Azərbaycanın Birinci vitse-prezidenti Mehriban Əliyevanın Vatikana rəsmi səfəri sivilizasiyalararası humanitar və mədəni dialoqun inkişafında mühüm mərhələdir. Bu səfər Azərbaycanın Şərq və Qərb, islam və xristian dünyaları arasında körpü rolu oynadığını bir daha təsdiqləyir. Çoxəsrli dinlərarası və mədəniyyətlərarası birgəyaşayış ənənələrinə malik Azərbaycan dövləti tolerantlıq, qarşılıqlı hörmət və mədəni irsin qorunması kimi dəyərlərə sadiqliyini növbəti dəfə nümayiş etdirib.
Bunu AZƏRTAC-a beynəlxalq münasibətlər üzrə italiyalı jurnalist və ekspert Domeniko Letitsiya söyləyib.
O bildirib ki, Heydər Əliyev Fondunun Romadakı Kommodilla katakombalarının bərpası, eləcə də Vatikanın əlyazmalarının və mədəni abidələrinin qorunmasına yönəlmiş fəaliyyəti humanitar diplomatiyanın xalqlar arasında qarşılıqlı anlaşmanın möhkəmlənməsinə necə xidmət edə biləcəyinin bariz nümunəsidir.
“Azərbaycan ilə Müqəddəs Taxt-Tac arasındakı əməkdaşlıq göstərir ki, mədəni diplomatiya sülh alətinə çevrilə bilər. Bu, sadəcə rəmzi jest deyil, dinlər və mədəniyyətlərarası dialoqun tez-tez kövrək olduğu dünyada etimad və həmrəyliyin möhkəmləndirilməsinə konkret töhfədir”, – deyə ekspert vurğulayıb.
Domeniko Letitsiya, həmçinin qeyd edib ki, Mehriban Əliyevanın Vatikan səfəri təkcə ikitərəfli münasibətlər baxımından deyil, bütövlükdə beynəlxalq ictimaiyyət üçün də əhəmiyyət daşıyır. “Azərbaycan özünü təkcə Avropanın enerji və iqtisadi tərəfdaşı kimi deyil, həm də bəşəriyyətin ortaq irsinin qorunması üzrə mədəni və humanitar layihələrin təşəbbüskarı kimi göstərir. Bu amil ölkəni qlobal sivilizasiyalar dialoqunun mühüm iştirakçısına çevirir. Azərbaycanın Birinci vitse-prezidentinin Vatikan səfəri sülh, hörmət və mənəvi birliyin mesajıdır və beynəlxalq arenada yüksək qiymətə layiqdir”, – deyə D.Letitsiya əlavə edib.
