Belçikanın ABŞ-dan aldığı F-35 tipli müasir döyüş təyyarələrinin ilk partiyası ölkəyə çatıb, lakin ortaya çıxan problem ölkədə gülüş və çaşqınlıq yaradıb: bu təyyarələr Belçikanın hava məkanında uça bilmir.
AZƏRTAC xəbər verir ki, Belçika hökuməti 2018-ci ildə ABŞ-dan 34 ədəd F-35 qırıcısı sifariş etmişdi. Müqavilənin ümumi dəyəri 5,6 milyard avro təşkil edir. Beşinci nəsil bu təyyarələr dünyanın ən qabaqcıl hərbi texnologiyalarından biri hesab olunur. İlk təyyarələr artıq təhvil verilib və rəsmi mərasimdə Belçika kralı şəxsən iştirak edib.
Lakin “Le Parisien” və “Le Vif” qəzetlərinin yazdığına görə, təhvil mərasimindən az sonra ordu və hökumət başa düşüb ki, ölkənin məhdud hava məkanı bu təyyarələrin uçuş və təlimləri üçün yararsızdır. Təyyarələr var, amma uçuş yeri yoxdur.
Belçikanın hava qüvvələri illərdir oxşar problemlə üz-üzədir: kiçik əraziyə və sıx hava məkanına malik ölkədə hərbi təyyarələr üçün təlim zonaları çatışmır. İndi isə, milyardlarla avro dəyərində alınan yeni nəsil təyyarələrin belə praktiki istifadəsi mümkün deyil.
Bu vəziyyət Belçikanın müdafiə ambisiyalarına ciddi zərbə vurub. Müdafiə naziri Teo Franken vəziyyətdən çıxış yolu tapmaq üçün Niderland, Norveç və İtaliya ilə danışıqlara başlayıb. Məqsəd Belçika pilotlarının bu ölkələrin hava məkanında məşq etməsinə icazə almaqdır.
F-35-lərin təhvil verilməsi də əvvəlcədən planlaşdırıldığı kimi getməyib. Dörd təyyarənin oktyabrın 13-də Belçikaya çatdırılması planlaşdırılsa da, yalnız üçü gəlib. Dördüncü təyyarə isə texniki nasazlıq səbəbindən Azor adalarında enməli olub. Hazırda ABŞ şirkəti həmin təyyarəni təmir etmək üçün yerində mühəndis komanda göndərib.
Hökumət bu layihəni ölkənin hərbi yenilənməsi və güclənməsi kimi təqdim etmişdi. Lakin indi bu hadisə, yerli mediada, müasir texnologiyaya malik, amma uça bilməyən ordu kimi satirik başlıqlarla tənqid olunur.
Belçika Müdafiə Nazirliyinin nümayəndəsi vəziyyəti şərh edərək deyib: “Biz bu məsələni tərəfdaş ölkələrlə birgə həll edəcəyik. Bu, bizim hava qüvvələrimizin gələcəyi üçün vacib bir sınaqdır”.
