"Ermənistanın baş naziri Nikol Paşinyan yenə köhnə ampluasındadır. O, ikibaşlı oyun oynamaqla məşğuldur. Paşinyanın ABŞ-yə təxminən 7 günlük səfərinin iki günü "fəal" keçib. O, özünü "sülhsevər göyərçin" kimi göstərməyə çalışıb. ABŞ-nin Tramp Administrasiyasının Cənubi Qafqaza ən böyük dəstəyinin regiona sülh gətirilməsinə töhfə verməsi olduğunu qeyd edib. Sülhdə bu qədər maraqlı olduğu fonu yaradıb, bununla Prezident Donald Trampın diqqətini cəlb etmək istəyib. Ancaq bu arzusu da gözündə qalıb".
Bu sözləri "Azərbaycan" qəzetinə Milli Məclisin deputatı Elman Nəsirov deyib. O bildirib ki, ABŞ Prezidenti onu heç qəbul da etməyib, yüksəksəviyyəli görüşlər də baş tutmayıb. Paşinyan diasporla görüşündə də təəccüblü və sensasion fikir səsləndirib. O deyib ki, İkinci Qarabağ müharibəsinin nəticələri Ermənistanın müstəqilliyi və suverenliyi üçün imkanlar yaradır.
Deputatın sözlərinə görə, Ermənistan və rəhbərliyi indi diasporun da yuxusuna haram qatan fikir səsləndirir. Diasporun gecə-gündüz fəaliyyəti, maliyyə resursları məhz "miatsum" ideologiyasının müdafiəsinə yönəlirdi. İndi isə Paşinyan onları məyus edib. "Yeri gəlmişkən, Paşinyan başqa bir maraqlı fikir də səsləndirib. O bildirib ki, ATƏT-in Minsk qrupunun buraxılmasına etiraz etmir. Aİ missiyası Azərbaycan-Ermənistan sərhədinin delimitasiya və demarkasiya olunan hissələrində yerləşdirilməyə bilər. İlk baxışdan diqqəti cəlb edən fikirdir, ancaq burada ciddi bir məsələ var. Belə ki, ABŞ-nin köhnə administrasiyası ilə imzaladığı strateji tərəfdaşlıq sazişinə görə Ermənistanda Amerikanın hərbi təmsilçiliyi də genişləndiriləcək. Bu, özündə hərbi komponenti ehtiva edir. Xüsusilə də bu, İran, Türkiyə sərhədlərinə Amerikanın məhdud hərbi kontingentinin gəlişini təmin edə bilər", - deyə deputat əlavə edib.
Deputat bildirib ki, digər tərəfdən Ermənistan sülhdən danışarkən Fransadan hücum silahları alır. Həmçinin məlum oldu ki, Ermənistan müdafiə naziri Hindistana səfər edib və iki ölkə arasında hərbi əməkdaşlığın daha da genişləndirilməsi məsələləri müzakirə olunub. Məlumdur ki, Ermənistan Hindistanın ən çox silah satdığı üçlüyə daxil olan ölkədir. Eyni zamanda o da sirr deyil ki, 2024-2025-ci maliyyə ili üçün Ermənistan Hindistandan 600 milyon dollarlıq hərbi silah-sursat almaq üzrə razılıq əldə edib. Onun böyük hissəsi artıq Ermənistana çatdırılıb.
E.Nəsirov vurğulayıb ki, sülhdən danışan Paşinyan 2025-ci ilin dövlət büdcəsində hərbi xərcləri 70 faiz artırıb: "O xərcləri 1,7 milyard dollara çatdırıb. Bu, onun "sülh göyərçini" olmadığını, beynəlxalq ictimaiyyəti çaşdırmağa çalışdığını təsdiqləyir və Ermənistanın ciddi şəkildə müharibəyə hazırlaşdığını göstərir. Azərbaycan prosesləri diqqətlə izləyir. Prezident İlham Əliyev bu məsələlərlə bağlı dəfələrlə mövqeyini bildirib. Dövlətimizin başçısı qeyd edib ki, Ermənistana silah verənlər onları geri alsınlar və bu sahədə imzaladıqları müqavilələri ləğv etsinlər. Çünki bu silahlanma müharibəyə aparır. Müharibə olsa, bu, Ermənistanın sonunun başlanğıcı olacaq. 1,9 milyard dollarlıq hərbi büdcəsi ilə Azərbaycan Ordusu Ermənistanı diz çökdürdü. İndi isə bizim hərbi büdcəmiz 5 milyard dollara çatıb. Nikol Paşinyan papağını qarşısına qoyub düşünməlidir ki, Azərbaycanla hərb yolunu seçmək Ermənistan üçün hansı faciələrə gətirib çıxara bilər".
Əsmər QARDAŞXANOVA,
"Azərbaycan"
