ABŞ Konqresinin Nümayəndələr Palatasının Xarici İşlər Komitəsində "Dağlıq Qarabağın gələcəyi" mövzusunda dinləmələrin keçirilməsində adama gülməli gələn odur ki, konqres ermənilər üçün heç bir keçmişi olmayan "artsax"ın gələcəyini müzakirə edir. Gör nə böyük məntiqsizlikdir. Axı keçmişi olmayan bir qurumun gələcəyi necə ola bilər?
Təbii ki, bu, ABŞ-nin Azərbaycana münasibətdə ədalətsiz mövqeyinin növbəti səhifəsidir. Bu mənasız dinləmələrin absurdluğu dünyanın ən avam adamına belə gün kimi aydındır. Bu dinləmənin özü bütövlükdə yanlış addımdır. Bir ölkənin ərazisində yaradılmış qondarma qurumu başqa bir ölkənin müzakirə etməsi hansı məntiqə sığır? Bu, Azərbaycanın suverenliyinə, beynəlxalq hüquqa ən böyük hörmətsizlik deyilmi?
Vaşinqton bu gün Qərb ölkələri ilə baş-başa verib Azərbaycana qarşı qərəzli mövqeyinə yeni ilmələr vurur. Qərb ölkələri bu ilmələrdən həvəsə gələrək artıq bitmiş Qarabağ münaqişəsi ətrafındakı vəziyyəti anlamaq istəmədən ölkəmizə qarşı bədxah addımlar atırlar. Onlar birinci növbədə Ermənistanla Rusiyanın arasını vurmağa çalışırlar. Bəhanələri də odur ki, Rusiya Ermənistana xəyanət etdi, Qarabağ hadisələrində onu sonadək dəstəkləmədi. Yəni Azərbaycana qarşı çıxmadı. Anlamaq istəmirlər ki, axı işğalçı Ermənistanı necə dəstəkləmək olar? Azərbaycan istər müharibəni, istərsə də antiterror tədbirlərini öz suveren ərazisində, beynəlxalq səviyyədə tanınmış sərhədləri daxilində aparıb, heç bir ölkənin ərazisinə ayaq basmayıb.
Təəssüfləndirici odur ki, ABŞ uzun illər rəsmi Bakının müxtəlif vacib məsələlərdə qarşılıqlı əməkdaşlığını və dəstəyini unudaraq Cənubi Qafqazın lider ölkəsi olan Azərbaycanla münasibətinə xələl gətirdi. Azərbaycan ABŞ-nin Əfqanıstanda əməliyyatlar apardığı zaman baza ölkələrindən biri olub. Bundan başqa, Bakı beynəlxalq səviyyədə Əfqanıstan, İraq və digər ölkələrdə həyata keçirilən əməliyyatları həmişə dəstəkləyib. ABŞ əvvəlki illərdə Azərbaycanla daha yaxın münasibətlərin formalaşmasına, qarşılıqlı əməkdaşlığın inkişafına müəyyən töhfələr verib. Vaşinqton regionda Azərbaycanın transmilli enerji layihələrinin, ilk növbədə, Bakı-Tibilisi-Ceyhan boru kəmərinin və "Cənub qaz dəhlizi"nin uğurla reallaşdırılmasını dəstəkləyib.
Bəs Azərbaycan Ordusunun Qarabağdakı separatçılara qarşı uğurla həyata keçirdiyi antiterror əməliyyatlarından sonra Birləşmiş Ştatların birdən-birə hadisələrin gedişatındakı mövqeyinin belə kəskin və qəflətən dəyişməsinin arxasında hansı gizli məqsədlər dayanır? Nədən ABŞ Cənubi Qafqazda söz sahibi olan Azərbaycana öz ərazi bütövlüyünü təmin edən addımlar atdığına görə belə bir qısqanc münasibət göstərir? Hələ özü azmış kimi, Qərb ölkələrini də başına toplayır.
Ötən illərdən yaxşı bilirik ki, istər ABŞ, istərsə də Qərb ölkələri tarixə qovuşmuş Ermənistan-Azərbaycan Dağlıq Qarabağ münaqişəsinin həlli istiqamətində tutduğu mövqe ədalətli deyildi. ABŞ keçmiş ATƏT-in Minsk qrupunun həmsədrlərindən biri kimi ərazilərimizin işğalı, etnik təmizləmə, milli-mədəni irsimizin məhv edilməsi, sərvətlərimizin talanmasına göz yumurdu. 30 il ərzində bir dəfə də olsun işğalçı Ermənistanı qınamayan ABŞ 1992-ci ildə Azərbaycana qarşı 907-ci düzəlişi qəbul etdi. Təbiidir ki, Vaşinqtonun sülhə, qarşılıqlı əməkdaşlığa xidmət etməyən addımları həm tarixdə, həm də Azərbaycan xalqının yaddaşında həmişəlik qalacaq.
Bəlkə də qərəzli mövqeləri ilə bir-birindən seçilməyən Vaşinqton və Qərb ölkələri hesab edirlər ki, Azərbaycanla təhdid dilində danışa bilərlər. Əgər belə düşünürlərsə, çox böyük səhv edirlər. Qoy unutmasınlar ki, rəsmi Bakı ona nəyi isə diktə etmək istəyənlərə həmişəki kimi, bundan sonra da layiq olduğu yeri göstərəcək.
Azərbaycan öz ərazisindən erməni separatizmi kimi qara bir yaranı kəsib atdıqdan və bununla da Ermənistanla münaqişəni bitirdikdən sonra Qərbin, o cümlədən Birləşmiş Ştatların regionda vasitəçi kimi iştirakına yer qoymadı. Bu fakt həm ABŞ-ni, həm də ona züy tutan Qərb ölkələrini ciddi narahat etməyə başladı. Çünki Qərbin və Birləşmiş Ştatların regiona hərbi qüvvə yerləşdirmək üçün əllərində bəhanələri qalmadı. Dünya açıq-aydın görür ki, bölgədə hər hansı bir hərbi kontingentin iştirakına ehtiyac yoxdur. Bütün bunlar Qərbin və ABŞ-nin məkrli planlarının iflası deməkdir. Buna görə də ABŞ və Qərb ölkələri köməkləşərək ölmüş "artsax"ı qəbirdən çıxarmaq istəyirlər. Bu məqsədlə keçmişi olmayan bir qondarma qurumun gələcəyini müzakirə edirlər.
ABŞ-nin və Qərb ölkələrinin Azərbaycana qarşı olan qərəzli mövqelərini götür-qoy edəndə böyük yazıçımız Cəlil Məmmədquluzadənin Şeyx Nəsrullahı yada düşür. Bu gün ABŞ və bir sıra Qərb ölkələri dünyanın siyasi səhnəsində Şeyx Nəsrullahlıq etmək istəyirlər. Artıq tarixin arxivinə tullanmış, özü-özünü buraxdığını rəsmən elan etmiş qondarma qurumu diriltməyə çalışırlar. Daha fikirləşmirlər ki, ölənlər dirilmir.
Vahid MƏHƏRRƏMOV,
"Azərbaycan"
jpg_1766048684.jpg)
