Azərbaycanın insan hüquqları üzrə müvəkkili (ombudsman) Səbinə Əliyeva Slovakiyanın Bratislava şəhərində 10 Dekabr – Beynəlxalq İnsan Hüquqları Gününə həsr olunmuş Ombudsmanların Beynəlxalq Sammitində iştirak edib.
Ombudsman Aparatından AZƏRTAC-a verilən məlumata görə, İşgəncələrə qarşı Milli Preventiv Mexanizm (MPM) fəaliyyəti çərçivəsində əldə olunmuş müsbət təcrübələrin mübadiləsi məqsədilə təşkil edilmiş beynəlxalq tədbirdə Səbinə Əliyeva ombudsman və milli insan hüquqları təsisatlarının insan hüquq və azadlıqlarının müdafiəsi və təşviqi sahəsində fəaliyyətinin əhəmiyyətini vurğulayıb, bu istiqamətdə beynəlxalq əməkdaşlığın vacibliyini diqqətə çatdırıb.
Azərbaycan və Slovakiyanın ombudsman institutları arasında səmərəli əməkdaşlıq əlaqələrinin mövcud olduğunu bildirən müvəkkil bu əməkdaşlığın daha da dərinləşəcəyinə ümidvar olduğunu qeyd edib.
Səbinə Əliyeva Azərbaycan ombudsmanının Milli Preventiv Mexanizm mandatı çərçivəsində həyata keçirdiyi fəaliyyəti barədə ətraflı məlumat verib, Ombudsman və Milli Preventiv Qrupun üzvləri tərəfindən şəxslərin öz iradəsi ilə tərk edə bilmədiyi müəssisələrə mütəmadi olaraq başçəkmələrin həyata keçirildiyini, saxlanılan şəxslərin hüquqlarının müdafiəsi məqsədilə qanunvericiliyin təkmilləşdirilməsi, saxlanma şəraitinin yaxşılaşdırılması istiqamətində təklif və tövsiyələrin verildiyini, bu sahədə müsbət təcrübələrin əldə edildiyini, “Azərbaycan Respublikasının İnsan hüquqları üzrə müvəkkili (ombudsman) haqqında” Konstitusiya Qanununa edilmiş dəyişikliklər nəticəsində MPM mandatının bir qədər də genişləndirildiyini diqqətə çatdırıb.
Müvəkkil, həmçinin məhkumların və onların ailə üzvlərinin müraciətləri əsasında ölkə Prezidentinə əfv təklifləri ilə müraciət etdiyini, ombudsmanın fəaliyyəti dövründə onun vəsatəti ilə ümumilikdə 900 məhkumun əfv edildiyini diqqətə çatdırıb.
Beynəlxalq Sammit çərçivəsində insan hüquqları sahəsində fərqlənmiş şəxslərin mükafatlandırılması mərasimi keçirilib, həmin tədbirdə beynəlxalq təşkilatların nümayəndələri ilə yanaşı, 25 ölkənin səfiri, o cümlədən Azərbaycanın Slovakiyadakı səfiri Vüsal Abdullayev iştirak edib.
Tədbirin sonunda Ombudsmanların Sammitinin yekunlarına dair Bratislava Bəyannaməsi qəbul olunub.
Daha sonra Səbinə Əliyeva Slovakiya Respublikasının Avropa İşləri üzrə Milli Şurasının Komitəsində keçirilmiş görüşdə iştirak edib.
