Prezident İlham Əliyevin Şanxay Əməkdaşlıq Təşkilatının “ŞƏT plyus” formatında keçirilən görüşündə səsləndirdiyi fikirlər Azərbaycanın həm regional, həm də qlobal gündəlikdə öz mövqeyini getdikcə daha da möhkəmləndirdiyini göstərir. Çıxışda Azərbaycanın Cənubi Qafqazda sülh və təhlükəsizliyin təmin olunmasında fəal rolu ilə yanaşı, beynəlxalq münasibətlər sistemində çoxtərəfli əməkdaşlığın gücləndirilməsinə verdiyi əhəmiyyət də diqqət çəkib.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
O bildirib ki, Azərbaycan-Qırğızıstan münasibətlərinin müttəfiqlik səviyyəsinə yüksəldilməsi bu siyasətin mühüm istiqamətlərindən biridir. Müttəfiqlik münasibətləri haqqında Müqavilənin imzalanması iki ölkə arasında siyasi dialoqun, iqtisadi əməkdaşlığın və qarşılıqlı dəstəyin yeni mərhələyə keçdiyini göstərir. Bu, eyni zamanda, Azərbaycanın Mərkəzi Asiya dövlətləri ilə əlaqələrə verdiyi strateji əhəmiyyətin göstəricisidir.
“Çıxışda Prezident İlham Əliyevin Cənubi Qafqazın tədricən sülh zonasına çevrildiyini vurğulaması isə regionda yeni reallıqların formalaşmasına diqqət çəkir. Ermənistanla münasibətlərin normallaşdırılması, ticarət əlaqələrinin genişləndirilməsi və yeni nəqliyyat-kommunikasiya xətlərinin yaradılması regionda qarşılıqlı iqtisadi maraqların və əməkdaşlığın artmasına xidmət edə bilər.
Burada nəqliyyat məsələsi xüsusilə əhəmiyyətlidir. Çünki kommunikasiyaların açılması yalnız iqtisadi dividendlər yaratmır, həm də region ölkələri arasında etimadın möhkəmlənməsi üçün praktiki zəmin formalaşdırır. Nəqliyyat bağlantılarının genişləndirilməsi Azərbaycanı Şərq-Qərb və Şimal-Cənub istiqamətlərində mühüm tranzit qovşaqlarından birinə çevirən imkanları daha da artırır. Bu isə Azərbaycanın regional əməkdaşlıq və iqtisadi inteqrasiya proseslərində rolunu gücləndirir”, – deyə N.Həsənov vurğulayıb.
Deputatın sözlərinə görə, çıxışın digər mühüm istiqaməti BMT Təhlükəsizlik Şurasının qətnamələrinin icrası məsələsi idi. Azərbaycanın 1993-cü ildə qəbul edilmiş qətnamələrin icrasını öz gücü ilə təmin etməsi beynəlxalq hüquq normalarının həyata keçirilməsi ilə bağlı mövcud problemləri bir daha gündəmə gətirir. Prezidentin gələcəkdə Təhlükəsizlik Şurasının qətnamələrinin operativ icrası üçün xüsusi mexanizmlərin yaradılmasını təklif etməsi, əslində, beynəlxalq təhlükəsizlik sisteminin effektivliyinin artırılmasına yönəlmiş çağırışdır.
O əlavə edib ki, Azərbaycanın dörd il Qoşulmama Hərəkatına sədrlik etməsi də ölkənin çoxtərəfli diplomatiya sahəsində qazandığı geniş təcrübəni göstərir. Bu təcrübə Bakının müxtəlif siyasi mövqelərə malik dövlətlərlə dialoq qurmaq, qarşılıqlı anlaşmanı təşviq etmək və beynəlxalq əməkdaşlığın inkişafına töhfə vermək imkanlarını genişləndirib.
"Prezident İlham Əliyevin “ŞƏT plyus” formatındakı görüşdə çıxışını üç əsas istiqamət üzrə qiymətləndirmək olar: regional sülhün və təhlükəsizliyin möhkəmləndirilməsi, qonşu və tərəfdaş dövlətlərlə strateji əməkdaşlığın genişləndirilməsi və beynəlxalq münasibətlər sistemində daha effektiv çoxtərəfli mexanizmlərin formalaşdırılması.
Bu yanaşma Azərbaycanın öz milli maraqlarını qorumaqla yanaşı, Cənubi Qafqazın və daha geniş Avrasiya məkanının siyasi, iqtisadi və nəqliyyat əlaqələrinin inkişafında fəal aktor kimi çıxış etmək niyyətini ortaya qoyur”, – deyə N.Həsənov qeyd edib.
_1788269588jpeg_1788299307.jpeg)
