12 Mart Azərbaycan Respublikasının Daxili Qoşunları Günüdür. Qeyd edək ki, 1992-ci ilin 12 mart tarixində müstəqil respublikamızın Daxili Qoşunlarının bölmələri ilk dəfə olaraq erməni işğalçılarına qarşı döyüşlərə başlayıblar. Xalqımızın Ulu Öndəri Heydər Əliyevin 1995-ci il martın 9-da imzaladığı fərmanla bu tarix Azərbaycan Respublikasının Daxili Qoşunları Günü elan edilib.
Peşəkarlıq və döyüş hazırlığı hər zaman yüksək səviyyədədir
Müstəqillik illərində Daxili Qoşunların Azərbaycan Respublikası Daxili İşlər Nazirliyinin müstəqil struktur hissəsi kimi yaranması və formalaşması ölkəmizin çox çətin, qarışıq bir dövrünə təsadüf etsə də, onun şəxsi heyəti Azərbaycanın ərazi bütövlüyü uğrunda döyüşlərdə qəhrəmanlıq nümunələri göstərmişdir. İlk dəfə 1992-ci il martın 12-də erməni işğalçılarına qarşı hərbi əməliyyatlara başlayan Daxili Qoşunların hərbi hissələri ölkəmizin ərazi bütövlüyü uğrunda qəhrəmancasına döyüşüblər. Birinci Qarabağ müharibəsində Daxili Qoşunların hərbi qulluqçularından 682 nəfər şəhid olub, 1179 nəfər yaralanıb, 4 nəfər itkin düşüb. 9 hərbçi Azərbaycanın Milli Qəhrəmanı (8-i ölümündən sonra) fəxri adına layiq görülüb. Daxili Qoşunların Azərbaycan xalqına, dövlətinə və dövlətçiliyinə sədaqətlə xidmət etməsi, fədakarlığı Ümummilli Lider Heydər Əliyevin və Prezident İlham Əliyevin diqqətindən kənarda qalmayıb və bir çox hərbi qulluqçu ali dövlət orden və medalları ilə təltif olunub.
Yarandığı gündən dövlətin təhlükəsizliyinin qorunması naminə əzmkarlıq göstərən Daxili Qoşunların inkişaf və yüksəliş yolunun təməli isə xalqımızın Ümummilli Lideri Heydər Əliyevin respublikamıza rəhbərliyə başlamasından sonra qoyulub. Ulu Öndərin xüsusi diqqət və qayğısı nəticəsində Daxili Qoşunlar müasir maddi-texniki bazaya, yüksək döyüş hazırlığına malik hərbi quruma çevrilib. Daxili Qoşunların xidməti fəaliyyəti ictimai qaydanın və təhlükəsizliyin təmin olunmasına, silahlı cinayətkarların zərərsizləşdirilməsinə, mühüm dövlət obyektlərinin mühafizəsinə yönəlib, onun təyinatından irəli gələn vəzifələrin icrası ilə bağlı qabaqcıl beynəlxalq təcrübə öyrənilib, xarici ölkələrin müvafiq qurumları ilə hərbi əməkdaşlıq əlaqələri qurulub, geniş quruculuq işləri aparılıb, Daxili Qoşunların tərkibində Hərbi İnstitut, təlim mərkəzləri, helikopter eskadrilyası yaradılıb.
Ötən dövrdə Prezident İlham Əliyevin xüsusi diqqəti və nəzarəti altında respublikamızın Silahlı Qüvvələrində həyata keçirilən modernləşmə DİN Daxili Qoşunlarını da əhatə edib. Bunun sayəsində Azərbaycanın Daxili Qoşunları qarşıya qoyulan xidməti-döyüş tapşırıqlarını yüksək səviyyədə yerinə yetirməyə qadir silahlı birləşmə kimi peşəkarlığını və hərbi hazırlığını daha da artırıb. Bütün hərbi hissə və bölmələr döyüş hazırlığına və maddi-texniki bazasına görə dünyanın qabaqcıl ölkələrinin müvafiq qurumları ilə müqayisə edilə bilən səviyyəyə yüksəlib.
Respublikamızda həyata keçirilən dövlət əhəmiyyətli tədbirlərdə, habelə beynəlxalq yarışlarda ictimai asayişin mühafizəsi və təhlükəsizliyin qorunmasının təmin olunmasında Daxili Qoşunların şəxsi heyəti də fəal iştirak edib. Belə ki, "Avroviziya-2012" Mahnı Müsabiqəsi, I Avropa Oyunları, IV İslam Həmrəyliyi Oyunları, "Formula-1" yarışları zamanında ictimai asayişin mühafizəsində və təhlükəsizliyin təmin olunmasında Daxili Qoşunlar peşəkar xidmət həyata keçirib.
