Kəndin asfalt yolu, daimi qazı, işığı, suyu, interneti var
Burzubənd kəndi Kijəbə qəsəbə inzibati ərazi dairəsinə aiddir. Kənddə son illər əhalini rahatsız edən əksər problemlər həll olunub.
Kənddə, ümumilikdə inzibati ərazi dairəsində müasir tipli məktəb binaları tikilib, avtomobil yolları asfaltlaşdırılıb, yaşayış məntəqələrinin çoxu qazlaşdırılıb, sürətli internet şəbəkəsi yaradılıb, suvarma suyu çəkilib. Burzubənd kənd tam orta məktəbi 5-6 il əvvəl köhnə, istismar müddətini başa vurmuş binada yerləşirdi. Müəllimlər tədris aparmaqda çətinlik çəkir, şagirdlər keyfiyyətli təhsil ala bilmirdilər. Ölkə rəhbərinin imzaladığı sərəncamla ayrılan vəsait hesabına kənddə müasir tipli məktəb binası inşa edildi. İndi müasir tədris ocağında təhsil alan şagirdlərin uğurları ildən-ilə artır. Yeniyetmələr burada elmi biliklərə yiyələnməklə yanaşı, həm də vətənpərvər ruhda böyüyürlər. Vətən müharibəsi bunu sübut etdi. Rayonun bütün gəncləri kimi, bu kəndin cavanları da heç bir çağırış gözləmədən könüllü müraciət edərək Vətənin müdafiəsinə yollandılar və torpaqlarımızın işğaldan azad edilməsində fədakarlıq göstərdilər. Bu məktəbin məzunları arasında şəhidlər də, qazilər də oldu.
Burzubənd və ətraf kəndlərin sakinlərinin əsas məşğuliyyəti sitrusçuluqdur. Bununla onlar həm ölkədə ərzaq bolluğu yaradır, həm də ailə büdcələrini formalaşdırırlar. Amma bir neçə il öncə meyvə bağlarının suvarılmasında çətinliklər var idi. Sakinlər hər görüşdə bu barədə rayon rəhbərliyinə müraciət edirdilər. Nəhayət, Lovayın su anbarından kəndə yeni suvarma xətti çəkilməklə su anbarı tikildi. Bununla böyük bir problem həllini tapdı. Gələcəkdə su anbarının həcmi artırılmaqla qonşu kəndlərə də suvarma suyu veriləcək.
Burzubənd səfalı kənddir. Turistlərin maraq göstərdiyi yaşayış məntəqələrindən sayılır. Yol infrastrukturu yenilənəndən sonra Burzubəndlə yanaşı, ən ucqar kəndlərə də ilin bütün fəsillərində turist və qonaqlar gəlir. Bu da sözsüz ki, sakinlərə ailə büdcələrini artırmağa imkan verir.
Bunlarla yanaşı, kəndin bəzi problemləri də var. Bəzi məhəllələrdə elektrik enerjisi gərginliyinin aşağı olması, yeni məhəllələrə qaz xəttinin çəkilməməsi, dağlıq ərazilərdə elektrik xətlərində qəza baş verən zaman kəndlərdə elektrik verilişində fasilələrin yaranması həmin problemlərin sırasındadır. Sakinlər bu barədə rayon rəhbərliyinin kənddə keçirdiyi görüş zamanı məsələ qaldırıblar və ümid edirlər ki, sözügedən problemlər də operativ həll ediləcək.
Seyran CAVADOV,
"Azərbaycan"
jpeg_1773309701.jpeg)
jpg_1773307890.jpg)
