Azərbaycan bütün dünya dövlətləri ilə normal və bərabərhüquqlu əlaqələrin qurulmasının tərəfdarıdır. Bu istiqamətdə xarici siyasətimiz uğurla davam etdirilir.
Azərbaycanın hər zaman mehriban qonşuluq siyasətinə sadiq olduğunu qeyd edən Milli Məclisin deputatı Sevinc Fətəliyeva qəzetimizə açıqlamasında bildirib ki, məhz buna görə ölkəmiz dünyada etibarlı tərəfdaş kimi tanınır. Bu mənada, İranla da mehriban qonşuluq siyasətinin qarşılıqlı olaraq davam etdirilməsi həm hər iki dövlətin maraqlarına cavab verir, həm də bütövlükdə regionumuz üçün faydalıdır.
"Hazırda dünyada, o cümlədən yaxın regionumuzda mürəkkəb proseslər baş verir. Bu gün Yaxın Şərq bölgəsində artan gərginlik region xalqları və dövlətləri üçün ciddi narahatlıq doğurur. Xüsusilə, ABŞ-nin qonşu İrana qarşı hərbi əməliyyatlara başlayacağına dair xarici mediada informasiyalar yayılmaqdadır. İranın yaxın qonşusu olaraq Azərbaycan bu proseslərdən narahatdır, çünki hərbi toqquşmalar bölgəyə yalnız fəlakətlər gətirə bilər",- deyə o əlavə edib.
Deputatın sözlərinə görə, dövlətimiz regionda sabitliyin təmin olunmasında maraqlıdır. Ölkəmiz xarici siyasətində milli maraqlar və beynəlxalq hüquq normaları ilə yanaşı, sülh, sabitlik, inkişaf, qarşılıqlı faydalı əməkdaşlıq kimi meyarları da əsas götürür, yeni və daha mütərəqqi dəyərlər təqdim edir. Bu isə həm də regional və qlobal inkişafa, sabitliyə, təhlükəsizliyə töhfə kimi xarakterizə edilir.
S.Fətəliyeva qeyd edib ki, İran Azərbaycanın yaxın qonşusu, ABŞ isə fəal tərəfdaşımızdır: "Əlbəttə ki, bu ölkələr arasında hərbi toqquşmanın olmasını istəmirik. Ölkəmiz gərginliyin aradan qaldırılması məqsədilə tərəflər arasında vasitəçi rolunu oynaya bilər. Yanvarın 31-də Azərbaycan Prezidenti İlham Əliyevlə İranın Prezidenti Məsud Pezeşkianın telefon söhbətində də bu məsələ diqqət mərkəzində olub. Dövlətimizin başçısı bölgədə yaranmış vəziyyətin narahatlıq doğurduğunu ifadə edərək, Azərbaycanın gərginliyin aradan qaldırılmasına töhfə verməyə hazır olduğunu bildirib və ölkəmizin bu kimi məsələlərin danışıqlar və qarşılıqlı anlaşma yolu ilə həllinin tərəfdarı olduğunu vurğulayıb. İki ölkənin XİN başçılarının telefon danışığında isə Azərbaycanın hava məkanının və ya ərazisinin hər hansı dövlət tərəfindən qonşu İrana və ya digər hansısa bir ölkəyə qarşı hərbi əməliyyatların aparılması üçün istifadə edilməsinə heç vaxt imkan verilməyəcəyi xüsusi vurğulanıb".
Deputatın fikrincə, dövlətimizin mövqeyi mövcud problemlərin yalnız beynəlxalq hüququn norma və prinsiplərinə uyğun olaraq dialoq və diplomatik yollarla həll edilməsidir. Azərbaycanın bəzi ölkələr arasında yaranmış problemlərin həllində uğurlu vasitəçilik təcrübəsi mövcuddur. Məsələn, hələ 2008-ci ildə Rusiya ilə Gürcüstan arasında baş verən gərginliyin aradan qaldırılmasında da ölkəmiz fəal vasitəçi rolunu oynamışdı. İsrail ilə Türkiyə arasında yaranmış problemin həllində də ölkəmiz vasitəçilik edib. Bakı həmin ölkələrin nümayəndələrinin görüşünə evsahibliyi edib. Eləcə də, İsrail və Suriya rəsmilərinin bəzi görüşləri də Bakıda baş tutub. "Bundan əlavə, ölkəmiz fərqli siyasi-hərbi qütblər arasında dialoqun baş tutması üçün ən uyğun məkanlardan biri kimi özünü təsdiqləyib. Məsələn, Bakıda Rusiya və
NATO-nun ali hərbi rəhbərlərinin görüşlər keçirməsi ölkəmizin strateji dialoq platforması kimi çıxış etdiyini göstərir. Ölkəmiz NATO-Rusiya və ABŞ-Rusiya arasında yüksək vəzifəli hərbçilərin bir çox görüşünə evsahibliyi edib. Belə mötəbər görüşlərin keçirilməsi üçün Azərbaycanın seçilməsi beynəlxalq səviyyədə ölkəmizə olan böyük inamın ifadəsidir", -deyə deputat vurğulayıb.
Əsmər QARDAŞXANOVA,
"Azərbaycan"
jpg_1775219395.jpg)
