Yaponiyada səfərdə olan ABŞ Prezidenti Donald Trampın bu ölkənin Baş naziri xanım Sanae Takaiçi ilə görüşündə Yaponiyanın müdafiə qabiliyyətinin gücləndirilməsi və iqtisadi-ticari əməkdaşlıq başda olmaqla bir çox məsələləri müzakirə ediblər, müvafiq sahələrdə əməkdaşlığı genişləndirməyə söz veriblər.
AZƏRTAC Yaponiya mediasına istinadla xəbər verir ki, ölkəsinin milli maraqlarını qorumaq üçün dinamik diplomatiyanı yenidən qurmağa qərarlı olduğunu deyən Baş nazir Sanae Takaiçi azad və açıq Hind-Sakit okean regionunun yaradılması kimi ümumi məqsədə nail olmaq üçün Yaponiya ilə ABŞ arasında gələcək əməkdaşlığı təşviq etməyə hazır olduğunu bildirib. O, Yaponiya-ABŞ ittifaqının yeni bir qızıl dövrünü reallaşdırmaq istədiyini, bu ittifaqda hər iki ölkənin daha güclü və daha rifah içində olacağını vurğulayıb.
ABŞ Prezidenti Donald Tramp isə Yaponiyaya böyük sevgi və hörmət bəslədiyini bildirərək, iki ölkə münasibətlərinin daha güclü olacağını deyib. O, Yaponiyanın hər hansı məsələ üzrə istəyi və ehtiyacı olarsa, ABŞ-ın buna laqeyd qalmayacağını söyləyib, əlavə edib ki, Birləşmiş Ştatlar və Yaponiya ən yüksək səviyyədə müttəfiqdir.
Liderlər iki ölkə arasında ticarət danışıqlarında əldə olunan razılaşmanı təsdiqləyiblər. Onlar, həmçinin iqtisadi təhlükəsizliyi gücləndirmək üçün nadir torpaq metalları da daxil olmaqla ən vacib mineralların qorunması və tədarükü sahəsində əməkdaşlığa dair sənədlər imzalayıblar.
Baş nazir Sanae Takaiçi gələn il ABŞ-ın qurulmasının 250-ci ildönümü münasibətilə Birləşmiş Ştatlara 250 albalı ağacı hədiyyə edəcəyini deyib.
Liderlər 1970-1980-ci illərdə Şimali Koreya tərəfindən qaçırılan Yaponiya vətəndaşlarının ailə üzvləri ilə də görüşüblər. Səfər proqramına Yokosukadakı ABŞ hərbi dəniz bazasına baş çəkmək də daxildir. Baş nazir Sanae Takaiçi və Prezident Donald Tramp həmin bazada ABŞ-ın “Corc Vaşinqton” təyyarədaşıyan gəmisinə baxış keçirəcəklər.
Qeyd edək ki, Donald Tramp Asiya turu çərçivəsində Malayziyadan sonra Yaponiyaya gəlib. O, Asiya-Sakit Okean İqtisadi Əməkdaşlıq Təşkilatı (APEC) ölkələri liderlərinin Zirvə Toplantısında iştirak etmək üçün oktyabrın 29-da Cənubi Koreyaya gedəcək.
