Beş britaniyalı ailə övladlarının ölümü ilə bağlı “TikTok”a qarşı ABŞ-da presedent yarada biləcək məhkəmə iddiası qaldırıb.
AZƏRTAC “The Independent”ə istinadla xəbər verir ki, valideynlər Deleveyr ştatında bu gün keçiriləcək dinləmədə iştirak edəcək. Bu, Böyük Britaniyadan olan ailələrin uşaqlarının ölümü ilə bağlı Amerika məhkəməsində “TikTok”a qarşı açdıqları ilk işdir.
İddiada qeyd olunur ki, “TikTok”un alqoritmləri uşaqlara təhlükəli məzmunu təşviq edib və geniş yayıb. Buraya “Blackout Challenge” kimi tanınan çağırışla əlaqəli materiallar da daxildir. Ailələr bu məzmunun övladlarının ölümünə töhfə verdiyini və şirkətin uşaqların ölümündən əvvəlki kritik dövrdə hansı məzmunla qarşılaşdıqlarını anlamaq üçün tələb olunan məlumatları dəfələrlə təqdim etməkdən imtina etdiyini bildirirlər.
Ailələri təmsil edən Ellen Ruum, Lisa Kenevan və Liam Uolş dinləmədə iştirak edəcək. Ellen Ruum bildirib ki, valideynlər övladlarının ölümündən sonra nə baş verdiyini öyrənmək üçün transmilli texnologiya şirkətləri ilə mübarizə aparmaq məqsədilə qitələr aşmalı olmalıdırlar.
Ellen Ruum hesab edir ki, onun 14 yaşlı oğlu Jules 2022-ci ilin aprelində onlayn çağırışda iştirak etdikdən sonra həyatını itirib. Bu gün keçiriləcək dinləmə iddianın rədd edilməsi barədə vəsatət mərhələsidir. Vəsatət təmin olunmazsa, iş sübutların toplanması mərhələsinə keçəcək və “TikTok” müəyyən məlumatları açıqlamağa məcbur qala bilər. Ailələrin dəfələrlə müraciət etməsinə baxmayaraq, onların sözlərinə görə, “TikTok” hələ də bu məlumatları təqdim etməyib.
ABŞ-dakı məhkəmə prosesi ilə paralel olaraq, Ellen Ruum Böyük Britaniyada “Jules Qanunu”nun qəbul edilməsi üçün kampaniya aparır. Təklifə əsasən, uşağın ölümündən dərhal sonra onun onlayn məlumatlarının avtomatik şəkildə qorunması nəzərdə tutulur. Məqsəd istintaq və məhkəmə-tibbi araşdırmaların ilkin mərhələlərində mühüm sübutların itirilməsinin qarşısını almaqdır.
