Enerji, informasiya texnologiyaları və süni intellekt sahələrində baş verən proseslər dünyanın elmi və iqtisadi mənzərəsini tamamilə dəyişdirir. Bu dəyişikliklər həm böyük imkanlar yaradır, həm də yeni risklər formalaşdırır. Fikrimcə, bu proseslər Azərbaycan elmi və xüsusilə gənc alimlər üçün strateji fürsətlər yaradır.
Bu fikirləri AZƏRTAC-a müsahibəsində Dünya Azərbaycanlı Alimlər Birliyinin həmsədri, Atom Enerjisi üzrə Beynəlxalq Agentlikdə çalışan həmvətənimiz, Nobel sülh mükafatçısı Bəxtiyar Siracov söyləyib.
B.Siracov bildirib ki, informasiya texnologiyaları və süni intellekt sahəsində baş verən inqilab artıq hər bir elmi istiqamətə təsir göstərir. Azərbaycan gəncləri üçün bu, yeni tədqiqat istiqamətlərinə açılan geniş sahədir: verilənlərin təhlili, maşın öyrənməsi, kibertəhlükəsizlik, elmi proqramlaşdırma, texnoloji etika və s. kimi sahələrdə ciddi inkişaf imkanları mövcuddur.
“Gənc tədqiqatçılara tövsiyə edərdim ki, elmi fəaliyyətlərində uğur qazanmaq üçün multidisiplinar düşünmənin zəruriliyini nəzərə alsınlar. Zamanımızda baş verən və gələcəyə yönəlmiş sənaye inqilablarının irəli sürdüyü tendensiyaları daim diqqətdə saxlasınlar, yeni-yeni formalaşan çağırışlara hazır olsunlar və həmin çağırışların həllinə öz töhfələrini vermək üçün fəal şəkildə çalışsınlar. Elmin nüfuzunu gücləndirmək üçün beynəlxalq əməkdaşlığı daim genişləndirmək, fərqli elmi mədəniyyətlərdən öyrənmək və Azərbaycanı qlobal elmi ailənin etibarlı tərəfdaşı kimi təmsil etmək əsas amillərdən olmalıdır. Əminəm ki, elm və texnologiya sahələrində çalışan yeni nəsil azərbaycanlı alimlər təkcə ölkəmizin gələcəyini deyil, həm də regionumuzun, dünyanın təhlükəsizliyi və rifahını da formalaşdıran aparıcı qüvvələrdən biri olacaqlar”, - deyə o əlavə edib.
19 (1)jpg_1771885865.jpg)
