Azərbaycan və BƏƏ paytaxtları arasında bu barədə Anlaşma Memorandumu imzalanıb
Azərbaycanla Birləşmiş Ərəb Əmirlikləri (BƏƏ) arasında dostluq getdikcə daha da möhkəmlənir və əməkdaşlıq genişlənir. Ali səviyyədə qarşılıqlı səfərlər, ölkələrimizin parlamentlərinin, ayrı-ayrı nazirliklərinin və digər təşkilatlarının nümayəndələrinin görüşləri, birgə reallaşdırılan sanballı layihələr əlaqələrin daha sıx və faydalı olmasına təkan verir.
Bütün bunlar hər iki ölkədə yüksək dəyərləndirilir. Elə bu ayın əvvəlində Prezident İlham Əliyevin BƏƏ-yə işgüzar səfəri zamanı ona "Zayed İnsan Qardaşlığı Mükafatı"nın təqdim olunması dövlətimizin başçısının yeritdiyi uğurlu siyasətə verilən yüksək qiymətin təzahürüdür.
Prezident İlham Əliyev dəfələrlə bu ölkəyə səfərlərə gedib. BƏƏ-nin lideri də Azərbaycanda səfərlərdə olub. Xüsusilə də BƏƏ-nin Prezidentinin keçən ilin sentyabrında işğaldan azad olunmuş ərazilərimizə səfər etməsi mühüm əhəmiyyət daşıyır. Xatırladaq ki, Prezidentimiz onu Füzuli Beynəlxalq Hava Limanında qarşılamışdı.
Şuşada isə Şeyx Məhəmməd bin Zayed Al Nəhyanın rəsmi qarşılanma mərasimi keçirilmişdi. BƏƏ Prezidenti Daşaltı kəndini, Cıdır düzünü görmüş, Milli Xalça Muzeyinin Şuşa filialında olmuşdu. Azərbaycan və BƏƏ arasında imzalanmış sənədlərin mübadiləsi mərasimi də hər iki Prezidentin iştirakı ilə Şuşada keçirilmişdi. Bunların sırasında "Azərbaycan Respublikasının Energetika Nazirliyi ilə Birləşmiş Ərəb Əmirliklərinin Energetika və İnfrastruktur Nazirliyi arasında enerji sahəsində əməkdaşlıq haqqında Anlaşma Memorandumu", "Azərbaycan Respublikasının Energetika Nazirliyi ilə "Masdar" şirkəti arasında Azərbaycan Respublikasının "yaşıl enerji" zonalarında əməkdaşlıq haqqında Anlaşma Memorandumu", "Azərbaycan Respublikasının İqtisadiyyat Nazirliyi ilə XRG ASC arasında "Cənub qaz dəhlizi"ndə investisiya haqqında Anlaşma Memorandumu" da vardı.
Yeri gəlmişkən: son illər ərzində Azərbaycan-BƏƏ iqtisadi əlaqələri də yüksələn xətlə inkişaf edir. Bu, enerji əməkdaşlığında özünü daha aydın göstərir. Təkcə o faktı qeyd etmək kifayətdir ki, "Masdar" Bakıda Xəzər regionunun və MDB məkanının ən böyük günəş-elektrik stansiyasını tikib.
230 MVt gücündə "Qaradağ" Günəş-Elektrik Stansiyası 2023-cü il oktyabrın 26-da işə salınıb. Stansiya 262 milyon dollar dəyərində xarici sərmayə hesabına tikilib. Ölkəmizdə xarici investisiya cəlb edilməklə reallaşdırılan sənaye miqyaslı ilk günəş-elektrik stansiyasıdır. Stansiyada hər il 500 milyon kilovat-saat elektrik enerjisi istehsal olunmaqla 110 milyon kubmetr həcmində təbii qaza qənaət ediləcək. Eyni zamanda atmosferə atılan karbon emissiyası 200 min ton azaldılacaq. 550 hektar ərazini əhatə edən elektrik stansiyasında 570 min günəş paneli quraşdırılıb. Bu stansiyanın şəbəkəyə qoşulması üçün 330 kilovoltluq yarımstansiya tikilib. Stansiya 110 mindən çox evi elektrik enerjisi ilə təmin edəcək. Bir sözlə, ölkəmizin öz "yaşıl gündəlik" prioritetlərinə doğru atdığı inamlı və uğurlu addımlardan biri də məhz BƏƏ ilə əməkdaşlığımızın bəhrəsi olan "Qaradağ"ın tikintisinin başa çatdırılıb istifadəyə verilməsidir.
