Beynəlxalq Valyuta Fondu (BVF) qlobal iqtisadiyyatın aşağı artım templi yüksək borclar üzündən təhlükə ilə qarşı-qarşıya olduğu barədə xəbərdarlıq edərək, siyasətçiləri borclanma səviyyəsinə diqqət etməyə və artıma dəstək verən islahatlar aparmağa çağırıb.
AZƏRTAC xarici mediaya istinadla xəbər verir ki, BVF-nin icraçı direktoru Kristalina Georgieva BVF və Dünya Bankı Qrupunun İllik Görüşləri çərçivəsində keçirdiyi mətbuat konfransında deyib: “Qlobal iqtisadiyyatda yaranan bu vəziyyət aşağı gəlirlər və daha az iş yerləri deməkdir. Bu, həm də dövlət gəlirlərinin azalması, beləliklə, ailələri dəstəkləmək və iqlim dəyişikliyi kimi uzunmüddətli problemlərə qarşı mübarizə aparmaq üçün daha az investisiya deməkdir”.
Georgieva siyasətçiləri, mərkəzi bankları inflyasiyanın hədəfə qayıtmasını təmin etməyə çağırıb, həmçinin borc və kəsirlərə qarşı hərəkətə keçməyin vaxtı olduğunu bildirib. Onun sözlərinə görə, ən vacib amil ölkələrin inkişafa dəstək verən islahatların həyata keçirməsidir. BVF-nin təhlili göstərir ki, bu islahatlar inkişaf etməkdə olan ölkələrdə dörd il ərzində istehsalı 8 faiz artıra bilər.
Oktyabrın 24-də açıqlanan son Dünya İqtisadi Görünüşündə (WEO) BVF 2024-cü ildə qlobal artım proqnozunu iyul ayı proqnozuna uyğun olaraq 3,2 faiz səviyyəsində saxlayıb. Bundan sonra beş il üçün artım perspektivləri zəif olaraq qalır və 3,1 faizlə onilliklərin ən aşağı səviyyəsində qalır.
Qabaqcıl iqtisadiyyatların bu il 1,8 faiz, inkişaf etməkdə olan bazar və inkişaf etməkdə olan iqtisadiyyatların isə 4,2 faiz artacağı proqnozlaşdırılır. Proqnozlara görə, Çin iqtisadiyyatı 4,8 faiz böyümə yolundadır. Georgieva Çin iqtisadiyyatının doğru yolda inkişaf etdiyini qeyd edərək bəzi mülahizələrini də əlavə edib: “Xeyli müddətdir ki, Çin bu yolda əngəllə üzləşib: Pekin ixraca əsaslanan artım siyasətinə davam etməli və ya daxili istehlakı artırmalıdır. Biz belə hesab edirik ki, Çin iqtisadiyyatı bu qədər böyüdüyünə görə, artımın etibarlı mənbəyi məhz sonuncu, daxili istehlakdır”.