Vətən müharibəsi və antiterror tədbirləri Daxili Qoşunların yeni qəhrəmanlıq səhifələri oldu
2020-ci il sentyabrın 27-də başlayan Vətən müharibəsində isə ilk saatlardan döyüşə atılan Daxili Qoşunların hərbi qulluqçuları Ali Baş Komandanın müsəlləh əsgərləri kimi torpaqlarımızın azad edilməsinə, erməni işğalçıları üzərində şanlı Zəfərin qazanılmasına mühüm töhfələr verdilər. Ən ağır döyüşlərdə, ən çətin əməliyyatlarda, o cümlədən Şuşanın azad edilməsində iştirak edən Daxili Qoşunların hərbçiləri öz peşəkarlıqları və vətənpərvərlikləri ilə Vətən müharibəsinin möhtəşəm qəhrəmanlıq nümunələrini yaratdılar. Cəbhənin bütün istiqamətlərində düşmənə qarşı igidliklə vuruşaraq, torpaqlarımızın azad olunması üzrə döyüş tapşırıqlarını öz canı və qanı bahasına yerinə yetirdilər, yüksək vətənpərvərlik, peşəkarlıq və müasir döyüşaparma qabiliyyəti nümayiş etdirərək, "dəmir yumruq"la işğalçının başını əzdilər.
44 gün davam edən Vətən savaşında Daxili Qoşunların şəxsi heyətindən 66 nəfər şəhidlik məqamına ucaldı, 346 nəfər hərbi qulluqçu yaralandı. Prezident İlham Əliyevin 9 dekabr 2020-ci il tarixli müvafiq sərəncamı ilə respublikamızın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirərkən göstərdikləri qəhrəmanlıq nümunəsinə, həmçinin hərbi qulluq vəzifəsini yerinə yetirərkən igidlik və mərdlik nümayiş etdirdiklərinə görə Daxili Qoşunların 4 nəfər hərbi qulluqçusu - polkovnik Zəfər Yusibov, polkovnik Füzuli İmrəliyev, polkovnik-leytenant Nicad Bədəlov və mayor Şixamir Qaflanova (ölümündən sonra) "Vətən Müharibəsi Qəhrəmanı" adı verilib.
19-20 sentyabr 2023-cü ildə Qarabağda Ermənistan ordusunun bölmələrinə və separatçılara qarşı keçirilən antiterror tədbirlərində də Daxili İşlər Nazirliyinin Daxili Qoşunlarının hərbçiləri böyük qəhrəmanlıqlar göstərdilər. Ərazilərimizdəki erməni separatizminə son qoyulması ilə başa çatan antiterror tədbirlərində Daxili Qoşunların şəxsi heyətindən 12 nəfər şəhid oldu, 24 nəfər yaralandı.
Həm 44 günlük müharibədə, həm antiterror tədbirlərində qazanılan zəfərlər Daxili Qoşunların döyüş əzminin, rəşadətinin, yüksək hərbi-texniki, mənəvi-psixoloji hazırlığının və peşəkarlığının təcəssümü oldu. Qoşunların zabitlərinin, gizirlərinin və əsgərlərinin yaratdıqları qəhrəmanlıq salnamələri hər zaman bu qurumun fəaliyyətinin istinad mənbələri olacaq.
44 günlük savaşdan və antiterror tədbirlərindən sonra Daxili Qoşunların fəaliyyətində yeni şərəfli missiya başlayıb. Belə ki, hazırda işğaldan azad edilmiş ərazilərdə ictimai qaydanın və təhlükəsizliyin təmin olunmasında, mühüm əhəmiyyətli obyektlərin mühafizəsində, Böyük qayıdış proqramının uğurla reallaşmasında, Prezident, Ali Baş Komandan İlham Əliyevin qarşıya qoyduğu bütün vəzifələrin vaxtında və yüksək keyfiyyətlə yerinə yetirilməsində Daxili İşlər Nazirliyinin strukturlarından biri kimi Daxili Qoşunlar şərəfli xidmət həyata keçirir.
Azərbaycan Daxili İşlər Nazirliyinin Daxili Qoşunları yarandığı gündən çətin və şərəfli yol keçib. Torpaqlarımızın azad olunmasında qəhrəmanlıq göstərən, qarşısında dayanan bütün vəzifələri layiqincə yerinə yetirən Daxili Qoşunlar hər zaman dövlətə və xalqa şərəflə xidmət edəcək.
Rəşad CƏFƏRLİ,
"Azərbaycan"
