Birinci vitse-prezident Mehriban Əliyeva nəcib təşəbbüsləri ilə ölkəmizdən kənarda da yüksək hörmət qazanıb
Şərqlə Qərbin arasında tarixən iqtisadi, siyasi, elmi və mədəni körpü rolu oynayan Azərbaycan bu sivilizasiyaların həm də vəhdətinin bariz nümunəsidir. Ölkəmiz əsrlərdir ki, multikulturalizm və dini tolerantlıq ənənələrinə sadiqliyi ilə dünyada təqdir olunur. Azərbaycan bir çox millətlərin və konfessiyaların dinc, yanaşı yaşamasının unikal nümunəsi kimi bütün dünyada tanınır.
Dünyanın ən qədim xalqlarından olan, zəngin tarixi, özünəməxsus mədəniyyəti, milli-mənəvi dəyərləri ilə seçilən Azərbaycan xalqına xas əsas cəhətlərdən biri də xeyirxahlıqdır.
Birinci vitse-prezident, Heydər Əliyev Fondunun prezidenti Mehriban Əliyeva çoxşaxəli fəaliyyəti ilə ölkəmizin, xalqımızın belə yüksək tarixi ənənələrə, zəngin milli-mənəvi dəyərlərə malik dövlət kimi beynəlxalq aləmdə tanıdılmasında böyük rol oynayır. Mehriban Əliyevanın Müqəddəs Taxt-Taca - Vatikana rəsmi səfəri də bu baxımdan olduqca əhəmiyyətlidir.
Azərbaycan Respublikasının Birinci vitse-prezidentinin Müqəddəs Taxt-Taca - Vatikana rəsmi səfəri, eyni zamanda ölkəmizimin multikulturalizm siyasətinə və dini tolerantlığa verdiyi önəmin daha bir nümunəsidir.
Mehriban xanım Əliyeva qlobal təşəbbüsləri ilə dünya miqyasında tanınır. Rəhbərlik etdiyi Heydər Əliyev Fondunun uzun illərdir ki, həyata keçirdiyi tarixi, mədəni və dini irsin qorunmasına xidmət edən çoxsaylı layihələri yalnız ölkəmizlə məhdudlaşmır. Respublikamızın sərhədlərindən kənarda da Mehriban Əliyevanın təşəbbüsü ilə Heydər Əliyev Fondu bu istiqamətdə təqdirəlayiq işlər görür. Bunlardan biri də Vatikanda mədəni və dini irsin qorunmasına verilən töhfələrdir.
Heydər Əliyev Fondunun dəstəyi ilə artıq on ildən çoxdur ki, Vatikanda mühüm tarixi əhəmiyyət daşıyan dini abidələr bərpa olunur. Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın nəcib təşəbbüsü ilə Vatikanda bəşəri əhəmiyyət daşıyan bir sıra tarixi abidələrin bərpası, mədəni irsin qorunması sahəsində aparılan işlər yüksək səviyyədə davam etdirilib. Uğurlu nəticələr artıq göz qabağındadır. Belə ki, Heydər Əliyev Fondunun dəstəyi sayəsində ötən illər ərzində Vatikanda Müqəddəs Marçellinio və Pietro katakombalarının, Müqəddəs Pyotr Kilsəsində "Roma Papası I Leon ilə Hun imperatoru Atillanın görüşü" barelyefinin bərpası, Müqəddəs Sebastian Bazilikasında yeni muzeyin yaradılması, sarkofaqların restavrasiyası və digər layihələr reallaşdırılıb. Müqəddəs Kommodilla katakombalarının bərpası layihəsi də bu qəbildəndir. Qeyd edək ki, Müqəddəs Kommodilla katakombalarında qorunan ən mühüm abidələrdən ikisi olan Müqəddəs Feliks və Adauktusun yeraltı bazilikasındakı freskalarında və Leo kubikulundakı freskalarda bərpa işləri tamamlanıb.
Müqəddəs Taxt-Taca - Vatikana rəsmi səfərə gedən Azərbaycan Respublikasının Birinci vitse-prezidenti, Heydər Əliyev Fondunun rəhbəri Mehriban Əliyeva bərpa edilən abidələr və incəsənət nümunələri ilə tanış olub, Vatikanda bir sıra mühüm görüşlər keçirib.
Oktyabrın 16-da Birinci vitse-prezident, Heydər Əliyev Fondunun prezidenti Mehriban Əliyeva, Müqəddəs Arxeologiya üzrə Pontifik Komissiyasının prezidenti Monsenyor Paskuale Yakabone, Vatikan Dövlətinin Mədəniyyət üzrə Pontifik Şurasının sabiq prezidenti Kardinal Canfranko Ravazi və digər rəsmi şəxslərin iştirakı ilə Vatikanda Müqəddəs Kommodilla katakombalarının bərpası layihəsinin açılışı olub.
