Avqustun 15-də Britaniya Kralı III Çarlz müttəfiqlərin Yaponiya üzərində qələbəsini və İkinci Dünya müharibəsinin başa çatmasını bildirən VJ Gününün 80-ci ildönümü münasibətilə dünya ictimaiyyətinə müraciət edib.
AZƏRTAC “The Guardian” nəşrinə istinadla xəbər verir ki, Britaniya Kralı hazırda davam edən müharibə və silahlı münaqişələrin bəşəriyyət üçün ağır fəsadlarını qeyd edib. Onun sözlərinə görə, Avropada döyüşlər 1945-ci ilin mayında başa çatsa da, Yaponiya ilə münaqişə ABŞ tərəfindən Xirosima və Naqasakiyə atom bombaları atıldıqdan sonra həmin il avqustun 15-də yaponların təslim olmaq niyyətini bildirənə qədər davam edib. III Çarlz müharibənin son günlərinin Xirosima və Naqasaki üçün böyük fəlakət gətirdiyini deyib, heç bir xalqın bu faciəni bir daha yaşamaması üçün dua edib.
Kral III Çarlz ilə birlikdə kraliça Kamilla, Böyük Britaniyanın Baş naziri Kir Starmer, Yaponiya səfiri və Milli Anım Xidmətinin veteranları müharibənin son üç ayında həlak olanların xatirəsini yad ediblər.
Tarixi hərbi təyyarələrin nümayiş olunduğu uçuş meydanında günorta saatlarında bir dəqiqəlik sükut elan olunub. Axşam isə ölkənin hər yerindəki məşhur binalar bu münasibətlə işıqlandırılacaq.
Monarx altı dəqiqəlik müraciətindən davam edən münaqişələri vurğulamaq üçün istifadə edib: “Müharibənin əsl mahiyyəti döyüş meydanlarından kənara çıxır, həyatın hər tərəfinə toxunur, həmin faciə bu gün bütün dünyada baş verən münaqişələrdə də təkrar olunur”. O, İkinci Dünya müharibəsində heç vaxt yan-yana vuruşmamış xalqların birlikdə işləməyi öyrəndiyini, hərb və sülh dövründə ən böyük nailiyyətin silahların “susması” olduğunu deyib. “Bu, dövrümüz üçün həyati bir dərs olaraq qalır”, -deyə Kral vurğulayıb.
Baş nazir Starmer açıqlamasında bildirib: “Ölkənin daha yaxşı gələcək üçün mübarizə aparanlara böyük bir borcu var, onların sayəsində bu gün zövq aldığımız azadlıqlara və həyata sahibik”.
Britaniya hökuməti bildirib ki, səhər saatlarında Londonun mərkəzindəki “Cenotaph” müharibə memorialında, Edinburq qəsrində və İngiltərənin mərkəzindəki Milli Memorial Dendrarisində anım mərasimi keçirilib.
jpg_1765830577.jpg)
jpg_1765830356.jpg)
