№ 83
Azərbaycan Respublikası Nazirlər Kabinetinin QƏRARI
Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, “Azərbaycan Respublikasının Torpaq Məcəlləsində, Azərbaycan Respublikasının Mülki Prosessual Məcəlləsində, Azərbaycan Respublikasının Mülki Məcəlləsində, “Notariat haqqında” və “İcra haqqında” Azərbaycan Respublikasının qanunlarında dəyişiklik edilməsi barədə” Azərbaycan Respublikasının 2025-ci il 21 iyun tarixli 216-VIIQD nömrəli Qanununun tətbiqi haqqında” Azərbaycan Respublikası Prezidentinin 2025-ci il 7 iyul tarixli 653 nömrəli Sərəncamının icrasını təmin etmək məqsədilə Azərbaycan Respublikasının Nazirlər Kabineti qərara alır:
1. Azərbaycan Respublikası Nazirlər Kabinetinin 2000-ci il 23 avqust tarixli 148 nömrəli Qərarında (Azərbaycan Respublikasının Qanunvericilik Toplusu, 2000, № 8 (III kitab), maddə 652 (Cild I); 2024, № 9, maddə 1067) aşağıdakı dəyişikliklər edilsin:
1.1. həmin Qərarla təsdiq edilmiş 4 nömrəli formanın adında “Ölümü ilə əlaqədar vərəsəliyi qəbul etməyə vaxtı çatmamış” sözləri “Miras açıldıqdan sonra ölmüş” sözləri ilə əvəz edilsin;
1.2. həmin Qərarla təsdiq edilmiş 5 nömrəli forma ləğv edilsin.
2. Azərbaycan Respublikası Nazirlər Kabinetinin 2000-ci il 11 sentyabr tarixli 167 nömrəli Qərarı (Azərbaycan Respublikasının Qanunvericilik Toplusu, 2000, № 9, maddə 693 (Cild I); 2024, № 1, maddələr 110, 111, № 3, maddə 359, № 5 (II kitab), maddələr 597, 606, № 9, maddə 1067; 2025, № 2, maddə 193, № 7, maddə 698) ilə təsdiq edilmiş “Azərbaycan Respublikasında notariat hərəkətlərinin aparılması qaydaları haqqında Təlimat”da aşağıdakı dəyişikliklər edilsin:
2.1. 69-cu hissədə “mirası qəbul etməməsi” sözləri “mirasdan imtina etməsi” sözləri ilə əvəz edilsin;
2.2. 83-cü hissənin birinci abzasında “xəbər verməlidir” sözləri “bildiriş göndərir” sözləri ilə əvəz edilsin və həmin hissənin ikinci abzası aşağıdakı redaksiyada verilsin:
“Notarius qaib vərəsələrin axtarılması üçün mediada, habelə Notariat Palatasının rəsmi internet saytında elan yerləşdirir.”;
2.3. 88-ci hissənin birinci abzasında “mirası qəbul edənədək, miras qəbul edilmədikdə isə” sözləri “mirasın qəbulundan imtina etdikdə” sözləri ilə əvəz edilsin;
2.4. 90-cı hissə aşağıdakı redaksiyada verilsin:
“90. Miras əmlakın mühafizə edilməsi vərəsəlik şəhadətnaməsi verilənədək davam edir.”;
2.5. 96-cı hissə üzrə:
2.5.1. ikinci abzas ləğv edilsin;
2.5.2. üçüncü abzas aşağıdakı redaksiyada verilsin:
“Vərəsə miras açıldıqdan sonra onun müəyyənləşdirilmiş müddətdə qəbulundan imtina etmədən öldükdə, mirasın qəbulundan imtina etməmiş vərəsənin vərəsələri ilkin miras qoyandan qalmış əmlaka mirasın qəbulundan imtina etməmiş vərəsənin əmlakı kimi vərəsəlik şəhadətnaməsi ala bilərlər.”;
2.5.3. aşağıdakı məzmunda beşinci, altıncı və yeddinci abzaslar əlavə edilsin:
“Notarius vərəsəlik şəhadətnaməsinin əldə olunması üçün müraciət edən vərəsəyə şəhadətnamə verərkən vərəsə olan, lakin şəhadətnamə almaq üçün müraciət etməmiş digər vərəsələrin (miras şəriklərinin) də mirasdan onlara çatacaq paylarını müəyyən edərək həmin şəhadətnamədə göstərir.
Hər bir miras şəriki Azərbaycan Respublikası Mülki Məcəlləsinin 1325.2-ci maddəsi ilə müəyyən edilmiş payına da vərəsəlik şəhadətnaməsi ala bilər.
Azərbaycan Respublikası Mülki Məcəlləsinin 1325.2-ci maddəsində nəzərdə tutulmuş miras şəriklərinin miras paylarına sərəncam vermək hüquqları vardır. Həmin şəxslər vərəsəlik şəhadətnaməsi alanadək notariat qaydasında təsdiq edilmiş müqaviləyə əsasən miras paylarına sərəncam verə bilərlər. Miras şərikləri arasında miras paylara sərəncam verilməsi haqqında müqavilə əsasında miras payı əldə etmiş vərəsənin mirasdakı payı əldə etdiyi pay nisbətinə uyğun artırılır və vərəsəlik şəhadətnaməsində yekun payı göstərilir.”;
2.6. 97-ci hissənin birinci abzası aşağıdakı redaksiyada verilsin:
“Əgər nə qanun üzrə, nə də vəsiyyət üzrə vərəsə yoxdursa və ya bütün vərəsələr mirasdan imtina etmişdirlərsə, yaxud bütün vərəsələr vərəsəlik hüququndan məhrum edilmişdirlərsə, vərəsələri olmayan əmlak dövlətə keçir, əgər miras qoyan şəxs sosial xidmət müəssisələrinin təminatında olmuşdursa, qanunla dövlət mülkiyyətinə keçməli olan daşınar əmlak istisna olmaqla həmin şəxslərə məxsus daşınar əmlak onların mülkiyyətinə keçir.”;
2.7. 98-ci hissənin üçüncü abzasının üçüncü cümləsində “mirasın qəbulu və ya ondan” sözləri “mirasın qəbulundan” sözləri ilə əvəz edilsin;
2.8. 99-cu hissə üzrə:
2.8.1. ikinci abzasdan “mirasın açıldığı gündən altı ay ərzində” sözləri çıxarılsın və həmin abzasa “nümayiş etdirdikdə” sözlərindən sonra “habelə Azərbaycan Respublikası Mülki Məcəlləsinin 1256-cı maddəsi ilə müəyyən olunmuş müddət ərzində mirasın qəbulundan imtina etmədikdə” sözləri əlavə edilsin;
2.8.2. beşinci abzasın birinci və üçüncü sətirlərindən “mirasın qəbulu üçün müəyyən edilmiş müddətdə” sözləri çıxarılsın;
2.9. 110-cu hissənin altıncı abzası aşağıdakı redaksiyada verilsin:
“Vərəsəlik şəhadətnaməsinin verilməsi haqqında ərizə mirasın qəbul edilməsi haqqında ərizə kimi qəbul edilir.”.
Əli Əsədov
Azərbaycan Respublikasının Baş naziri
Bakı şəhəri, “ 17 ” “ mart ” 2026-cı il
jpg_1775472819.jpg)
