Birinci uğursuz turdan sonra bir neçə saat davam edən müzakirələr nəticəsiz qalmadı
Məlum olduğu kimi, fevral ayında Almaniyada növbədənkənar parlament seçkiləri keçirilmiş və nəticədə Xristian Demokratlar İttifaqı (CDU) partiyası qələbə qazanmışdır. Mayın 6-da onun lideri Fridrix Merts parlamentdə iki tur səsvermədən sonra AFR-in yeni 10-cu Kansleri seçilmişdir.
Almaniya tarixində ilk dəfə olaraq bu posta namizəd birinci turda tələb olunan mütləq səs çoxluğunu toplaya bilməyib. Bir neçə saat sonra onu seçmək üçün ikinci cəhd olub və bu zaman Merts lazımi səs çoxluğu - lehinə 325 səs qazanıb.
Hökumət koalisiyasını yaradan CDU/CSU və SPD blokunun hazırkı Bundestaqda ümumilikdə 328 mandatı var. Kanslerin ilk turda uğursuzluğundan sonra parlament fraksiyaları arasında məsləhətləşmələr üçün Bundestaqın iclası yarımçıq kəsilib. Almaniyanın "Merkur" nəşri yazır ki, bir neçə saat davam edən müzakirələrdən sonra təkrar səsvermə keçirilib və Fridrix Merts "Yaşıllar" və Sol Partiyasının gözlənilməz dəstəyi sayəsində kansler postunu tuta bilib. Eyni zamanda qəzet bu addımı "təhlükəli" kimi qiymətləndirib, çünki CDU öz prinsiplərini güzəştə getməli olub: son vaxtlara qədər fraksiya "solçular"la hər hansı əməkdaşlıqdan imtina edirdi.
"Bild" qəzeti yazır ki, CDU-nun baş katibi Karsten Linnemann mümkün qədər tez bir zamanda əlavə tədbirlər görülməsinə dair qərar qəbul olunmasına çağırıb: "Avropanın güclü Almaniyaya ehtiyacı var. Ona görə də biz bir neçə gün gözləyə bilmərik".
Almaniyanın Əsas Qanununun 63-cü maddəsində nəzərdə tutulduğu kimi, təkrar səsvermə 14 gün ərzində keçirilməli idi. Merts bu halda tələb olunan 316 səs ala bilməsəydi, üçüncü cəhddə onun hökumət başçısı seçilməsi üçün sadə səs çoxluğu kifayət edəcəkdi.
Fridrix Merts 11 noyabr 1955-ci ildə noyabrın 11-də anadan olub. İxtisasca hüquqşünasdır. 1998-2000-ci və 2002-2004-cü illərdə Bundestaqda CDU/CSU fraksiyasının rəhbərinin müavini olub. 2018-ci il oktyabrın 30-da Bavariya və Hessen federal əyalətlərində XDİ-nin uğursuz seçkilərindən sonra Fridrix Merts Merkelin yerinə XDİ sədri postuna namizəd olmaq qərarını açıqlayıb. 2022-ci ilin yanvarında XDİ-nin sədri seçilib. 2024-cü ilin sentyabrında müxalifətdəki CDU/CSU bloku tərəfindən 2025-ci ildə keçiriləcək Bundestaq seçkilərində Almaniya kansleri vəzifəsinə namizəd kimi irəli sürülüb.
Fridrix Merts ötən həftə İspaniyanın Valensiya şəhərində keçirilən mühafizəkar Avropa Xalq Partiyasının konfransında həmkarlarına söz verib: "Biz Almaniyada, mənim ölkəmdə gördüyünüz ən güclü Avropayönlü hökumətlərdən birini qurmağa hazırıq". O, gələcək Avropa kursunun hədəflərini də açıqlayıb: "Avropa İttifaqının birliyini və müdafiə qabiliyyətini gücləndirmək, yeni azad ticarət sazişlərini dəstəkləmək, iqlimin qorunması və rəqabətqabiliyyətlilik siyasətinə düzəlişlər etmək, qitəyə gələn miqrantların sayını azaltmaq".
Rizvan CƏFƏROV,
"Azərbaycan"
jpeg_1766065291.jpeg)
jpeg_1766054270.jpeg)
