Azərbaycan Qazaxıstanın mühüm, etibarlı strateji tərəfdaşıdır və iki ölkə arasında əlaqələr yüksələn xətlə inkişaf edir. Prezident İlham Əliyevin bu ölkəyə səfəri bir çox vacib məqamlarla yadda qaldı.
Bu sözləri AZƏRTAC-a açıqlamasında Milli Məclisin deputatı Könül Nurullayeva səsləndirib.
Bu səfərin Qazaxıstan-Azərbaycan əməkdaşlığının yeni keyfiyyət səviyyəsinə yüksəlməsində yeni bir mərhələyə təkan verdiyini qeyd edən K.Nurullayeva deyib: “Bakı və Astana hər zaman bir-birinin suverenliyi, müstəqilliyi və ərazi bütövlüyünü dəstəkləyir. Uzun illərdir Azərbaycan və Qazaxıstan yerləşdikləri regionun lider ölkələridir. İki ölkənin qarşılıqlı əlaqələrinin möhkəmləndirilməsi Cənubi Qafqaz və Mərkəzi Asiyanın vahid məkan kimi mövqeyini gücləndirir. Həm Bakı, həm də Astana müstəqil daxili və xarici siyasət həyata keçirir, malik olduqları resursların düzgün idarə edilməsi, insan kapitalına çevrilməsi baxımından da unikal təcrübə nümayiş etdirir”.
Deputatın sözlərinə görə, tərəflər yeni geosiyasi şəraitdə strateji tərəfdaşlığı genişləndirməyi vacib hesab edirlər. Belə ki, Asiya ilə Avropanı birləşdirən Qazaxıstan və Azərbaycan ərazilərindən keçən Trans-Xəzər nəqliyyat dəhlizinin əhəmiyyəti xüsusi aktuallıq kəsb edir. Azərbaycan nəqliyyat dəhlizlərinin inkişafı baxımından Qazaxıstan üçün cəlbedici tərəfdaşdır. Ən böyük üstünlük isə ölkələrin vaxtında zəruri infrastruktur yaratmasıdır. Bu gün artıq yük axınlarının birləşdirilməsindən və həcminin artırılmasından, həmçinin tranzit potensialının artırılmasından söhbət gedir.
“Azərbaycan Prezidentinin də söylədiyi kimi, ölkələrimiz arasında fəal qarşılıqlı fəaliyyət həm də çox ciddi geosiyasi əhəmiyyətə malikdir. Təbii ki, yeni nəqliyyat yollarının açılması və Avrasiya regionu ilə bağlı layihələrin reallaşması ilə Cənubi Qafqaz və Mərkəzi Asiya daha çox bir-birinə bağlanır”, - deyə deputat bildirib.
Onun sözlərinə görə, Prezident İlham Əliyevin dövlət səfəri zamanı qəbul edilən qərarlardan biri də qarşılıqlı faydalı layihələrin maliyyələşdirilməsi üçün Qazaxıstan-Azərbaycan Birbaşa İnvestisiya Fondunun fəaliyyətinin aktivləşdirilməsi oldu. Prezidentlər də qarşılıqlı ticarətin həcminin artırılmasının vacibliyini təsdiqlədilər.
“Azərbaycan və Qazaxıstan arasında strateji tərəfdaşlıq, müttəfiqlik münasibətlərinin dərinləşdirilməsinə dair dövlət başçılarının imzaladığı birgə bəyannamədə də hərtərəfli əməkdaşlıq istiqamətləri əksini tapıb.
Region ölkələrinin nəqliyyat və tranzit məsələlərinin səmərəli həlli üzrə gələcək qarşılıqlı fəaliyyəti milli nəqliyyat strategiyalarının prioritetləri sırasındadır.
Bu gün Azərbaycan və Qazaxıstan öz regionlarında aparıcı rol oynayaraq sabit regionlararası əlaqələr yaratmaq potensialına malikdir. Bu ölkələrin iqtisadi, texnoloji və insan resursları qarşılıqlı faydalı tərəfdaşlıq üçün əsasdır. Rəqəmsal dövlətin formalaşması, tranzit təhlükəsizliyinin inkişafı əməkdaşlıq üçün prioritet sahələrdir.
Bu gün Azərbaycan və Qazaxıstan yeni orta güc kimi dünya miqyasında statusunu möhkəmləndirir. Bu ölkələr xarici çağırışlara cavab vermək potensialına malikdirlər”, - deyə Könül Nurullayeva fikirlərini tamamlayıb.