Vatikanın Müqəddəs Arxeologiya üzrə Pontifik Komissiyasının prezidenti Monsenyor Paskuale Yakobone Birinci vitse-prezident Mehriban Əliyevanın uzun illərdir başçılıq etdiyi komissiya ilə çox yaxından və səmərəli əməkdaşlıq etdiyini vurğulayıb. O, bu layihənin həyata keçirilməzdən əvvəl Azərbaycan tərəfi ilə iki digər mühüm layihənin icra olunduğunu diqqətə çatdırıb. Müqəddəs Marçelino və Pietro, eyni zamanda Müqəddəs Sebastian katakombalarının bərpasına Heydər Əliyev Fondunun səyləri nəticəsində nail olduqlarını bildirib: "Heydər Əliyev Fondunun dəstəyi ilə bir tərəfdən mürəkkəb, lakin digər tərəfdən bizi çox ilhamlandıran, böyük enerji verən bərpa işlərini birgə həyata keçirdik".
Müqəddəs Arxeologiya üzrə Pontifik Komissiyasının sabiq prezidenti kardinal Canfranko Ravazi ölkəmizə səmimi və dərin dostluq telləri ilə bağlı olduğunu, Azərbaycana üç dəfə səfər etdiyini, səfərlər çərçivəsində Prezident İlham Əliyev tərəfindən qəbul olunduğunu və məhz onun qərarı ilə Azərbaycan dövlətinin ən yüksək mükafatlarından birinə - "Dostluq" ordeninə layiq görüldüyünü deyib. Canfranko Ravazi Birinci vitse-prezident Mehriban Əliyeva ilə səmimi dostluq və qarşılıqlı hörmət münasibətlərindən də danışıb: "Təşkil etdiyimiz səfərlərdə Birinci vitse-prezidentin arxeologiya sahəsinə xüsusi bağlılığının şahidi olduq. Çünki səfərlər çərçivəsində bərpaolunan yerləri şəxsən özü ziyarət edirdi. Əlbəttə ki, onun dəstəyi sayəsində, Heydər Əliyev Fondunun göstərdiyi yardım nəticəsində bu gün katakombaların açılışında əməkdaşlığımızın yeni bir səhifəsini yazırıq. Görülmüş işlərə görə Birinci vitse-prezidentə dərin təşəkkürümü bildirirəm".
Azərbaycanın Birinci vitse-prezidenti Mehriban Əliyeva Müqəddəs Taxt-Taca növbəti səfərindən böyük şərəf hissi duyduğunu bildirib. Heydər Əliyev Fondunun prezidenti bunun son 14 ildə Vatikana altıncı səfəri olduğunu qeyd edib.
Ölkəmizin əsrlər boyu müxtəlif dinlərin və mədəniyyətlərin nümayəndələrinin birgə sülh, qarşılıqlı hörmət, tolerantlıq və harmoniya şəraitində yaşayan bir məkan olduğunu qeyd edən Mehriban Əliyeva vurğulayıb ki, bu gün bu prinsiplər həm bizim dövlət siyasətimizin əsasıdır, həm də həyat tərzimizdir: "Əminəm ki, bugünkü mürəkkəb dünyada dövlətlərimiz arasında genişlənən əməkdaşlıq, dostluq əlaqələri bir nümunədir".
Həm Vatikanda, həm də Azərbaycanda bu layihələrdə əməyi olan şəxslərə dərin minnətdarlığını ifadə edən Mehriban xanım Əliyeva deyib: "Heydər Əliyev Fondu olaraq gələcəkdə əməkdaşlığımızı davam etdirməyə maraqlıyıq və hazırıq. İnanıram ki, bu fəaliyyət davamlı olacaq".
Qeyd edək ki, Heydər Əliyev Fondunun uzun illərdir ki, həyata keçirdiyi layihələr Azərbaycanın dünya mədəni və dini irsinə, o cümlədən multikulturalizm və dinlərarası dialoq ideyalarına dəstəyinin təzahürüdür.
Birinci vitse-prezident Mehriban Əliyevanın Müqəddəs Taxt-Taca - Vatikana rəsmi səfəri çərçivəsində keçirdiyi yüksəksəviyyəli görüşlər ölkəmizin dini konfessiyalararası qarşılıqlı anlaşma və əməkdaşlıq ideylarına sadiqliyini bir daha nümayiş etdirib.
Zöhrə FƏRƏCOVA,
"Azərbaycan"
