Azərbaycan Respublikasının Prezidenti İlham Əliyevin indiyə qədər tarix qarşısında yerinə yetirdiyi ən böyük missiya torpaqlarımızın azadlığıdır. Hələ 2003-cü ildə ilk dəfə Prezident seçilən zaman Azərbaycan xalqına müraciət edərkən dövlət başçısı demişdi ki, nəyin bahasına olursa-olsun biz öz tarixi torpaqlarımızı düşmənin əlindən alacağıq.
İstər sülh yolu ilə, istər müharibə yolu ilə: "...Azərbaycanın torpaqları işğaldan azad olunmalıdır, bir milyondan artıq qaçqın və köçkün öz doğma yurdlarına qayıtmalıdır, ölkəmizin ərazi bütövlüyü bərpa edilməlidir. Azərbaycan heç vaxt bu vəziyyətlə, torpaqlarının işğal altında qalması ilə barışmayacaqdır. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyildir... Mən bu böyük etimadı doğruldacağam, bu vəzifənin öhdəsindən layiqincə gələcəyəm!"
Xalq anlayırdı ki, tarixi-siyasi, coğrafi şəraitdən, siyasi sistemin xüsusiyyətindən asılı olmayaraq, liderlik fenomeni milli dövlətin formalaşmasında və inkişafında həlledici rola malikdir.
Xalq yaxşı bilirdi ki, Lider mənəvi birliyi təmin edən, ideya və dəyərlər sisteminin formalaşmasına təsir göstərən çox mühüm qüvvədir.
Cənab İlham Əliyevin Prezident kimi ilk and içməsindən 21 il ötür. Zəmanəsinin ən parlaq liderlərindən biri kimi Azərbaycan Prezidenti bu illər ərzində həm xalq qarşısında, həm də beynəlxalq münasibətlərdə verdiyi bütün vədləri yerinə yetirdi.
İlham Əliyevin Prezident seçilməsi ölkənin siyasi həyatında yeni inkişaf dönəminin başlanğıcı oldu. Azərbaycanın hərtərəfli inkişafı, xalqın firavan həyatı üçün ilk növbədə ölkənin pozulmuş ərazi bütövlüyü bərpa edilməli idi. Hesablanmış dəqiq siyasət, atılan hər bir addım Azərbaycanı Qarabağın azadlığına yaxınlaşdırırdı. Bütün istiqamətlərdə qazanılan uğurların, əldə edilən nailiyyətlərin bir hədəfi var idi - işğal altında olan torpaqlarımızın düşməndən azad edilməsi və Azərbaycanın bütün sərhədləri boyunca bayrağımızın dalğalanması...
2020-ci il sentyabrın 27-də başlanan Vətən müharibəsi Ali Baş Komandan İlham Əliyevin yüksək liderlik qabiliyyəti, bənzərsiz idarəetmə keyfiyyətləri, xalqın birliyi və ordumuzun gücü nəticəsində Zəfərlə sona çatdı. Ötən il 19-20 sentyabr tarixlərdə isə ordumuz tərəfindən Qarabağda keçirilən lokal xarakterli antiterror tədbirləri nəticəsində ərazilərimiz qanunsuz erməni hərbi birləşmələrindən tamamilə təmizləndi, separatçı rejim özünü buraxdığını elan etdi. Ərazi bütövlüyümüzün və suverenliyimizin tam bərpası müstəqillik tariximizin ən parlaq səhifəsi oldu.
İftixarla deyə bilərik ki, demokratik inkişaf yolunda həyata keçirilən sistemli tədbirlərin qanunauyğun nəticəsi kimi Azərbaycanda təkmil siyasi sistem formalaşıb. Qanunvericilik bazasının təkmilləşdirilməsi, vətəndaşların hüquq və azadlıqlarının təmin edilməsi istiqamətində görülən tədbirlər, siyasi plüralizmin dəstəklənməsi, çoxpartiyalı sistemin inkişafı və digər istiqamətlər üzrə prioritet hesab olunan prinsiplər ölkədə davamlı demokratik cəmiyyətin inkişafından xəbər verir.
Azərbaycanda işlək və təhdidlərə qarşı immuniteti olan siyasi sistem bərqərar edilib. Ardıcıl olaraq həyata keçirilmiş məqsədyönlü islahatlar və genişmiqyaslı tədbirlər nəticəsində ölkəmizin iqtisadi və hərbi müdafiə qüdrəti daha da güclənib.
21 il ərzində demək olar, bütün əməli çalışma sahələri üzrə, o cümlədən iqtisadiyyat (özəlliklə enerji sektoru), ordu quruculuğu, xarici siyasət, sosial və s. sahələrdə çox önəmli işlər görülüb, islahatlar həyata keçirilib. Şəhərlərimiz, qəsəbə və kəndlərimiz iri infrastruktur layihələrin uğurlu icrası meydanına çevrilib. Azərbaycan beynəlxalq səviyyəli iri layihələrin keçid və ya başlanğıc ölkəsi statusuna yiyələnib.
Azərbaycan beynəlxalq arenada çox nüfuzlu mövqe qazanıb. İlham Əliyevin həyata keçirdiyi uğurlu diplomatik və hərbi strategiya bölgəmizdə yeni gerçəkliklər yaradıb. Ölkəmiz öz qayğıları ilə məşğul olan dövlət statusundan nəinki bölgədə, hətta yaxın-uzaq coğrafiyalarda fikri, münasibətilə hesablaşılan statusa sahiblənib. Bu siyasət yalnız Azərbaycan üçün deyil, Cənubi Qafqaz üçün böyük tarixi mərhələnin uğurlu başlanğıcı deməkdir.
Ötən 21 ildə İlham Əliyevin rəhbərliyi ilə aparılan uğurlu siyasət, vaxtında görülən tədbirlər ölkəmizin fərqli beynəlxalq platformalarda nüfuz qazanmasına, ciddi nəticələr əldə etməsinə vəsilə oldu. Hazırda ölkəmiz çox önəmli beynəlxalq tədbirə - COP29-a hazırlaşır. 198 ölkənin yekdil dəstəyi ilə COP29-un regionda ilk dəfə Azərbaycanda keçirilməsi ölkəmizin beynəlxalq aləmdə nüfuzuna verilən qiymətdir.
31 oktyabr müasir müstəqil Azərbaycanın şanlı tarixinə ən önəmli günlərdən biri kimi yazılıb. Bu tarix zəfərlərə yol açan, respublikamıza misilsiz nailiyyətlər qazandıran, dinamik inkişafa aparan müdrik siyasətin başlanğıc günüdür.
Elşən QƏNİYEV,
"Azərbaycan"
