz telefonla çəkiliş apardıqları üçün ordudan xaric edildilər!
Çox gözəl, belə qəti və qətiyyətli olmaq lazımdır!
Yenidən belə halla rastlaşanda isə təəccüblənməyə bilmirsən!
Bu hamıya dərs olmadımı?!
Görünür, olmur!
Odur ki, ordu rəhbərliyi daha qəti və təsirli addımlar atmalıdır!
Əsgər kazarmasında mobil telefon olmamalıdır!
Hərbi tapşırığı icraya gedən əsgər və zabitlər özləri ilə mobil telefonlar aparmamalıdırlar!
Heç bir hərbçi özbaşına nəyisə çəkib sosial şəbəkəyə qoymamalıdır!
Ən nəhayət, bütün bunlara nail olmaq üçün nizamnamədə zəruri dəyişikliklər aparılmalıdır!
Belə çəkiliş edənlər qanunla cəzalandırılmalıdırlar!
Bunu vəziyyət tələb edir!
Bunu hələ başa çatmayan informasiya müharibəsi tələb edir!
Bunu müstəqil Azərbaycanın maraqları tələb edir!
İndi isə qəti söz Azərbaycan Ordusunun rəhbərliyinindir!
Bəxtiyar SADIQOV
jpeg_1765897678.jpeg)
