Azərbaycan və Ermənistan arasında sülh prosesi artıq yeni, praktiki müstəviyə qədəm qoyub. İki ölkə arasında hərbi gərginliyin geridə qalması, sərhədlərin müəyyənləşməsi və nəqliyyat yollarının açılması istiqamətində atılan tarixi addımlar regionda davamlı sabitliyin əsasını qoyur. Bu gün Cənubi Qafqazda tərəflər arasında birbaşa dialoq mexanizminin işləməsi və sülh sazişi üzrə razılıqların əldə olunması yalnız iki dövlət üçün deyil, bütün bölgənin iqtisadi inkişafı üçün yeni imkanlar açır.
Milli Məclisin deputatı Kamran BAYRAMOV qəzetimizə açıqlamasında deyib ki, bu müsbət dinamikanın tərkib hissəsi kimi, Azərbaycan Prezidenti İlham Əliyevə Ermənistanın Baş naziri Nikol Paşinyanın zəng etməsi və Vaşinqton Sülh Sammitinin ildönümü münasibətilə fikir mübadiləsi aparması xüsusi diqqət çəkir: "Liderlər arasında baş tutan telefon danışığı göstərir ki, tərəflər artıq əldə olunmuş sülh razılaşmalarına sadiqdirlər və siyasi iradə nümayiş etdirirlər. Nikol Paşinyanın bu təşəbbüsü iki ölkə arasında etimad mühitinin daha da möhkəmlənməsinə və sülh sazişinin tam yekunlaşması istiqamətində prosesin sürətlənməsinə xidmət edir".
K.Bayramov qeyd edib ki, danışıq zamanı tərəflər sülh prosesinin irəliləməsində Prezident Donald Trampın və ABŞ hökumətinin mühüm rolunu xüsusi vurğulayıblar. Eyni zamanda ötən il ərzində Azərbaycan ilə Ermənistan arasında münasibətlərin normallaşması istiqamətində böyük irəliləyiş əldə olunduğu qeyd edilib. Söhbət zamanı iki ölkə arasında iqtisadi və ticari əlaqələrin inkişafı sülhün əsas nəticələrindən biri kimi qiymətləndirilib. Bu çərçivədə Azərbaycan neft məhsullarının Ermənistana ixracı xüsusi vurğulanıb. Həmçinin tranzit yüklərin Azərbaycan ərazisindən Ermənistana və digər istiqamətlərə daşınması məsələsi də nəzərdən keçirilib. "Diqqətçəkən ən vacib məqamlardan biri TRIPP marşrutunun icrası ilə bağlı fikir mübadiləsinin aparılması idi. Vaşinqtonda əldə olunan razılaşmalara istinad edilməsi göstərir ki, regionda nəqliyyat və kommunikasiya xətlərinin açılması prosesi beynəlxalq tərəfdaşların da iştirakı və dəstəyi ilə konkret müstəviyə keçir. Bu, strateji marşrutların reallaşması istiqamətində praktiki addımların atıldığını təsdiqləyir", - deyə o əlavə edib.
Deputat diqqətə çatdırıb ki, tərəflərin sülh prosesini irəlilətmək niyyəti hərbi-siyasi gərginlik dövründən sonra regionda uzunmüddətli sabitliyin bərqərar olmasının prioritet məsələ olduğunu göstərir: "Bu, təkcə siyasi bəyanat deyil, həm də təhlükəsizlik mühitinin formalaşması üçün vacib şərtdir. Çünki iqtisadi maraqların kəsişməsi və qarşılıqlı asılılığın yaranması sülhün ən böyük zəmanətidir. Yolların və kommunikasiyaların bərpası region ölkələrinin iqtisadi inteqrasiyasını sürətləndirəcək. Bu telefon danışığı göstərir ki, tərəflər bəyanatlardan praktiki mərhələyə keçməkdə qərarlıdırlar. Vaşinqton razılaşmaları çərçivəsində atılan bu addımlar Cənubi Qafqazın nəqliyyat və iqtisadi qovşağa çevrilməsi baxımından böyük əhəmiyyət kəsb edir".
Kamran Bayramov bildirib ki, bu gün regionda yaşanan tarixi dönüş bir daha göstərir ki, Cənubi Qafqazda davamlı sülhün və təhlükəsizliyin yeganə zəmanətçisi məhz tərəflərin öz siyasi iradəsi və birbaşa dialoqudur: "İllər boyu bölgədə gərginliyi süni şəkildə saxlayan bəzi xarici dairələrin müdaxilə imkanları artıq tamamilə ortadan götürülüb. ABŞ-nin digər kənar qüvvələrdən əsas fərqi də məhz bundadır: Vaşinqton tərəflərə öz şərtlərini diktə etmir, əksinə, iki ölkənin birbaşa razılaşdığı sülh gündəliyinə, iqtisadi tərəqqiyə və nəqliyyat layihələrinə real dəstək verir, yardım göstərir. Prezident İlham Əliyevin nümayiş etdirdiyi qətiyyətli mövqe və regional liderlik sübut etdi ki, xarici diktələr dövrü geridə qalıb. Cənubi Qafqazın gələcəyini məhz region dövlətlərinin özləri və onlarla bərabərhüquqlu, faydalı əməkdaşlıq edən tərəfdaşlar müəyyən edir".
Əsmər QARDAŞXANOVA,
"Azərbaycan"