2024-cü il iyunun 4-də "Bakı-Ekspo" Mərkəzində Bakı Enerji Həftəsi çərçivəsində keçirilən 29-cu Beynəlxalq Xəzər Neft və Qaz Sərgisinin açılışı zamanı Neftçala, Biləsuvar günəş-elektrik stansiyalarının və Abşeron-Qaradağ Külək-Elektrik Stansiyasının təməlləri qoyulub. İndi bu "yaşıl enerji" layihələri özlərinin icrasının müxtəlif mərhələlərindədir.
Azərbaycan-BƏƏ əməkdaşlığı getdikcə şaxələnir, daha çox sahələri əhatə etməyə başlayır. Bu günlərdə BƏƏ-nin paytaxtı Əbu-Dabinin Bələdiyyələr və Nəqliyyat Departamentinin sədri Məhəmməd Əli Əl-Şorafanın nümayəndə heyətinin Bakı Şəhər İcra Hakimiyyətinin başçısı Eldar Əzizovla görüşü də deyilənləri bir daha təsdiqləyir.
Görüşdə Bakı haqqında məlumat verən Eldar Əzizov bildirib ki, Prezident İlham Əliyevin siyasəti nəticəsində bu gün Bakı şəhəri keyfiyyətcə yeni səviyyəyə yüksəlib və bu prosses uğurla davam edir.
Azərbaycan və BƏƏ arasında uzun illərdən bəri davam edən dostluq münasibətlərinə toxunan Məhəmməd Əli Əl-Şorafa qeyd edib ki, ölkəsində Azərbaycanla əlaqələrə xüsusi önəm verilir. Bakı şəhərinin sürətli inkişafını, şəhər idarəçiliyinin effektivliyini xüsusilə qeyd edən qonaq iki paytaxt şəhərin bir-birindən çox şeyi öyrənəcəyinə ümidvar olduğunu bildirib. O deyib: "Bu mənim şəhərinizə ilk səfərimdir və gördüklərimi nəzərə alaraq sonuncu olmadığına əminəm".
Bu, belə də olacaq - paytaxtlarımız arasında gediş-gəliş daha da çoxalacaq. Çünki sözügedən görüş çərçivəsində Bakı şəhəri və Əbu-Dabi şəhəri arasında qardaşlaşma münasibətlərinin yaradılması haqqında Anlaşma Memorandumu imzalanıb.
Odur ki, bu şəhəri yaxından tanıyaq: Əbu-Dabi BƏƏ-nin paytaxtı və ən böyük əmirliyidir. Şəhərin özündə və ətrafında yaşayan əhalinin sayı ümumilikdə 1,5-2 milyon nəfər təşkil edir. Burada səhra iqlimi hökm sürür, yəni hava çox isti və qurudur.
Coğrafi yerləşmə isə xeyli maraqlıdr. Belə ki, şəhər Fars körfəzinin sahilində yerləşir və əsasən ada üzərində qurulub, körpülərlə materikə birləşdirilib.
Qədimdə Əbu-Dabi balıqçılıq və mirvari dağçılığı ilə tanınırdı. Keçən əsrin 50-60-cı illərində burada neftin tapılması şəhərin sürətli inkişafına təkan verdi. Nəticədə Əbu-Dabi ölkənin ən böyük və zəngin əmirliyinə çevrildi.
Lakin şəhərin gəlir mənbəyi təkcə neft və qaz deyil. Bu sırada turizm, tikinti və daşınmaz əmlak, maliyyə və investisiya, aviasiya sahələri də dayanır. Ümumiyyətlə, Əbu-Dabi dünyanın ən varlı bölgələrindən sayılır.
Şəhərin bir çox görməli yeri və memarlıq abidəsi də var. Ən məşhur simvolu isə Şeyx Zayed Böyük Məscididir. Burada müasir göydələnlər, geniş yollar da göz oxşayır. Şəhərin çoxsaylı parkları, sahil bulvarları, lüks hotelləri və böyük ticarət mərkəzləri həmişə izdihamlıdır.
Nəqliyyat vasitəsi kimi Əbu-Dabidə taksi geniş yayılıb. Avtobus sistemi də mövcuddur, metro isə nisbətən zəifdir. Əbu-Dabi Dubaya nisbətən sakit və "rəsmi" şəhərdir.
Bu, bir müsəlman şəhəridir. Lakin çoxmillətlidir və turistlər üçün çox rahatdır. Burada açıq-saçıq geyimlərdən uzaq durmağa üstünlük verilir. İctimai yerlərdə sərxoş olmaq qadağandır. Davranışlarda mədəni olmaq vacibdir.
Əbu-dabililər Bakını çox bəyənirlər. Bunu şəhərin Bələdiyyələr və Nəqliyyat Departamentinin sədri Məhəmməd Əli Əl-Şorafanın Bakı Şəhər İcra Hakimiyyətində keçirilən görüşdə dediyi sözlər də təsdiqləyir.
Flora SADIQLI,
"Azərbaycan"
