Azərbaycanın işğaldan azad etdiyi Qarabağ və Şərqi Zəngəzurda həyata keçirdiyi bərpa-quruculuq işləri, şəhərsalma və dayanıqlı inkişaf sahəsindəki təcrübəsi nümunə kimi təqdir olunur. Təsadüfi deyil ki, işğaldan azad olunmuş ərazilərə Böyük Qayıdış "Azərbaycan 2030: sosial-iqtisadi inkişafa dair Milli Prioritetlər"də əks olunan 5 ümummilli məqsədlərdən biri kimi qeyd olunub. Son 5 ildə bu proses plan üzrə davam edir, insanlar böyük qürur hissi ilə doğma yurdlarına qayıdırlar.
Artıq 30-dan çox yaşayış məntəqəsinə köç həyata keçirilib. İlkin mərhələdə ayrılmış vəsaitlərlə infrastrukturun təməli qoyulub, növbəti illərdə isə daha geniş sosial və iqtisadi layihələrin reallaşdırılması planlaşdırılıb.
Bu günlərdə Xankəndinin Kərkicahan qəsəbəsinə, həmçinin Ağdamda 2-ci yaşayış kompleksinə köç oldu. Prezident İlham Əliyev Qarabağa səfəri çərçivəsində yeni köç edən sakinlərlə görüşdü. Sevindirici haldır ki, Ağdamda üç kənddə artıq yaşayış var. Ağdam sakinlərinin də təhlükəsiz yaşayışı üçün hər cür şərait yaradılıb. Dövlət başçımız həmçinin Qarabağa budəfəki səfəri zamanı da yeni infrastruktur obyektlərinin açılışında iştirak etdi. Antiterror əməliyyatlarından sonra Azərbaycan Qarabağ və Şərqi Zəngəzura tam nəzarət edir. Təbii ki, böyük abadlıq məkanı kimi Qarabağ və Şərqi Zəngəzurun mənzərəsi Azərbaycanın gücünü göstərir. İşğaldan azad olunan ərazilərin qısa müddətdə bərpası və yenidən qurulması əsl nümunə kimi qiymətləndirilməlidir.
Cənab Prezident Ağdam sakinləri ilə görüşdə bir daha münaqişənin tarixindən bəhs edərək bildirdi ki, 30 illik işğal dövründə erməni işğalçıları Qarabağda şəhər və kəndlərimizi dağıtmış, urbisid siyasəti həyata keçirmişdir. Burada hətta tarixi və dini abidələr də məqsədli şəkildə viran qoyulmuşdur. Böyük Zəfərdən dərhal sonra öz daxili imkanları hesabına bərpa-quruculuq işlərinə başlayan Azərbaycan dövləti Qarabağ və Şərqi Zəngəzurun yeni siması fonunda uğurlu şəhərsalma siyasəti reallaşdırır. İşğaldan azad olunmuş ərazilərin bərpası fonunda Azərbaycanın şəhərsalma və dayanıqlı inkişaf sahəsində həyata keçirdiyi islahatlar, qarşıya qoyulmuş strateji prioritetlər, kompleks və inteqrasiya olunmuş yanaşmalar da sosial rifaha, iqtisadi dayanıqlılığa töhfə verməkdədir.
Ermənistanın işğal dövründə xarabazara çevirdiyi torpaqlarda son 5 ildə yeni şəhərlər və kəndlər inşa olunur. Böyük qayıdış proqramı uğurla icra edilir. Hazırda azad edilmiş ərazilərdə 60 mindən çox insan yaşayır, çalışır və təhsil alır.
Böyük qayıdış proqramının icrası ölkənin sosial, iqtisadi və institusional inkişafı üçün mühüm zəmin yaradıb. Həyata keçirilən məqsədyönlü və genişmiqyaslı layihələr Qarabağ və Şərqi Zəngəzur iqtisadi rayonlarının sürətlə dirçəlməsinə, əhalinin dayanıqlı məskunlaşmasına və davamlı iqtisadi aktivliyinin təmin olunmasına xidmət edir.
Ümumilikdə, 2020-ci ildən bəri işğaldan azad olunmuş ərazilərdə inşa olunan infrastruktur layihələrinin iqtisadiyyatımız üçün yaradacağı əlavə dəyər orta və uzunmüddətli dövrdə gözlənilir.
Prezident İlham Əliyev Ağdamda 2-ci yaşayış kompleksinin sakinləri ilə görüşdə də bəyan etdi ki, bütün xalqımız, o cümlədən keçmiş məcburi köçkünlər bilirdilər və inanırdılar ki, tarixi ədalət bərpa ediləcək. Dövlət başçımız bir daha beynəlxalq birliyin ikili standartlar siyasətini xatırlatdı. Ermənistan-Azərbaycan münaqişəsi ilə məşğul olan, beynəlxalq təşkilatlar tərəfindən bu vəzifəni icra etməli olan qurumların işğalçı, talançı dövlətlə həmrəy olduqlarını bildirdi.
"Mən 17 il ərzində ATƏT-in Minsk qrupunun həmsədrləri ilə təmasda olmuşam, onlarla çoxsaylı görüşlər keçirmişəm. Hər dəfə görüşəndə illər keçdikcə görürdüm ki, bunların məqsədi məsələni həll etmək, işğala son qoymaq, BMT Təhlükəsizlik Şurasının qətnamələrinin icrasına nail olmaq yox, işğalı əbədi etmək idi. Sanki danışıqlar masasında bir tərəfdə Ermənistan və Minsk qrupunun həmsədrləri, digər tərəfdə isə Azərbaycan idi" - deyən dövlətimizin başçısı 30 il ərzində işğalçıya qarşı heç bir sanksiyanın tətbiq olunmadığını təəssüflə qeyd etdi. Cənab Prezidentin də söylədiyi kimi, "Bu gün dünyada müxtəlif yerlərdə müharibələr, toqquşmalar, münaqişələr baş alıb gedir. Beynəlxalq təşkilatlar, böyük nüfuzlu ölkələr dərhal sanksiyalar tətbiq edirlər. Çünki sanksiyaların da böyük təsiri var. Xüsusilə Ermənistan kimi kiçik, kasıb ölkəyə əgər sanksiyalar tətbiq edilsəydi, əlbəttə, işğala son qoyardı". Lakin beynəlxalq ictimaiyyət ədalət hissini itirməklə Azərbaycan xalqının hüquqlarının kobud şəkildə pozulmasına, işğala, separatizmə göz yumdu.
Azərbaycan belə mürəkkəb şəraitdə öz qələbəsini məhz öz gücü hesabına təmin etdi. Bu isə bir daha cənab Prezidentin həyata keçirdiyi uğurlu siyasətin nəticəsində mümkün oldu. Azərbaycan işğalın nəticələrini aradan qaldırır, amma keçmişi heç vaxt unutmayacaq. Dövlətimizin başçısının da söylədiyi kimi, "bundan sonra sülh içində, təhlükəsizlik içində yaşamaq üçün biz bu tarixi heç vaxt unutmamalıyıq".
Nigar MƏMMƏDOVA,
Milli Məclisin deputatı
